Read Nyishi JOB 31 Bible Online

JOB 31 - Nyishi bible

JOB 31

¹“Ngoqg vnyiq lvgab ngo dingrnam ak mvp pakun: hvbnyiloqkam ngo hoggub mvvngam nyijwr akam hwwywr kaatayin?

²Aog Pwnbo hoqgv ngoqg naady sanamv hoggv doodwn hoo aog Pwnbo hoqgv ngoqg otu nvvsiq sanamv hoggv doodwn?

³Hentwr-kaasv lootw maanbo nyi gab maai yv, hoo ciqcaq-bviyaq nyimurbo nyinbo tulu gab maai yv?

⁴Mwv ngoqg lamta tulungam hoo ngoqg dwqkap mwlwngam kaal xika maad nvi yv?

⁵“Ngo vm mvvl wpa kuloqkam hoo ngoqg lvpiangv xaalyo taab nyebia jaqb wpa kuloqkam;

⁶(Ngam lootw ko pala jaaka nanho jaaka to, hoo ngoqg lootwb swwnam mam Pwnboam cengm to!)

⁷ngoqg dwql wnamv ngoqg lamtangam wxaq paloqkam hoo ngoqg hangv ngoqg vnyiq kaakwb wpa nyiloqkam, hoo ngoqg alaqlo hog kacbo ak kaqtin paloqkam,

⁸ho ngam vly liimto, hoo asaqkam dvm to, hoo hoggv ngoqgab swwdwn ham buuxa to.

⁹“Ngoqg hangv nyem ak kaaby paloqkam, hoo ngoqg door-doopwg viyapho dvqs paloqkam,

¹⁰hoo ngoqg nywxwngam asaq gab dux xum jito, hoo asaq tulungam mwn aoho pvxw guba mvto.

¹¹Hoggab hoqhv mwlwngam nyic-nyia ak nyibin yaanamv; ho nyegam tulungv hoqhvb nyimur boam vcjaqb laqm-baqm dvn;

¹²hoggab hoqhv Yoqtwr dooma bo ung namgub wm guanam hvb nyidwn, hoo hoqhv ngoqg swwrab ko rwb mwlwngam guxia dvn.

¹³“Hwdlo ngoqg nyera-paqn tulungv ngam ceekol sornam mam baqa yikam, ngo bulug pagoqkam haqxia paloqkam,

¹⁴hwdlo Pwnbov daqrab yin hoggv ngo nyitayin? Hwdlo mwv heqka yin, hoggv ngo mwam birwq tayin?

¹⁵Hiyv ngam pwnbo hv mwam mamb ho pwma pan yv? Hoo ngulam mamb ho ywrn pan yv?

¹⁶“Jwwgwbo mwwbynam mam ngo parl ap paloqkam, ho xwwmy tulug vnyiq tuugabnam mam niqtuq lengm mvma paloqkam,

¹⁷ho ngoqg duduq-dvngaram vpwb dvpaloqkam, hoo ab dooma bov hoqham dvma paloqkam

¹⁸(hoggab ngoqg yaapa hoqgv ab dooma bov ngoqg lvgab ab lvgab swwrabnam hvb swwrabnum, hoo ngoqg annwg mamb hoqgv ngo xwwmiam svkal tomswrnum),

¹⁹hiyv lajaqkam vj koopa maab sita boam ho vj kootum nwnw boam ngo kaapa kuloqkam,

²⁰mwwg gv-ngv ngam paqma paloqkam, hoo ngoqg sviya vm hoqgv mwam og mvma paloqkam,

²¹ab dooma boam ngoqg alaqkv laqrab paloqkam, hoggab toggoqho ngam svka boam ngo kaapanum,

²²ho ngoqg gorbw lwlyam ngoqg gorbw hoqgv hopaq mvto, hoo ngoqg alaqkam lvqbw hoqgv pusuq mvto.

²³Hoggab Pwnbo hoqgv hentwr-kaasv bos looda dvb nyinum, mwwg koiyib yuunam mam ngo kaany maanum.

²⁴“Ngo hunam ngoqg mwwgw mvpaloqkam ho aljaqn bo hunam ngo svqtin gob goqpa kuloqkam,

²⁵ngoqg gumnv naleq ko-gab ho ngoqg alaqkv naleqgo naapa ko-gab ngo hwnyir-hvmar paloqkam,

²⁶Hwdlo doonyiv kaalin yin ngo hutongam, ho kangam tvl wdubo poolam ngo kaapa kuloqkam,

²⁷hoo ngoqg hangv kvsil kaaby paloqkam, hoo ngoqg alaqkam ngoqg agamv moopup paloqkam,

²⁸soq samkam nyegam bo tulungv nyimur ko-gab laqm-baqm kin do, hoggab aog Pwnboam ngo vm mvvnam hvb nyidkun.

²⁹“Ngam oyum bov yuupaq yin ham ngo hwnyir-hvmar paloqkam, ho hwdlo almanv mwam mviya yin tob bupa kuloqkam

³⁰(Mwwg swwg gab beenam mam kol ngoqg agam mam ngo bec bem mvma),

³¹Ngoqg tombu ho doonbo nyiingv hvl bema paloqkam, ‘Hoqho hiyv mwwg vdin lvgab bwwr maap pan?’

³²(nyiody wnboam lyobu ho yum mvmanum; ngoqg viyap pam nyiody wnboam kuqko jitwl doomnum),

³³ngoqg nyicam asaq nyinam hvb ngo apaq paloqkam ho ngoqg hoobum ho ngoqg nyixiaqkam kvs paloqkam,

³⁴hoggab nyitwl mvqlwngam koijaqb bosil ngo daqnum hoo imiq dvpar tulug oyumnamv ngam bos looda dvb nyinum, hoqgab ngo cooikab doonum, hoo viyap hoqgv lvvgwb wlin maanum—

³⁵Oa, ngam tapa bo ak doonyi loqkam alpa! Oa, ngoqg ceebiongv ngam bepaq-beyaql xeqpa kuloqkam! (Soq si ngoqg tixnamv! Pwnboam ngam birwq mvto!)

³⁶Jvqtw jaqb ngoqg gorbw so ham ngo baqtayin; ywr dumtup hiqlwqnam hvb ngo ham ngoqg aoho hiqlwq tayin;

³⁷ngoqg dwqkap mwlwngam mwam betam tayin; lvpw atwg ko tuup hvb mwwg dookho hvvnwq tayin.

³⁸“Ngoqg gvdangv ngam ceekol sogoq goqlin paloqkam hoo hoqg paagar tulungv lvkin hap kuloqkam,

³⁹hoqg aaxiam hiqmab ngo dvpa kuloqkam hoo hoqg rongo atam svqngin mvpa kuloqkam,

⁴⁰wtw am kwlib taa-ngam, hoo tanyeq kwlib goolo amsongam swwm to.” Jobwg gootwr-goonya gomcwr tulungv.