Read Nyishi JOB 32 Bible Online

JOB 32 - Nyishi bible

JOB 32

¹Hoqgab soq nyi oum si Jobnvn birwq kumab doonunum, hoggab mwwg vnyiqho mwv nyedar bob nyinum.

²Ho Ramwg imiq dvpar hoqg Bujig hosiq Barakelwg ko tuup Elihu haaxaql bioqnum. Mwv Jobnvn haaxaql bioqnum hoggab mwv atv lootwngv hvl ho Pwnboam ya timbnum.

³Mwv Jobwg ajin oum ham kam haaxaql bioqnum hoggab bulv Jobnvn nyimur pa hvl bibwq sutlakam, bulv hog birwq sv kaapa maanum

⁴Ho moodho Elihu Jobnvn agam goodwb kaaya yaal doonum hoggab bulv mwam akam yaanum.

⁵Hoo hwdlo soq nyi oum si hog birwq sv doomanam mam Elihu kaapa yin, mwv haaxaql bioqnum.

⁶Hoo Bujig hosiq Barakelwg ko tuup Elihu birwql hoo benum: “Ngo vnywngv anyo dvn, hoo nulv akam duku; hoqgab nulug agaho ngoqg mwwnam mam bibwq dvb ngo hvnywl hoo bosnum

⁷Ngo benum, ‘Aalam agam goom to, hoo vnyw tulungam pumb rwnam mam tomswr mvto.’

⁸Hvbmabde hoqhv nyia koog yalv, Pwnbog saqnamv mwam cenglaq mvdwb mvdwn.

⁹Soq si axa ko-gab pumb rwnam dooma dvn, ho hoggv kvtaq dvn akam ko-gab cenglaq maadwn.

¹⁰Hoqgab ngo bedwn, ‘Ngam tagabto; ho ngoqg mwwnam mam kam ngo bibwq tan.’

¹¹“Kaato, nulug gomcwr tulungam ngo taiyal doonum, nulug pumb rwnbo goonam tulungam ngo tagabnum, hoggv betanam ham nulv meegaql meelinum.

¹²Ngo nul gam tagab jinjinum, hoo kaato, nulug pengko hoqgv hiyv kam Jobnvn beya nyomanum ho mwwg gomcwr tulungam birwq nyomanum.

¹³Hengab to nulv lokwn bitwqto, ‘Ngulv pumb rwnam mam kaapa paku; Pwnbov mwam birwq kamyi nvpv, nyia kov ma.’

¹⁴Mwwg gomcwr tulungam ngam ceeko mvdwb ciqkin maasu, hoo nulug agam goonam hoqgv mwam ngo birwq nyoram.

¹⁵“Bulv mwwdwq do; bulv hog birwq kuma; bulv kobeq sanam dook ma.

¹⁶Hoggab bulv agam gook ma, hoggab bulv daqdo, hoo birwqsv dook ma, hoo ngo kaaya bviyv?

¹⁷Ngo kam ngoqg birwq sanam besam betayin; ngo kam ngoqg mwwnam mam bibwq tayin.

¹⁸Hoggab ngo goos rooxo twqd ku; ngoqg ura soqg yalam ngo mvtur nyoma.

¹⁹Kaato, ngoqg kepongv roo alangv suuswrko ung doomanam hvb nyido; nitbo vpin opo yooxaqkv buqc tanam hvb nyido.

²⁰Ngo hoggub nyijaqkam agam gootayin do, ho ngo saqsornam mam kaapa tai; ngo hoggub nyijaqkam ngoqg naboram kuqkol hoo birwq tayin.

²¹Hiyam kam ngo mwwsw-mwwpaqkam kaakin ram ho hiyam kam dujuq-pwxy dvmaq-soolo ram.

²²Hoggab ngo dujuq-pwxy dvmaq-soolo dvb goocin maadwn, hvb nyib nyiloqkam ngam twrw-tvnbo ngam nyebia jaqb aado naapaq tayin.