Read Nyishi JOB 33 Bible Online

JOB 33 - Nyishi bible

JOB 33

¹“Hvbmabde sija, ngoqg goonam sam tato, Joba, hoo ngoqg gomcwr tulu sam tagabto.

²Kaato, ngoqg agam mam ngo kuqko gviyin; ngoqg agam lyolv berab yin.

³Ngoqg gomcwr tulu si ngoqg jvqtw hang soqgv bibwq dvn, hoo ngoqg nvbcwrv hoggv cengdwn hoq tulu ham hengab jaqb goodwn

⁴Pwnbog Yalv ngam pwnum, hoo Pwnbog saqnamv ngam swwgam jipan.

⁵No bela dvloqkam, ngam birwqto; noqg gomcwr tulungam ngoqg agaho pvvka to; no hogloq ho dvqgw dvn.

⁶Kaato, ngo Pwnbo daiyaho noqg hvb kalam aiyin dvn; ngam kam ked deekam pwcw-hoqgv inlinamv.

⁷Kaato, no ngam bos looda dvb nyima dvn; ngoqg nwwteqnamv noqg aoho vgw gob nyiram.

⁸“Jvqtw jaqb no ngoqg nyuru si agam goopa ku, hoo noqg gomcwr tulug yalam ngo tapa paku.

⁹No begamv, ‘Ngo dvrwqdvn, nyimur dooma dvn; ngo dvrwqdvn, hoo ngoqg ura lo nyixiaq dooma dvn hvdo.

¹⁰Kaato, mwv lok-lokub ngam ceeko do, mwwg ceebio gob ngam xitaqdo,

¹¹ngoqg lvpiangam mwv tapia parp pa hoo ngoqg lamta mwlwngam kaadwn.’

¹²“Kaato, soq so no kvtaq ma. Ngo nam birwq tayin, hoggab Pwnbov nyia koam koi yaadwn.

¹³Hog gab pagoq doomab no mwam ceeko dvn, begamv, ‘Nyia koog gomcwr tulungam mwv akkam birwqram’?

¹⁴Hoggab Pwnbov gook akinb goodwn, hoo lwnyi gob goodwn, nyia kov ham cengma sujaqkam.

¹⁵Hwdlo nyia kov vc loodab yubngaq yin, hwdlo bulug yubk ho bulv yubyikam, yuma ho, aiyam nyiqry ak kaadwn,

¹⁶ho mwv nyia koog nyuru tulungam mvko dvn hoo bulam bos looda dvb beo-belaml dvn,

¹⁷ho nyia koam mwwg bon nyinam hoqgv wkur mvdwb mwv mvdwn hoo nyia ko hoqgv larnam mam mvpaqdvn;

¹⁸mwwg yvjam ung hoqgv mwv pvvkur dvn, lyoqr orioq hoqgv sita boam mwwg swwgv pvvkur dvn.

¹⁹“Nyia koam mwwg yubk ho vc cinam lvgab yolu ruqdwn hoo mwwg alo tulungam kwrl-xaal vc cidu mvdwn,

²⁰hoqgab mwwg swwca ho dvs dvdwb oyum dvn, hoo mwv kanol mwlwngam dvngam yaan dvsam kam dwnw maadwn.

²¹Mwwg gv vdinv kaaka sv dooma dvb yuupaq paku, hoo mwwg kaapa maanam alo tulungv xwqsiq-xwqmeq lengpa ku.

²²Mwwg yvjv ung bviywrho, hoo mwwg swwgam sigam boa bo dookub hvvnwq paku.

²³Hoqho mwwg gab ao gumtw ak doonyi loqkam, hoggv jvqtw dvn, nyia koam bibwq jidwb, lwwyw hoqgv ak, hvvky akwb nyid nvpv.

²⁴hoo mwam mwv aya mwwpa dvn, hoo bedo, ‘Ung urab idul doon boam mwam naalin dvn; ngo pvlyw nan ak kaapa paku;

²⁵mwwg gv vdinam yaapa hvb nyikur mvto; mwwg yaapa yikho ator tornam mam mwam torkur mvto’;

²⁶ho nyia kov Pwnboam swgw dvn, hoo mwam mwv loorwq dvn; mwwg nyuqm mam hwnyir-cojornam lvgab mwv kaadwn, hoo mwwg lootwngam nyia koam mwv jikur dvn.

²⁷Nyi tulu agaho mwv bemin bel bedwn: ‘Ngo nyic nyinum hoo hoggv jvqtwnum ham nyik-nyiyanum, hoo hoqg kwliam ngam jikur maanum.

²⁸Ngoqg yvjv ung urab idul doon boam mwv ngam pvlyw pakun, hoo ngoqg swwca lo hutongam kaatayin.’

²⁹“Kaato, soq mwlw sam Pwnbov nyido, lwnyi go, luum go nyia ko ak lvgab nyido,

³⁰mwwg yvjam ung hoqgv bookurl boolin dukub, ho swwgwg hutongam mwv huum dvb hvl nyidwn.

³¹Joba, ruucw kwrgab to, ngam tagabto; cooikab dooto, hoo ngo gootayin.

³²Ngam gomcwr birwq sv dood nyiloqkam no birwqto; gooto, hoggab ngo nam lootw do hvl binw do.

³³Hvb mabnyiloqkam, ngam tagabto; cooikab dooto, hoo ngo nam pumb rwnam mam tomswr tayin.”