Read Nyishi JOB 34 Bible Online

JOB 34 - Nyishi bible

JOB 34

¹Ho Elihu birwql hoo benum:

²Pumb rwnam nyi tulu nul, ngoqg gomcwr tulu sam tato, hoo hiyv cengn bov ngam ruucw kwrgab to;

³hoggab dvsam aiyv dvka nam hvb gomcwr tulungam nyurungv taka dvn.

⁴Hoggv kvtaq dvn, ngulv daalin tuj; hoggv aldvn ngulug pengko lo cengbam tuj.

⁵Hoggab Job benum, ‘Ngo kvtaq dvn, hoo Pwnbov ngoqg jvqtwngam naapaq paku;

⁶ngo jvqtw sukjaqkam ngam vm mvvnbo ak gob xipa ku; ngo nyic nyima sunum, hvbmabde ngoqg si mwp lakma.’

⁷Job hvb nyinbo nyi si hoggv, hiyv benyi-beyanam mam iss twwnam hvb twwdu dvn,

⁸hiyv almab nyinbo dvparho wmin gvdwn hoo nyic-nyiabo nyi lvgab wdwn?

⁹Hoggab mwv benum, ‘Mwv Pwnbo ho hempwl naanamv hoqhv nyi ak gab hog niqtuq dooma.’

¹⁰“Hoqgab cenglaqbo nyi tulu nul, ngam tato: mwv nyic-nyia nyima dvb Pwnbo hoqgv aado to, hoo mwv nyimur nyima dvb Pwnbo hoqgv aado to.

¹¹Hoggab nyia ko akv bon nyikjaqb mwv nyikur tayin, hoo mwwg nyik-wk jaqb mwam hoqham geql mvtayin.

¹²Jvqtw bo akam, Pwnbov nyic-nyiangam nyiram, hoo Pwnbov lootwngam nyik-nyiya ram.

¹³Hiyv mwam swcw nvg aoso gvmr-ator jinum, hoo hiyv gvda gvt bumpwngam mwwg aoho ap jinum?

¹⁴Mwwg hangam hoqho mwv mvl ap dvnyiloqkam hoo mwwg yalam la mwwg saqnam mam mwv atv nookum dvloqkam,

¹⁵gv vdin mwlwngv lvkin gob yuupaq tayin, hoo nyia kov diimwrb hookur dvn.

¹⁶“No cenglaq dvloqkam, sam tato; tagabto hoggv ngo bedwn.

¹⁷Lootwngam oyum bo akv pvvb bwwl doog tan yv? Hiyv jvqtw bvla atorboam no mwam haqpaq tan yv,

¹⁸hiyv lvpw at akam bedo, ‘Xima loodanam akv,’ hoo xinam nyi tulungam, ‘Nyic-nyiabo nyiingv hvl,’

¹⁹hiyv lvpw atwg ko tuup tulungam mwwsw-mwwpaq maab, ho nyet boam xitwl jwwgw boam ximab nyima dvn, hoggab bulv mwlwngv mwwg alaq hoqg bon nyinam maai yv?

²⁰Haqma paq galo bulv sixkalam; ai nywyw ra-ngam nyiilungv tvmdwrl hoo aadob wpaq dukun, hoo nyia ko alaq idaq maab atorboam aadob boog dukun.

²¹“Hoggab nyia ko akwg lamtangam mwwg vnyiqkv kaal doodwn, hoo mwwg dwqkab mwlwngam mwv kaadwn.

²²Almab nyinbo tulungv atv atam kvs ko hoglo jaqkam kan bvla kan twdwq dooma.

²³Hoggab Pwnbov nyi ak gab vigo aadob mwwdwb, ho Pwnbog agaho mwv pw-hwwk taab wdwb nyima.

²⁴Hwwi-hwwmil hwwka maab mwv atorboam vmwq yumgub mvdwn hoo nyi asaqkam bulug nyookho doom dvn.

²⁵Soq sib, bulug bon nyinam tulungam cengdwn, mwv hoq tulu ham aiyam mvpaqdvn, hoo bulam vmwq yumgub mvdwn.

²⁶Bulug nyic-nyia gab mwv bulam nyi mwlwg kaam dvb nyook gol jwwdwn,

²⁷hoggab bulv mwam wmin gvngo peel wxaq paku hoo mwwg lamtangam vcwr gokam modu kuma,

²⁸hoqgab jwwgw nyiin xabnam mam mwwg dookho ham dvb mvpa ku, hoo hentwr-kaasbo tulug xabnam mam mwv tapa do—

²⁹Hwdlo mwv cooikab dooikam, hiyv mwam haqpaq nyodwn? Hwdlo mwwg nyuqm mam kvs yin, hiyv mwam kaapa nyotan, hoqham nyob dvpar rvkam ho nyi ak jaqkam kaapa nyoram?—

³⁰hoqgab mwwjw maanbo nyiingv pvvb bwwl doog nyoram, hoqgab nyiilungam mwam pwd-poto gob hoqtu mvmabv.

³¹“Hoggab Pwnbon hiyv gon hvl ben mvi yv, ‘Ngo laqm baqpa ku; ngo lokta nyimur nyikram;

³²hoggv ngo kaapa maadwn ngam tomswr tvb; ngo nyixiaq pakloqkam, ngo lokta hoqham nyikram yv’?

³³Hoggab no hoqham haqpaq paku hvl, no hoggv nyipa kun hoqg nyijongam mwv nam jikur kuram yv? Hoggab no sam hoggub nyijaqkam daalin dvb nyido hoo ngo ma; hoqgab hoggv no cengdwn ham bibwqto.

³⁴Cenglaqbo nyiingv ngam betayin, hoo pumb rwnam nyiingv ngam betayin:

³⁵‘Job hog cengmab agam goodo; mwwg gomcwr tulungv hog niqtuq dooma.’

³⁶Job bitwr-benyangam beka nyiloqkam alpa, hoggab mwv nyic-nyia bo nyi hvb agam birwqdo.

³⁷Hoggab mwwg nyic nyinam lvgab mwv bidu-bel tamab vbw do; mwwg alaqkam ngulug pengko lo mwv cupup do hoo mwwg gomcwr tulungv naleqgo Pwnbon ceeko do.”