Read Nyishi JOB 36 Bible Online

JOB 36 - Nyishi bible

JOB 36

¹Hoo Elihu hvraqb benv hoo benum:

²“Ngoqg lvgab anyo go cwqmin gvto, hoo ngo nam kaakin tayin, hoggab ngo Pwnbog bidub hog bes ak dooxiq do.

³Ngo cenglaqkam aado hoqgv naatayin hoo jvqtw paqnam mam ngoqg Twrw-tvnboam paqtayin.

⁴Hoggab jvqtw jaqb ngoqg gomcwr tulungv xaalyo maadwn; pwbw jaqb cenglaqbov ngoqg lvgab doodo.

⁵“Kaato, Pwnbov ator dvn, hoo hiyam kam haqpaq maadwn; mwv ator jaqb cenglaq dvn.

⁶Mwv nyic-nyia boam swwdwb jima dvn, hvbmabde hentwr boam jvqtwngam jidwn.

⁷Lootw hoqgv mwwg vnyiqkam mwv nookur maadwn, hvbmabde lvpw at tulu pvlw ho doom dvb ho bulam nwrba xaqb paqm dvb mwv bulam doom dvn.

⁸Hoo bulam tag kartin baloqkam hoo hentwrg oso hoqtu baloqkam,

⁹ho mwv bulug bon nyinam mam hoo bulug nyic nyinam mam, ho bulug kwcwr-kvparl nyinam mam bulam bibwqdvn.

¹⁰Tomswrnam mam bulug nyuru ho mwv mvko jidwn hoo bulug nyixiaqnam hoqgv wkur mvdwb gaml jidwn.

¹¹Bulv tagabl hoo mwam bon nyij baloqkam, bulug swwnam aalv swwl-geel swwiyum tayin, hoo bulug swwnam vnywngv hemp jaqb swwtayin.

¹²Hvbmabde bulv tama baloqkam, hoo cengmab bulv lyoqr orioqb sipaq tayin.

¹³“Mwwjw maanbo hang uraho haaxaqnam mam hwrcw mvtayin; hwdlo mwv bulam raql apyin bulv svka gab xama dvn.

¹⁴Bulv yvc jardwn, hoo bulug swwnamv cuun-taan meqjo bo pengko ho twrd kun.

¹⁵Bulam hentwr-kaas hem layil mwv hentwr-kaas hoqgv naalin dvn hoo vs-axaq hoqgv bulug nyurungam tapa mvdwn.

¹⁶Vc-ai hoqgv kam mwv nam benyioq layil hogloq ho vc-ai dooma ko rooto bo nyook ho boolinum, hoo noqg tebol ho ox xupiab boam joopnum.

¹⁷“Hvbmabde no naleqgo nyic-nyiabo aoho pw rooxob hwwdo; pw-hwwnam mvla lootwngv nam naareq tayin.

¹⁸Hengab to hvbmab nyiloqkam kam jinyioqnamv nam bej-bepar mvdwn, hoo koijaqb swwnam-geenamv nam booxar kumab.

¹⁹Noqg hentwr-kaasam svka tvbwk hvl noqg xabnamv xabtur tai nvi yv, ho noqg ator mwlwngv tortur nyota yin yv?

²⁰Hwdlo nyiilungv bulug nyook hoqgv yuupaq yukun, Ai gab mwung maabv.

²¹Hengab to; nyixiaq koob tobkur maabv, hoggab hentwr-kaas jaqkam nam soq sam nyim dvb xuqpa kun.

²²Kaato, Pwnboam mwwg huqlwho yuupw dvn; mwwg hvb nyinbo tomswr bov hiyv doodwn?

²³Hiyv mwwg gab mwwg lamtangam xiqj pakun, ho hiyv bela dvn, ‘No nyimur nyipa ku hvl’?

²⁴“Mwwgabto, mwwg bon nyinam mam paqdwb, nyi kov bemin bepa ku.

²⁵Nyia ko mwlwngv hoqham kaagab paku; nyia kov hoqham aado hoqgv kaado.

²⁶Kaato, Pwnbov koidvn, hoo ngulv mwam cengla maadwn; mwwg vnywngam xil meepa lama dvn.

²⁷Mwv iss dinam tulu go cumrab dvn; hoq tulu ham mwwg nyodo pengko lo dixur mvdwn,

²⁸ho ham nyodo ao hoqgv tool mvdwn hoo nyia koog ao lo naleqgo dil mvdwn.

²⁹Doomwq wrpin-wranam tvlam, ho mwwg dook hoqgv doogum gumlinam mam cengn bo nyi ak dood yv?

³⁰Kaato, mwwg taiyam hutongam mwv bioqs-bioqtwr mvdwn hoo sa-svlog rwb tulungam tomlupl apdo.

³¹Hoggab soq tulu lvgab mwv nyiilungam pw-hwwdwn; ho naleqgo dvsam mwv jidwn.

³²Mwwg alaq lvgab taiyam bioqnam mam tomlup do hoo muxnam mam jwwm dvb hoqham gaml jidwn

³³Doogum-taiyam bioqnamv mwwg doobanam mam bibwq do; svb-svvngv mwwg daqrabnam mam bibwq do.