Read Nyishi JOB 37 Bible Online

JOB 37 - Nyishi bible

JOB 37

¹“Soq so kam ngoqg hangv tvmdwr do hoo hoq nyook hoqgv juqlin do.

²Mwwg doogum yalam tal dooky to hoo mwwg agam hoqgv dugum gumlinamv lengdo.

³Nyodo nvg niikum lo mwv hoqham wyiq mvdo, hoo swcw nvg ywwtwrnam gob mwwg taiyam bioqyiq mvdo.

⁴Hoqham nyixo kokwngam mwwg yalv dugum do; mwwg ator yuunam yal lvgab mwv doogum gumdo, hoo hwdlo mwwg yalam tapa yin, mwv taiyam bioqnam mam bioqmab nyima do,

⁵Mwwg yal lvgab Pwnbov swrdorxeq jaqb doogum gum do; ngulv mwwc lama dvb mwv koijaqn bo bon tulungam nyido.

⁶Hoggab tapam mam mwv bedo, ‘Swcw nvg aoho yoqp to,’ hoqhvb kalam tool do, mwv atorv tool do.

⁷Nyiicwr-cwrxig alaqkam mwv morx tupa, mwwg pwnum nyia ko mwlwngv hoqham cengkam dvb.

⁸Ho svdin tulungv bulug doonu ko urab wdo, hoo bulug lwwpwqho doonu do.

⁹Hoqg pwqlwho cwkeq-lvmeq dooiyv haado, hoo swkwrbo dooiyv yabsaq do.

¹⁰Pwnbog saqnamv tapam pvmcwram jido, hoo pobu hotbov nyebia jaqb tapamb nyido.

¹¹Jwwkam bo doomwqkam mwv gums lvgab vgw mvdo; ho doomwq toloqkv mwwg taiyam mam bioqs-bioqtwr mvdo.

¹²Swwl doola deek gvda gvtwg aoso bulam gaml jinam mam niqtuq nyilin dvb, hoq tuluhv mwwg bekjaqb nyikur-nyikurl nyido.

¹³Bedar-nyidar dvb jaqkam ho mwwg gvda gab jaqkam ho aby gab jaqkam, mwv hoqham nyim dvb jido.

¹⁴“Joba, soq sam tato; ho romo gvdwl hoo Pwnbog swrdorxeqb bon nyinam tulungam mwwka to.

¹⁵Hog gab Pwnbov mwwg gamlam bulug aoho pvvdwn hoo mwwg doomwq hoqgv taiyam bioqlinl huto huum dvb jinam ham no cengd nvi yv?

¹⁶Doomwqkam doa ao tol jaakar yvm dvb, ho mwwg pwbw jaqb cenglaq layil swrdorxeq bon nyinam tulungam no cengd nvi yv,

¹⁷hwdlo nyooko dooiyv yigam gab swcwngv jim susu tvl dooikam hoggub noqg vjv og dvn?

¹⁸No mwwg hvb cwwnyiaq-doonyiaq piuaram lwwp nyota yin yv, ator tvl kwlwq-kvlaqbo yoqdwr hvb mvnyi tan yv?

¹⁹Ngulam tomswr tvb hoggv ngulv mwam beyin dvn; ho kan twdwq ko-gab ngulv ngulug bvrwqkam belin nyoma.

²⁰Ngo mwam betam yin yv ngo beta yin hvl yv? Nyi akv mwam dvmeq kudwb mwv mwwby dvn yv?

²¹“Hoo sija hwdlo cwwnyiaq-doonyiaq lo huto malo yin ho hwdlo dooiyv ywpeql hoo bulam dvrwq dvb nwwxaq yin, hoqham hutongam nyi akkam kaama dvn.

²²Nyoodum daiya hoqgv hun hvb kangam bo doolwngv lwwlin do; ho Pwnbov swrdorxeq yuunam vj lvgab koom do.

²³Pwnbon—ngulv mwam kaapa nyoma do; mwv huqlwho atordvn; lootwngam hoo naleqgo nyedarnam mam mwv nyimab nyiram.

²⁴Hoqgab nyia kov mwam bosdo; hiyv bulug atwg mwwnam ho pumb rwdwn mwv ham akjijaq gokam xima dvn.”