Read Nyishi JOB 38 Bible Online

JOB 38 - Nyishi bible

JOB 38

¹Ho At Sw Jobnvn cwkeq-lvmeq dooi hoqgv birwql hoo benum:

²“Hog cengmab hiyv kan ura hoqgv tomswr-honyil gomcwr tulungam goodwn?

³Nyi ak hog nyidwb vj koonam hvb kooto; ngo nam tox tayin, hoo no hoqham ngam cengm dvb mvtayin.

⁴“Ngo swcw gwwl sam mvlin yikho no hogloq ho doonum? No sam cengp nyiloqkam, ngam betam to.

⁵Hiyv hoqham xika dvb mwwr pakun—jvqtw jaqb no ham cengdo! Ho hoq aoho pujinl bwqn bov yv?

⁶Hoq gwwl ham hoggv ywrgw napan, ho hoqg cuukiq wlw tulu ham hiyv diipnum,

⁷hwdlo ar komcig takar tulungv lvkin gob bemin yin hoo Pwnbog ko tuup tulungv hemp gab sogoqnum?

⁸“Ho hwdlo sa-svlog mamb hoqgv buqpor yin ho hoq viyap tulungam hiyv ciqtum ladwn,

⁹hwdlo ngo doomwqkam hoqg vj gob mvnum hoo kan twdwq boam hoqham puucw nan gob mvnum,

¹⁰hoo hoqham ywwtwr mvdwb xiqrnum hoo lyvxar lvgab viyap tulungam xwrtumnum,

¹¹hoo benum, ‘So namgub no hengto, hoo hengbo maabv, hoo noqg larnam suduq tulungam duqngin mvta yukun’?

¹²“Noqg aal tulungam nyirab dvb no ara gaml jid nvi yv, hoo arkomc mikangam hoqg nyookam cengm dvb mvd nvi yv,

¹³hoqham swcw nvg ywwtwr namgub nootul ap pan yv, hoo hoq hoqgv nyic-nyia boam hwqdinl hwqpaq pan yv?

¹⁴Hoqhv deekam mam kulub yukam kwlynam hvb nyidwn, hoo hoqg nyij-mujv vj kootwl daqlinam hvb nyidwn.

¹⁵Bulug hutongam nyic-nyiabo hoqgv parl apnum, hoo bulug irabo laqpongam xitwrnum.

¹⁶“Sa-svlog subuq buqlinko urab no haan mvi yv, ho sa-svlog urag dootwr bolo wka namyv?

¹⁷Sigwg toggoq tulungam nam bekin pai yv ho kan twdwqko ura toggoq tulungam no kaan mvi yv?

¹⁸Swcw nvg ywwtwram no cingyum namyv? No soq mwlw sam cengd nyiloqkam, bibwqto.

¹⁹“Hogloq ho huto doogw ko lamtangv, hoo hogloq ho kan twdwq ko nyookv,

²⁰ho hoq dwrbu-dwryangam no naakam yin pv hoo no hoqg nam lamta wkam cengkam yin pv?

²¹No cengdo, hoggab nam dwrbuqnum, hoo noqg swwl dooknam aalv koijaq do!

²²“Tapamg noosu tulu urab no haaka namyv, ho nyodo taag noosu tulungam kaaka namyv,

²³ngo ham vs-axaq mood gab, ho mviyaq minsil nyob panam aal gab pvvcuml ap pakun?

²⁴Hutongam hogloqkv jilin dvn hoqg nyook lamtangv hoglo, ho dou-cagag dooiyv swcw nvg aoso hogloqkv yis-yitwr dvn?

²⁵“Hiyv sibiq-raceqb nyodo holnam mam silam boqj dvn hoo doogum korlw gab lamta mwjdvn,

²⁶nyi dooma ko gvdaho nyodongam hom dvn, diixa-rara aoho hogloq ho nyi dooma dvn,

²⁷dooxa bvla haqpaqnam gvdangam xumt mvdwn, hoo deela hoqgv hiyv nwmw-nwsinam buqlin mvdwn?

²⁸“Nyodongv ab ak dood nvi yv, ho gums dinam tulungam tumanam gob nyid nvi yv?

²⁹Tapam yaql bo si hiyvg mamb hoqgv lengdwn, hoo doa ao tol hiyv tapa jiqm dvb dwrbuqpa kun?

³⁰Issiv wlw hvb ator dvn, hoo iss uraho tapam pamcwrb nyinum.

³¹“No Kartaq dimbiongam tag korcup tan yv ho Karda beqnyiangam toosuq nyota yin yv?

³²No takar Nyomio toonam mam bulug nyid moodam nyig layin dvn yv, ho no Korlum pumbum mam la hoqg ko tulungam wg layin dvn yv?

³³Doa aongam pvvb bwwl doognam no cengd nvi yv? Bulug pvvbam swcw aoso no mvl ap yin yv?

³⁴“Ho diidwr iss tulu ak nam tolup mvdwb, noqg yalam no doomwq tulu tol goqc laiyin dvi yv?

³⁵No taiyam bioqnam mam kanam nyotayin yv, ho bulv wlayil, hoo nam begamv, ‘Ngulv si’?

³⁶Hiyv hvvjw-hara ura lo pumb rwlwq dvn ho cenglaqkam puqnyiam jidwn?

³⁷Pumb rwnam hoqgv hiyv doomwqkam xika dvn? Ho hiyv doa aog iss uppum mam pulup nyotayin,

³⁸hwdlo diimwrv lvkin gob juukum yin hoo hv ked cuqju hvb ator dvn?

³⁹“No sony nyot gab nyora gaql dvs mingj dvn yv, ho sony nyot nyopag tulug kanonam mam xumt mvd nvi yv,

⁴⁰hwdlo bulv bulug lwwpwqho tooiyal dooikam ho bulv puumho tooiya yaal dooikam?

⁴¹Hwdlo hoqg poaq kov Pwnbog svka gab sogoq yin, hoo dvs doomab jarkarl yvikam, hiyv poaqkam dvs jidwn?