Read Nyishi JOB 39 Bible Online

JOB 39 - Nyishi bible

JOB 39

¹“No cengd nvi yv hwdlo puutug sijiq tulungv ko bwwdwn? Sudum ko bwwnam mam no kaad nvi yv?

²Bulv hog hwd pool go baqdwn ham no xila yin yv, hoo bulv hwd moodam ko bwwdwn ham no cengd nvi yv,

³hwdlo bulv gubal bulug koam bwwlin dvn, hoo bulug ko anyongam bwwlin dvn?

⁴Bulug ko anyongv ator dukun; bulv nyoro ho swwrab dukun; bulv asaqb wdkun hoo bulug dookub hookur kuma dvn.

⁵“Hiyv nyoro svdam mam topaq tvl gaql yvm dvn? Dooi-taiyam hvb xarn bo svdam mam hiyv poqsul toxanum,

⁶hiyam ngo mwwg nam doogwb pwtw bo lywpangam hoo kwcwqbo gvdangam mwwg doogw nyookub jipa kun?

⁷Mwv hur-matabo bopam mam xima dukun; ho yeqbeql wnbo sogoqnam mam mwv tama dvn.

⁸Mwv puutu tulungam mwwg svdin nwmw dukum koob mvdwn, hoo jeenbo pagoq goqxy kokwb mwv meegaq dvn.

⁹“Nyoro talinv nam bon nyij dvb mwwd yv? Noqg rwwkumko ho mwv aiyam dooiyin dvi yv?

¹⁰No mwam oso lvgab hoqtu tvl paagar mvm yin yv, ho mwv noqg kokwb lywpa ho rongo haqn bob nyiyin dvi yv?

¹¹Mwwg koiyib ator ko-gab no mwwg aoho hingw bvi yv, hoo mwam bon nyim dvb no apaq bvi yv?

¹²Mwv noqg am dookub hookur tayin hvl no mwwjw dvn yv hoo hoqham noqg jurpy deela ho boqkum yin yv?

¹³“Mwra-kiigangv larl alapam labyin-labrab do, hvbmabde bulug vm-alab rooxo tvl labdinam hv aby gab nyid nvi yv?

¹⁴Hoggab mwnwg pwpam mwn swcw so pwpdvn hoo hoq tulu ham ked hoqgv og mvdwn,

¹⁵hoq tulu ham lvpiangv ceepiq yin pv hvl hoo nyorog svdinv hoq tulu ham samjab yin hvl mwwpa maab nyidwn.

¹⁶Bulam mwnwg ko maanam hvb mwn atwg ko anyongam aya maab nyidwn; mwnwg bon nyijongv niqtuq lengmab nyita sunum, hvbsujaqkam mwn bos maad kun,

¹⁷hoggab Pwnbov mwnwn mwwpa maadwb pumb rwpa kun hoo mwnwn cenglaqkam jima pakun.

¹⁸Hwdlo mwn atv daqrabl jarab suikam, mwn svpuram la mwwg aoho xarg boam nyirj dvn.

¹⁹“Svpuram no ator jid nvi yv? No mwwg lwwpo vm mam vj koom dvn yv?

²⁰Takam poqnam hvb mwam no poqm dvb mvd mvi yv? Mwwg luusaqb sogoqnamv bos looda dvb nyido.

²¹Mwv lywpa ho samp dvn hoo mwwg atorho yuudwn; ho nwwxo uppuq laqm mam baqtab mwv lvvgwb lengdwn.

²²Mwv bosnam mam nyirj dvn hoo mwwdwql bos maadwn; ho lyoqr orioq hoqgv mwv kikur maadwn.

²³Mwwg aoho baqnam nwly nwwxo hoo uppuqkv kwlwq-kvlaq dvb bioqlin do.

²⁴Mwv vc loodab cumdin-cumrin hoo xvvtwr-xaapwrl deelab juqdo; ho tuuly miqnam yalam mwv tal daqnyi maadwn.

²⁵Hwdlo tuuly yalam tapa yin, mwv bedo, ‘Aha!’ Kepten tulug sogoqnam mam la goqrnam mam, mwv aado hoqgv nyob panam mam suupa do.

²⁶“Mwiya-tadangv noqg cenglaq hoqgv yv ao tol jaal yvdwn hoo mwwg alapam nyooko daiyab lvbjin tvl jaadwn?

²⁷Noqg gaml jinam hoqgv xookamv puutu aob jaaca dvn hoo mwwg osupam hoq aoho supdvn?

²⁸Wlw ho mwwg doogwngam la nammam, ho wlw lwwraq aoho mwwg cwwgwngam mwv mvdwn.

²⁹Hoq hoqgv mwv mvqky-maqlam mvl nyora gaqdwn; ho mwwg vnyiqkv aado kiyo hoqgab kaapa dvn.

³⁰Mwwg ko anyongv uiyam biul twwdwn, hoo hogloq ho mengp pan, hoqho mwv doodwn.”