Read Nyishi JOB 4 Bible Online

JOB 4 - Nyishi bible

JOB 4

¹Ho Teman nyi Elipaj agam birwql hoo benum:

²“Noq lvgab nyi ak agam gamg goob nyiloqkam, no cwqnyi tan yv? Hvbsujaqkam hiyv agam goomab doola tan?

³Kaato, naleqgo no tomswr paku, hoo laanyi maanbo alaqkam no ator jipa ku.

⁴Noqg gomcwr tulungv dwqtup boam haakam dvb mvpa ku, hoo laanyi maanbo lwbwngam ator dvb mvpa ku.

⁵Hvbmabde sija hoqhv nam haapa ku, hoo no cwqnyi kuma; hoqhv nam idaq paku, hoo no mooka-saq duku.

⁶Noqg haakamnamv noqg Pwnboam bosnam hooma yv, hoo noqg lootwngv noqg mwwgwnam lamta tulu maai yv?

⁷“Mwwgabto: hiyv nyi nyiinyongv yuupaq bov doodwn? Ho maalo hogloq hooxeq nyiidar boam mvpaqnamv doodwn?

⁸Ngo kaanam si, hiyv nyixiaqkam tuqdwn hoo vs-axaqkam vly liidwn luukinam vly naadwn.

⁹Pwnbog miqnam hoqgv bulv yuupaq dvn, hoo mwwg haaxaq xaqpurnamv bulam dvmeq dvn.

¹⁰Sony nyotv dugum dvn, sony nyot dugumnamv bos tapa dvn, sony nyot nyopag exiam mwtwrnum.

¹¹Ator bo sony nyotv cexwl dvs kaapa maab sidwn, hoo sony nyot nyem ko tulungv cwrsaq-twqb nyidwn.

¹²“Sija gomcwr ak ngoqg dookub cooikab baqanum; ngoqg nyuru lo ham jebs dvb tapanum.

¹³Hwdlo nyiam yumiv meetab-miimiq yin, aiyam hendar maab nyiqry kaanam hvb nyidwn,

¹⁴ngam vc loodab bosnamv haanum, hoo ngo tvmdwrnum, hoqhv ngoqg gv alo mwlwngam tvmdwr hwqmnum.

¹⁵Yal ak ngoqg nyuqm mam bioqdaqnum; ho ngoqg gv vding vmv piwr jwr-jwrl daqrabnum.

¹⁶Hoqhv hvb daqdunum, hvbmabde hoq daqlinbo ham ngo kaadar lamanum. Ngoqg vnyiq kaagaho hog ak doonum; hoo hoqho cooikab doonum, ho ngo yal ak tapanum:

¹⁷‘Nyia kov Pwnbog agaho nyiidar dvn yv? Mwwg Pwnbo agaho nyia kov loodwr dvn yv?

¹⁸Mwwg nyera tulungam mwv mwwjw maadwn, hoo mwwg gumtw tulu hoqgv mwv nyimuram kaapa dvn;

¹⁹hvbnyiloqkam ked namho doon bov, ho hiyvg gwwlv diimwr hoqgv mvnamv, ho hiyam pwswram caajabnam hvb mvnamv hog hwdgo mwwg agaho kac sud yv.

²⁰Ar gvla ariyumg pengko ho bulam vmwq yumgub mvnum; bulam nyi akkam xikmab bulv nwrba gob yuupaq dukun.

²¹Bulug tombu rwwgwnan osongam bulug pengko hoqgv pusuq maad nvi yv, hoo pumb rwcmab, hoo bulv sima dvn yv?’