Read Nyishi JOB 41 Bible Online

JOB 41 - Nyishi bible

JOB 41

¹“No Dooji-buram vkar hoqgv twqlin bvi yv ho mwwg lyolam oso lvgab twqtu bvi yv?

²No mwwg nyupumho oso tulwq bvi yv ho mwwg coqpiangam vkar hvqlwq bvi yv?

³Mwv nam naleqgo modul betayin yv? Mwv nam nyum-nyumbo gomcwr tulungam gootayin yv?

⁴Mwv noqg nyerab nwrba gob swwdwn mwv nam birnam pvvb ak mvtayin yv?

⁵Pvta lvgab soonam hvb mwwg lvgab no sootayin yv, ho noqg nyem ko tulu gab mwam no tona ak hiqlwq jib yv?

⁶Kwm-kor mvnbo tulungv mwwg aoho kor paqmin sub yv? Kwm-kor mvnbo tulug pengko ho bulv mwam mvpin-mvra bvi yv?

⁷Mwwg vpinam no morto tulu lvgab diixaq bvi yv ho mwwg dumpongam ngui cinnan nwwxo lvgab cilwq bvi yv?

⁸Noqg alaqkam mwwg aoho idaqto; nyob panam mam mwwpa to—no ham lokta nyitin kuram!

⁹Kaato, nyia kog mwwgwnamv mwwsam dvn; mwam kaapa ko hoojaqkam mwv akob tvl dukun.

¹⁰Mwv haakam mwam muu dvb nyi akkam kwr-korbo dooma. Hvbnyiloqkam hiyv mwwg agaho daqnyi tayin?

¹¹Ngo mwam jikur dvb nyidwn, hiyv ngam otuqcob jipa kun? Hoggv xeq doa nvg niikum so doodwn hv ngoqgv.

¹²“Mwwg lvpia pagoqkam, ho mwwg koijaqb atornam mam, ho mwwg gv bumbanam mam, ngo cooikab doola ram.

¹³Mwwg ao vjam hiyv twqbin nyotayin? Mwwg ogumb hiyv xipwq nannam bval haala tayin?

¹⁴Hiyv mwwg nyuqm viyap tulungam ciqko nyotayin? Mwwg exiv bos jaqdvb gwryum do.

¹⁵Mwwg langkam svtamv gar-gargwb tamp pakun, hoqham morx lvgab jumtw-kwlw dvb tubtum pakun.

¹⁶Akwn hv akwn ham kaqtin kvlin do ho hoq tulu pengkob dooiyv yipeq nyoram.

¹⁷Hoq tuluhv akwg hoqgv akwn ho guusiq-guumeqdo; hoq tuluhv akwn-akwn kvqsiq-kaqmeq do hoo ham mvpin-mvra nyoma dvn.

¹⁸Mwwg kvj jinamv hutob bioqlin do, mwwg vnyiqkv dou-pu ngv nyiqbar hvb nyido.

¹⁹Mwwg agam hoqgv moiliv bioqlin do; wm mwjwrv jarlin do.

²⁰Pwcw xudu bo hvb la nwmw wm gudunam hvb mwwg nyupum hoqgv mwkv juulin dvn.

²¹Mwwg saqnamv meram gugab do, hoo mwwg agam hoqgv moiliv bioqlin do.

²²Mwwg lwwpo ho atorv dooba do, hoo bosiv mwwg agaho noso soodo.

²³Mwwg aiyaqkv lvkin gob yoqlum-yoqlumb kabgab do, mwwg aoho vdw dvb la biima dvb jilwq paku.

²⁴Mwwg hangv wlw hvb alar do, miiriq lwpia niikumg alar hvb nyido.

²⁵Hwdlo mwv atv daqrab yin atorbo mwlwngv bosdo; vmwq yumgub mvikam bulv atv daqyi sudo.

²⁶Lyoqr orioqkv mwam pas jaqkam, hoqhv un pag maado, ho nwwxo ngvkam, morto ngvkam, ho nwwbu ngvkam hog mvteq ma.

²⁷Yoqdwram am piil gob mwv xido, hoo tamangam svvya svvpo gob.

²⁸Uppuqkv mwam ablam nyoma; mwwg gab swwxw-lvqmin wlw tulungv amp gob nyikub do.

²⁹Dvvp tulungam am piil gob xido; nwwxo dunam mam mwv nyirj do.

³⁰Mwwg hvvjw-harangv pwcw gamb hvreqbo hvb nyido; mwv atv suiyu ho jurpy piucw piup pan hvb gel kardo.

³¹Mwv sa-svlo urangam pwcw iss xuca bo hvb mvdo; ho sa-svlongam kuty pwcw xuca bo hvb mwv mvdo.

³²Mwwg langk ho mwv kwlwq-kvlaqbo suiyungam apaq do; sa-svlo urangam xupiq rooxo dvb mvdo.

³³Swcw nvg aoso mwwg hvb nyinbo dooma, nywywngam bos maadwb pwnam akv.

³⁴Aobo hoolu luuxiam mwv kaado; larn bo ko tuup tulug aoho mwv lvpw at gob nyido.”