Read Nyishi JOB 42 Bible Online

JOB 42 - Nyishi bible

JOB 42

¹Ho Job At Swn birwql hoo benum:

²“Ngo cengdo no hog mwlwngam nyila dvn, hoo noqg nyidwb mwwnamv hwdlo kam kvxaq maadwn.

³‘Hog cengmab hiyv tomswr-honynam mam kvs dvn?’ Hoqgab ngo cengma nam mam ngo goolin tuku, hoqhv ngoqgab koi jaqb swrdorxeq pagoq go, hoqham ngo cengmanum.

⁴‘Tato, hoo ngo gootayin; ngo nam tox tayin, hoo hoqham no ngam cengm dvb mvto.’

⁵Ngoq nyuru hoqgv ngo noqg pagoqkam tapa tukun, hvbmabde sija ngoqg vnyiqkv nam kaapa paku;

⁶hoqgab ngo atv oyuml hvnyw sudo, hoo diimwram la mubam taaiyaql mwwkur dukun.”

⁷At Sw Jobnvn soq gomcwr tulu sam bexo kokw so, At Sw Teman nyi Elipajnvn benum: “Nam la noqg ajin vnyiam ngo ceekol haaxaqnamv bioqdo, hoggab ngoqg nyera Jobwg hvb no ngoqg jvqtwngam gookma.

⁸Hoqgab sija hvvb loq kvn go hoo yaap tvmwr loq kvn go hoo ngoqg nyera Jobwg dookub wno hoo no atv boyuqnam aky lo ak jita. Hoo ngoqg nyera Job noqgab swgw jitayin, hoggab mwwg swgwnam mam ngo loorwq tayin ho noqg paca hvb nyinam ham ngo nyirwq ram. Hoggab ngoqg nyera Jobwg hvb, no ngoqg jvqtwngam gookma.”

⁹Hoqgab Teman nyi Elipaj hoo Suh nyi Bildad hoo Naama nyi Jopar wnum hoo At Sw bulam hoggv benum ham nyinum, hoo At Sw Jobwg swgwnam mam loorwqnum.

¹⁰Hoo At Sw Jobnvn nvtaqnam tulungam jikur kunam, hwdlo mwwg ajin tulu gab mwv swgw yukun. Hoo At Sw Jobnvn mwwg otuq doonam ham lwnyi yaago laaleq dvb jiknum.

¹¹Ho mwam otuqho cengn bo mwlwngv, mwwg vbw-borv hoo any-bwrmv mwwg dookub haanum, hoo mwwg nam ho mwwg lvgab dvs dvnum. Hoo bulv mwam anyangam kaakinum hoo At Sw mwwg aoho almanbo mwlw nyiknam ham mwam bet-belanum. Hoo bul mwlwngv mwam twngkv la hun lvqcv jiknum.

¹²Hoo mwwg swwrab yikho swwnam mam koi yaab At Sw kokw so Jobnvn lvqc ciknum. Mwam sviyangv 14,000 go, svjinv 6,000 go, hal beenbo hvvbv 1,000 go, hoo svdam damnv 1,000 go jiknum.

¹³Mwv ko tuup kvn go hoo nyem ko oum gokam dooknum.

¹⁴Hoo mwv otuq nyem ko ham Jemima hvl eminum, hoo vnyi deen ham Kejiya hvl eminum, hoo oum deen ham Keren-happuk hvl eminum.

¹⁵Hoo gvda mwlw ho Jobwg nyem ko tulug kangam namhvb kangam bo nyem akkam doomanum. Hoo bulug abv bulug vbw-bor tulu lvgab otungam bulam jinum.

¹⁶Hoo soq kokwb Job vnyw 140 go swwl doonum, hoo mwwg ko tuup tulungam la mwwg ko tuup tulug ko hosiq tulungam hotam vpy go kaaknum.

¹⁷Hoo Job swwtv kvlv, hoo dumpo-xiima peekul siknum.