Read Nyishi JOB 5 Bible Online

JOB 5 - Nyishi bible

JOB 5

¹“Sija goqto; nam birwqbo nyi dood yv? Hoggoq dvrwqbo akwg dookub no wtayin?

²Hoggub nyijaqkam oluq-alaqnamv pacangam mengdwn, hoo kaaneqnamv svswqb swwn boam tvlw mengdwn.

³Paca bov mvmiangam naadwb ngo kaapa paku, hvbmabde haqmapaq galo ngo mwwg doogwngam beenum.

⁴Mwwg ko huriv cumciq dook hoqgv aado paku; toggoqho bulam vmwq yumgub mvpa ku, hoo bulam nyi akkam naalin bo dooma.

⁵Kano bov mwwg vly-axeqkam dvdwn, hoo taa-haageq hoqgam kam mwv naalin dvn, hoo mwv gumn kokwb hvngwr ngwrdo.

⁶Hoggab hentwr-kaasv diimwr hoqgv haama dvn, no vs-axaqkv deela hoqgv buqrab maadwn,

⁷hvbmabde wm mwjwrv odumb jwrlinam hvb nyia kov hentwr hendwb dwrbuqnum.

⁸“Ngoqgab nyiloqkam, ngo Pwnboam meegaq dvn, hoo ngoqg pagoqkam ngo Pwnbon gvqlwq dvn,

⁹hiyv koi jaqb la mwwc lamanam dvb, ho xila maadwb swrdorxeq bonam nyidwn:

¹⁰mwv swcw so nyodongam jidwn hoo rongo rwqtaqkam iss kanam jidwn;

¹¹yanboam mwv aob mvca dvn, hoo nyix-riin boam hwnyir-hvmar dvb mvdwn.

¹²Gwwlywb nyidwb mwonam mam mwv mooma-sasa dvb mvdwn, hoqgab bulug alaq nyinamv niqtuq nyilin maadwn.

¹³Jwqlaq-bulaq boam bulug jwqlaq-bulaqho mwv nootu dvn, hoo gwwlywb nyitanam mam nyebia jaqb mvgeq lodwn.

¹⁴Aal moodam bulv kan twdwqkam kaapa dvn hoo aal lvpangam ai kan hvb hengpa dvn.

¹⁵Hvbmabde pwwma-cima boam bulug agam hoqgv hoo atorbo alaq hoqgv mwv ywwlin dvn.

¹⁶Hoqgab jwwgw bov mwwgw doodwn, hoo jvqtw maanbov mwnwg agam mam kuqtum dvn.

¹⁷“Kaato, hiyam Pwnbov gwrpan hv xinam jaqkv; hoqgab Pwnbog gwrnam mam oyuml haqpaq maabv.

¹⁸Hoggab mwv un mvgdvn, hvbmabde mwv un puudwn; mwv vmwq-yumgub mvdwn, hvbmabde mwwg alaqkv mwp dvn.

¹⁹Nam vs-axaq ax hoqgv mwv naalin tayin; kvn deen alman bov nam idaqram.

²⁰Dwr-kano yin nam sig hoqgv, hoo nyob pak lyoqr orioq niqtuq hoqgv mwv nam ywwlin tayin.

²¹Bec-beya benam lyol hoqgv nam kvsil aptayin, hoo hwdlo ocu-aiya dv moodv haaikam ham no bosram.

²²Ocu-aiyanamv la dwr-kano moodam no nyirmin tayin, hoo swcwg svdin tulungam no bosram.

²³Hoggab noqg rongo ho wlw pwgkam guusiq-guumeq tvl doomram, hoo nyorog svdin tulungv noqg lvgab swrso tvl dootayin.

²⁴Noqg tombu ho swrso doodwn hvl no cengtayin, hoo hwdlo noqg tuun-meengam no kaaikam dorg kam nyiinam kaaparam.

²⁵Noqg ko hosiqkv naleqgo mvqlwnam mam no cengtayin, hoo noqg hosiqkv swcw nvg nwmw-nwsin hvb nyitayin.

²⁶Am vmlywngam vly nvvd namgub daqnam hvb, no dumpu-xiima tvl noqg nyubwb haatayin.

²⁷Kaato, soq sam ngulv meelin pakun; soq si jvqtwngv. Tato, hoo noqg al ko-gab sam cengto.”