Read Nyishi JOB 7 Bible Online

JOB 7 - Nyishi bible

JOB 7

¹“Nyia kov swcw nvg aoso hentwr bon nyima dvn yv, hoo mwwg swwca aalv ree goqnam aal hvb nyima dvn yv?

²Raasur akv doonyium mam mwungnam hvb, hoo ree-ngv mwwg laqjongam naadwb kaayanam hvb nyido,

³hoqgab ngam pool bvrpw gob asarb doom paku, hoo aiyam mwwdwq-saqknamv ngam jibwq paku.

⁴Hwdlo ngo karra yin ngo bedo, ‘Hwdlo yu ngo gorab tayin?’ Hvbmabde aiyv yubso do, hoo ar dooko koar-komar namgub ngo giqkub-geqxeql giqdu dvn.

⁵Ngoqg gv aiyaqkam topum mvla kace pwwlup paku; ngoqg vpinv ator kwxwqdo, ho leelaq busurb buqc do.

⁶Ngoqg aalv tapo leqnam hvb nyebia jaqb wdo hoo mwwgw doomab hoq tuluhv wnya duku.

⁷“Mwwgabto ngoqg swwcangv svqyi-saqcanamv twq; ngoqg vnyiqkv nywywngam alboam lokta kaapa kuram.

⁸Hiyv ngam kaanbo vnyiqkv ngam lokkam kaapa kuram; noqg vnyiqkv ngam koodu dooikam, ngo wleq tai kun.

⁹Doomwqkv juupaql hoo niinam hvb, hiyv Sux-ywlwb ipoq kunbov cookur kuma dvn;

¹⁰mwwg nammwb mwv hookur kuma dvn, ho mwwg nyookv mwam cengk maadwn.

¹¹“Hoqgab ngo agam goomab dooram; ngoqg mwwdwqnam yal hoqgv ngo gootayin; ngoqg kacaq bviyaqbo yvj hoqgv ngo sortayin.

¹²Ngo sa-svlo ngvi yv, ho maalo sa-svlog doojw-burv yv, no ngoqg ao so rvkil doodwn?

¹³Hwdlo ngo beikam, ‘Ngoqg kartam nanv ngam karngam dvb mvdo, ngoqg kartamv ngoqg sornam mam doonu mvtayin,’

¹⁴ho no ngam yuma hoqgv bos mvdo hoo nyiqry kaanam hoqgv ngam bos soma vrram somdo,

¹⁵hoqgab ngo swwgam apaq tvl hoo hiqswr kud bvla sinam yaangam xuqpa kun.

¹⁶Ngoqg swwgam ngo oyum dvn; nwrba gob ngo swwl dooram. Hoggab ngoqg aalv svqyi-saqcanamv twq, ngam vpwb apaq tvb.

¹⁷Nyiv hoggv, ho mwam no naleq dvb mvp paku, hoo noqg hangam mwwg aoho mwwp pakun,

¹⁸ar roxiam mwam haal kaato hoo mood vxiam mwam pooka dvn yv?

¹⁹Ngoq galoqkv no hwdlo aado tayin, ho ngam tacor gokam meqmo maadwb ngam vpwb apaq maado?

²⁰Ngo nyic nyibaloqkam, nyia koam rvky yaanbo, nam ngo hoggv nyipa? Hoggub ngam noqg tuugab namgub mvpa kun? Hoggub ngo noqg vgw gob nyipa kun?

²¹Hoggub no ngoqg nyicam apaq maadwn hoo ngoqg nyixiaqkam naapaq maadwn? Hoggab sija ngo swcw uraho kartayin; no ngam meegaq tayin, hvbmabde ngo dook ram.”