Read Nyishi JOB 8 Bible Online

JOB 8 - Nyishi bible

JOB 8

¹Ho Suag Bildad birwqnv hoo benum:

²“No hog hwdgo so pagoq tulu sam betayin, hoo noqg agam gomcwr tulungv koibo dooi ak hvb nyiram yv?

³Pwnbov jvqtwngam muk-mviya dvn yv? Ho maalo Mwlwngam koi yaan bov kvtaq boam muk-mviya dvn yv?

⁴Noqg ko huriv mwam ceekol nyic nyipaloqkam, bulug nyic nyikho bulam mwv jilwq pakun.

⁵No Pwnboam meegaq baloqkam hoo Mwlwngam koi yaan boam aya mwwpa kodwb xab nyiloqkam,

⁶no loodwr gvi hoo nyiidar baloqkam, hoggub nyijaqkam mwv atv noqgab gorab tayin hoo jvqtw jaqb noqg doogwngam jikur tayin.

⁷Hoo noqg nyirabnamv anyo sujaqkam, noqg kokw aalv vcjaqb koi tayin.

⁸“Hoggab kolwg wkbo vnyw tulungam anya mwwpa gvdwl yeqka to, hoo hoggv ab tulungv meelin kunam ham mwwka to.

⁹Hoggab ngulv moiyo gv hoo hog akkam cengkma, hoggab swcw aoso ngulug aalv yal bobo hwiyw go.

¹⁰Hoq tuluhv nam tomswrl hoo betam ram yv hoo bulug cengnam hoqgv gomcwr tulungam goolin ram yv?

¹¹“Supiu-suiyu doomako ho potaq saalangv swwd nvi yv? Tvtwq nwbungv iss doomako ho naleqgo swwd nvi yv?

¹²Hwdlo opu yikam patab kama su, hoq tuluhv mwlwg nwmw otuqb sengco dvn.

¹³Pwnboam mwwma maanbog lamta mwlwngv soq sib nyidwn; dormo dooma bo mwwgwngv soq sib yuupaq tayin.

¹⁴Mwwg svqgwngv tan hvb nyido, hoo mwwg mwwjwngv gaalo taasin hvb nyido.

¹⁵Mwwg namho mwv yiigw do, hvbmabde hoqhv daqg ram; mwv hoq ham gvbw do, hvbmabde hoqhv vdw kuma.

¹⁶Doonyi agaho mwv jeenbo nwmw hvb nyido, hoo mwwg boolu ho mwwg mvmiangv meepw do.

¹⁷Mwwg mvmiangv wlw lwwpum mam tomlup do; mwv wlw nammam kaagaqdo.

¹⁸Mwwg nyook hoqgv mwam twrb nyiloqkam, ho hoqhv mwam haqpaq tayin hoo begamv, ‘Ngo nam nywywngam kaaka ma.’

¹⁹Kaato, soq sib mwwg hwnyir-hvmarnam lamtangv, hoo asaq kvkam ked hoqgv buqlin tayin.

²⁰“Kaato, Pwnbov dvrwqbo nyiam haqpaq ram, ho almab nyinbo alaqkam naama dvn.

²¹Hvbsujaqkam mwv noqg agam lo nyirnam mam bwwr mvtayin, hoo noqg nvbcwrv goqr rotayin.

²²Nam oyum boam hvnywngam koom tayin, hoo nyic-nyia bog tombungv akkam dookram.”