Read Nyishi JOB 9 Bible Online

JOB 9 - Nyishi bible

JOB 9

¹Ho Job birwqnv hoo benum:

²“Jvqtw jaqb soq sam ngo cengdo: Hvbmabde nyia ko akv hoggub Pwnbog agaho kvtaqdvn hvla tayin?

³Nyi akv mwwg lvgab gooka sudwb mwwb nyiloqkam, lwwyw mood gob naal bejaqkam mwam nyi akv birwq nyoram.

⁴Mwwg hangv cenglaq do hoo koi jaqb atordo mwam ceekonamv atv atam ceekonam hvb nyidwn, hoo niqtuq lengd nvi yv?

⁵mwwg haaxaq yin bulam likub-lexeq dvb mvdwn, mwv puutungam mvpaqdo, hoo bulv ham cengma dvn,

⁶hiyv swcwngam hoqg dook hoqgv hwqpia dvn, hoo hoqg swwrw tulungv hwqdin dvn;

⁷hiyv doonyiam gaml jiyikam, hoo hoqhv caalin maadwn; hiyv takar tulug hutongam mutum dvn;

⁸hiyv vp-cwkwb cwwnyiaq-doonyia kam pujinum hoo sa-svlog suduq duqnam mam caajabnum;

⁹hiyv Korlum pumbum mam hoo Karda beqnyiangam, Kartaq dimbiongam hoo nyookog takar tulungam pwnum;

¹⁰hiyv mwwc lama dvb koibo bonam nyidwn, hoo xinya lama dvb swrdorxeq kam nyidwn.

¹¹Kaato, mwv ngoqg dookub wpeq do, hoo ngo mwam kaapa ma; mwv wdo, hvbmabde ngo hengpa ma.

¹²Kaato, mwv naareqdo; hiyv mwam mutur tayin? Hiyv mwam betayin, ‘Hoggv no nyidu dvn?’

¹³“Pwnbov mwwg haaxaqnam mam wkur mvkram; Rahabnvn svka bo tulungv mwwg niikumho pvxwl xumnum.

¹⁴Ngoqg gomcwr tulungam xuql mwwg lvgab hoggub yu ngo mwam birwq tayin?

¹⁵Ngo kvtaq sujaqkam, ngo mwam birwq nyoram; ngam benyi-beyabo tulu gab ngo mwam aya mwwpa gab kodwb nyiky do.

¹⁶Ngo mwam goqb nyiloqkam hoo mwv ngam birwqnum, ngoqg yalam mwv tapa dvn hvl ngo mwwjw maanam.

¹⁷Hoggab mwv ngam doogum-dooi hoqgv mwmwq do hoo pagoq doomab naleqgo ngam un gvm do;

¹⁸mwv ngam saqlin mvkam ma, hvbmabde kacaq bviyaqbo lvgab ngam bwwr mvdo.

¹⁹Soq si atoram torka mins baloqkam, kaato, mwv koijaqb ator do! Soq si jvqtw pagoq gab hiyv mwam goqla dvn?

²⁰Ngo kvtaq sujaqkam, ngoqg at agamv ngam dooxa dvb mvdo; ngo dvrwq sujaqkam, mwv ngam alman gob mvpa ku.

²¹Ngo dvrwq su; ngo atv atam xima dvn; ngoqg swwgam ngo oyum dvn.

²²Soq mwlw si akin do; hoqgab ngo bedwn, Mwv dvrwqkam la nyic-nyiangam vnyi-vnyiam twrdo.

²³Hwdlo haqma paqb ciqcaq-bviyaql sinamv haai yin, mwv nyi nyiinyog vc-ainam mam nyirj do.

²⁴Swcwngam nyic nyia alaq uraho jipa ku; mwv hoqg nyegam tulug nyuqm mam tomlup paku— soq si mwv maanyi loqkam, hvnyi loqkam hiyv soq si i?

²⁵“Ngoqg aalv xarnbo akam nyebia yaab wdo; bulv xarleq nukba; bulv albo kaapa kuma.

²⁶Bulv poqta-saala toonam hvb tooleq nukba, xookam cwanam hvb cwa paku.

²⁷Ngo bebnyiloqkam, ‘Ngoqg sornam mam ngo mwwpa maab nyita yin, ngoqg mwwdwq nyuqm mam ngo apaq tai yin, hoo aljaqb hwrcw tai,’

²⁸ngoqg hentwr mwlw gab ngo bos do, hoggab ngo cengdo no nyi nyiinyongam ngam parl doogram.

²⁹Ngam haqpaq tai kun; ho nyiloqkam hoggub yu ngo bonam niqtuq doomab nyisam dvn?

³⁰Ngo atv tapam lvgab hurs baloqkam hoo ngoqg alaqkam cola lvgab hwrxaq baloqkam,

³¹hvbsujaqkam ngam no ung urab hurlwq tayin, hoo ngoqg atwg vj tulungv ngam hvnyw mvtayin

³²Hoggab ngo mwam birwq dvb, mwv nyia ko ma, ngoqg sib nyima, ho ngulv mvl bekho lvkin gob hookum dvb.

³³Ngunyi-ngunyig aoso mwwg alaqkam idaq dvb, ngulug pengko so bulyw-buut dooma.

³⁴Mwwg dvvcw beqnyiangam ngoqg soqgv naapaq mvto, hoo mwwg bos dvb nyinam mam ngam bos soma vrram som kumabv.

³⁵Ho ngo mwam bosmab agam gootayin, hoggab ngo atv atam gooiyin maas dvn.