Read Nyishi MWMIN NWSWR 10 Bible Online

MWMIN NWSWR 10 - Nyishi bible

MWMIN NWSWR 10

¹At Swa, hoggab no aado ho daqgin dvn? No hoggab vs-axaq moodam kvsdvn?

²Nyicbog larnam hoqgv laanyi maanboam nyob pado; hoqgab bulug atwg surub mwwl nyinam hoqgv bulam portu paku.

³Nyic bov bulug hang mwwlwqb lardwn, rvvsw-roogum mam mwwby bov beenam mam kaapa dvn hvbmab bulv At Swn haqpaq dvn.

⁴Nyicbo tulungv larlayil, “Pwnboam meegaq maadwn; bulug mwwnam mwlwngv “Pwnbo dooma dvn hvl mwwdwn.”

⁵Bulug swwn-geenamv hog mwlwho aljaq sudo; hvbmab no ao nyook hoqgv bulam kaapa mvma dvb pw-hwwdwn; hoqgab bulug nyemaqkv bulam ximwql mvgnvba.

⁶Bulug hang lo hvl mwwdwn, “Ngulv hog akam biig suram; ho ngulug ko hotam-hotam xaqb hog vs-axaq haaram.”

⁷Bulug agam lo beenamv, vm mvvnamv hoo bejab-beyapnam arongam bedwn; bulug lyol lo niqtuq dooma bo la bec-beyangam bitwq dvn.

⁸Bulv nampam lenga lo nyemaq tooiyal doodwn, ho bulug toosil dook ho dootwl pagoq dooma bo nyiingam mengdwn. Bulug vnyiqkv laanyi maanboam tuugab jinjin dvn.

⁹Bulv sony nyot hvb cooikab rusil tooiya yaal doodwn; bulv laanyi maanbo tulungam nootu dvb nyidwn; hwdlo bulv laanyi maanboam nootu yukam bulug luudwr urab siilwq dvn.

¹⁰Laanyi maanboam vmwq-yumgub tabto dvb mvdwn, hoo any maanbo tulungv atorbo ura lo yoqlwq yaadkun.

¹¹Bulug hang lo hvl mwwdwn, “Pwnbov mwwpa kuram, mwv mwwg nyuqm mam kvs paku, ho mwv nywywngam kaapa kuram.”

¹²Pwnbo, At Swa, gorab to, noqg alaqkv irabto; laanyi maanboam mwwpa maab nyimabv.

¹³Hoggab nyic bov Pwnboam haqpaq dvn, hoo bulug hang lo hvl bedwn, “Hwdlokam mwv ngulam pw-hwwram”?

¹⁴Hvbmabde no kaal doodwn! Jvqtw jaqb no vs-axaq kamla mwwdwq-saqkam cengl doodwn, ho hog mwlwngam noqg alaqho gvbwl bvvg dvn; laanyi maanbo tulungv nam atam gvqlwq dvn; no hopin tulungam svka kaaky bov.

¹⁵Nyic nyin boam la almab nyinbo laqpongam xitwrto; bulug nyic nyinam mwlwngam no meepal meelin maady deedib meeto.

¹⁶Nyook soq nyi mwlwngv niik jaqkam; At Sw mwv kol nwrba gob lvpw atwb swwky tayin.

¹⁷At Swa, no yanbog hang mwwnam mam kaatbv; no bulug hangam ator jitbv, noqg nyurungv bulug benam mam tatbv

¹⁸hopin gabla nyijab-nyiyapnam nyiilu gab no raol doogdvn, hoqhvb nyigam gab, swcw nvg aoso xwwmy-hoping bosnamv dooma yuk nvpv.