Read Nyishi MWMIN NWSWR 102 Bible Online

MWMIN NWSWR 102 - Nyishi bible

MWMIN NWSWR 102

¹At Swa, ngoqg swgwnam sam tatbv; ngoqg xabnam mam noqg dook ho haam tvbv!

²Ngoqg hentwr-kaas aalam noqg nyuqm mam ngoqg galoqkv kvs maabv! Noqg nyurungv ngam ruucw kwrgab tvb; hwdlo aalam ngo nam goqyikam nyebia jaqb ngam goorwq tvb!

³Hoggab ngoqg aalv wm mwk hvb juul wde ku, hoo ngoqg alongv wm mopio hvb xaal doodo.

⁴Ngoqg hangam nwmwngam jwwtab namhvb jwwtab paku hoo sengn paku; ngo ngoqg dvsam dvdwb mwwpa kuma.

⁵Ngoqg vc alwb sigin giggam gab ngoqg alongv ngoqg aiyaq ho kaqgab tvl doodo.

⁶Ngo diixa-rara lo pvta pup hvb nyidku, ho dooxa bo nyook hoqg pvta pup hvb nyidku;

⁷Ngo huul doodwn; nam aoho vp-cwkwb doonbo pvta pwdw hvb ngo nyidwn.

⁸Aal loopwngam ngoqg ceebio tulungv ngam nyirj-nyipar dvn; bulv ngam bej-beparnv ngoqg eminam beendvn.

⁹Hoggab ngo wm muiyam wtw gob dvdwn hoo ngoqg nyiqsam twwnam lvgab mviyo tvl twwdwn,

¹⁰hv hvbaloqkam noqg hang lengnam mvla haaxaqnam gab; hoggab no ngam joorabl hoo hurpaq pakun.

¹¹Ngoqg aalv ariyum yal bobo hvb nyido; ngo nwmw sengnam hvb sengn ku.

¹²Hvbmabde At Swa, nwrba gob no doodwn; ko hosiq-hosiqkv kuiyum nagub nam mwwpa dvn.

¹³No gorabl hoo Jaiyonam aya mwwpa tayin; soq mood si mwnwn mwwsw de mood go; xip kunam moodv haapa ku.

¹⁴Hoggab noqg nyera tulungv mwnwg tumanam wlwngam bugil doog do hoo mwnwg diimwram aoho aya mwwpa to.

¹⁵At Swg eminam nyob tulungv bos tayin, hoo noqg yuunam mam swcw soqg lvpw at mwlwngv bos tayin.

¹⁶Hoggab At Sw Jaiyonam mvpan; mwwg yuunam ho mwv daqlin dvn;

¹⁷mwv jwwgwbo swgwnam mam loodwn hoo bulug swgwnam mam haqpaq maadwn.

¹⁸Haata bo ko hosiq tulu gab soq sam xeqpwl apto, hvb nyibaloqkam kuiyum mam haata bo nyiilungv At Swn paqtayin:

¹⁹mwwg dvrwqbo nyook ao hoqgv mwv kaalnum; ao lvpw toloqkv At Sw swcw sam kaadwn;

²⁰pvtwq doonbo tulug sigin ginam mam tapa dvb, ho sim dvb tuml apnam tulungam tolin dvb,

²¹ho bulv At Swg eminam Jaiyon ho hoo Jerusalemho mwwg paqnam mam bibwq tayin,

²²hwdlo nyiilungv, hoo lvpw-haty mwlwngv dookum-doopayin, At Swn xumto.

²³Mwv ngoqg atoram raab nyidu yikho mvpia paku; mwv ngoqg aalam otu dvb mvpa ku.

²⁴“Ngoqg Pwnboa” ngo bedwn, “Ngoqg kviywb swwdu de aal so ngam naapaq maabv no su vnyw tulungam ko hosiq-hosiq xaqb dooyu mvdwn!”

²⁵No kolwg hoqgv swcwg gwwlam pwl ap pan, hoo doa ao tulu tv noqg alaqg bonam nyinamv.

²⁶Bulv yuupaq tayin, hvbmabde no dooky tayin; bulv mwlwngv vj hvb nyatayin. No bulam vj hvb kwly tayin, hoo bulv wpaq tayin,

²⁷hvbmabde no aiyin do, hoo noqg vnywngv wtwr dooma dvn.

²⁸Noqg nyera tulug kongv swrsol dootayin; bulug hosiqkv noqg agaho swwl dootayin.