Read Nyishi MWMIN NWSWR 103 Bible Online

MWMIN NWSWR 103 - Nyishi bible

MWMIN NWSWR 103

¹Ngoqg yvja, At Swn paqto, hoo ngoqg uraso doonbo mwlwngv, mwwg dvrwqbo eminam paqto!

²Ngoqg yvja, At Swn paqto, hoo mwwg aldvb nyijnam mwlwngam mwwpa maab nyimab,

³hiyv noqg nyixaq mwlwngam apaq jidwn, hiyv noqg vc mwlwngam mwp jidwn,

⁴hiyv nam sig ung hoqgv pvlyw dvn, hiyv nam tumanam abiam la aya mwwpanam lvgab lvqcdvn,

⁵hiyv nam albo lvgab xumt mvdwn ho noqg tuudy-yaamy swwgam xookam vm hwrdar namhvb hwrm dvn.

⁶Hiyam nyijab-nyiyiqpan ham, At Sw dvrwqkam la jvqtwngam nyis tulungam nyij do.

⁷Mwwg lamta tulungam Mojesnvn, ho mwwg bon nyinam mam Israelwg nyiilungam cengm dvb mvnum.

⁸At Sw aya mwwpa bvla anya bov, haaxaq xaqla maadwn hoo tumanam abiv naleq dvn.

⁹Mwv lwxiam yolu ruqram, ho mwwg haaxaqkam nwrba gob pvvl apram.

¹⁰Ngulug nyic nyinam hvbkalam mwv ngulug lvgab hvb nyiram, ho ngulug nyixaqnam hvb ngulam jikuram.

¹¹Doangv hog hwdgo swcw soqgv ao dvn, hoqhvb hiyv mwam bos bo tulu gab mwwg tumab abynamv koijaqb doodwn;

¹²dou-caga hoqgv haaga namgub aado namhvb, hoq hvbkalam ngulug hoqgv mwv ngulug nyimuram aadob naaxa pakun.

¹³Ab akv mwwg ko tulungam hang biinam mam kaakinam hvbkalam, At Sw mwam bosbo tulungam hang biil kaatam dvn.

¹⁴Hoggab mwv cengdo ngulam hoggub ywrpan, mwv cengdwn ngul diimwrv.

¹⁵Nyia ko gab, bulug aalv nwmw hvb nyidwn; mwv rongo lo aljaqb opu puunbo hvb nyidwn;

¹⁶ho dooiyv hoqb ywpeq yin, hoo hoqhv wpaq dukun, hoo hoq nyookv hoqham cengk maadwn.

¹⁷Hvbmabde hiyv mwam bosdvn, At Swg tumanam abiv kuiyum hoqgv kuiyum nagub dooky tayin, hoo mwwg dvrwq kwrwqkv ko hosiq-hosiq xaqb dootayin,

¹⁸hiyv mwwg pvvbam pvvdwn hoo mwwg gamlam tulungam mwwg gabl nyidwn.

¹⁹At Sw mwwg lvpwngam ao lvpwtv pwpan, hoo mwwg lvpw-hativ mwlwg aoho pvvb bwwl doodwn.

²⁰Mwwg gumtw tulu nulv, mwwg agam mam tal nyinbo, atorbo nulkam, mwwg agam yalam tal bugi bo nul, At Swn paqto!

²¹Mwwg gumtw mwlwngv, mwwg bonam nyinbo tulungv, ho hiyv mwwg mwwlwqkam nyidwn, At Swn paqto!

²²Mwwg bonam nyinam mwlwngv, ho nyook mwlwho doonbo mwwg huqlw atorv At Swn paqto. Ngoqg yvja, At Swn paqto!