Read Nyishi MWMIN NWSWR 104 Bible Online

MWMIN NWSWR 104 - Nyishi bible

MWMIN NWSWR 104

¹Ngoqg yvja, At Swn paqto! Ngoqg Pwnbo At Swa, no vcjaqb koidvn! No yuunam mam la modunam mam vj hvb koodwn,

²no atv huto lvgab pulup do vj lvgab pulup namhvb, doangam tombu vj pujin pan hvb mvdwn.

³Mwv mwwg pwqlwg xaapongam iss ao lo joop gvdo; mwv doomwqkam mwwg ceriotwb mvgdo; mwv dooi alap hoqgv xarl wdo;

⁴mwv dooiyam mwwg pui baqnbo gob mvdwn, mwwg bon nyinbo tulungv wm moily akwb bioqdo.

⁵Mwv swcwngam swcw gwwl aoho pvvnum, hoqgab hv nywywngam biikram.

⁶No swcwngam sa-svlo lvgab vj pulup namhvb pulupnum; issiv yornam daqbo yaanum.

⁷Noqg yolu ruqyikam bulv keleqnum; noqg doogum gumnam yalam bulv tapa pel keleqdo.

⁸No bulgab nyook xuqbwq jinam ho puutungv daqlinum, lywpangv hoanum.

⁹No vrr ak rwr jinam hoqgab bulv hengbo nyomanum, hoqgab bulv lokta swcw sam hinglup nyokram.

¹⁰No lywpa hoqgv issam xulin dvb mvpa; bulv puutu pengkob tol wdo;

¹¹bulv nyoro hoqg svdin mwlwngam twwdwb jidwn; svlinbo svdamv bulug hvngwram twwnum.

¹²Bulug bviywrho doag pvtangv doodwn; bulv svvn haqb tuluho bemin bedo.

¹³Noqg ao nam hoqgv no yorn tulungam iss jigdo; noqg bonam nyinam niqtuq lvgab swcw si xumt do.

¹⁴No nwmwngam swwm pan tuun-meengam dvmdvb hoo nyorongam nyiingam rongo mvl dvm dvb, ho mwv swcw soqgv dvsam mvlin yinpv

¹⁵hoo twwnam hoqgv nyi hangam hemp mvi nvpv, kutiv mwwg nyuqm mam kwlwq-kvlaq dvb mvi nvpv hoo nyi hangam dvnamv ator mvdwn.

¹⁶At Swg svvn tulungam naleq go issiv jinum, Lebanonwg sidar svvn tulungam mwv liinum.

¹⁷Bulug ho pvta tulungv bulug osupam subdwn; dookpul pvtangv vm-rvsabo svvn tuluho osup subdwn.

¹⁸Aobo yorn tulungv bemb tulu gab; wlw lwwtaqkv wlw soojwg cwwgw ko-gab.

¹⁹Moodam kaacin dvb mwv poolam karlin mvdwn; doonyiv atwg hvvd moodam cengdwn.

²⁰Kan twdwqkam no mvpwn, hoo hoqham aiyv hvdwn, hoq moodam nyorog svdin mwlwngv gwgaq-xargaq dvn.

²¹Sony nyot nyopangv bulv soogam gamdwb dugum gumdo, bulug dvsam Pwnbo hoqgv miidu do.

²²Hwdlo doonyiv caalin yin, bulv nyusul wkur dukun hoo bulug lwwpwq ho bulv karmin dukun.

²³Nyiv mwwg bon nyitab lvvgwb lengdwn hoo mwwg bonam ariyum nagub nyidwn.

²⁴At Swa, noqg nyis nyinam tulungv hog hwdgo luusaq-luusaq do! Noqg mwwlaq hoqgv bul mwlwngam mvnum; swcw si noqg pwnamv naleqgo doodo.

²⁵Soq si sa-svlongv, koido hoo taqtdo, hoqho xibwq maadwb pwnam mam sol doogdvn, anyo-koiyib swwl doonbo vnyi-vnyiam doom gvdwn.

²⁶Hoqb iss jaajv wdo, hoo Dooji-buram, no sookum koob mvnum.

²⁷Bulug dvsam mood xikjaqho bulam jik dvb, soq mwlw si nam kaado.

²⁸Hwdlo no bulam sam jiyikam, bulv ham nookum dvn; hwdlo no noqg alaqkv taakoqyin, bulv albo dupum-dvrab lvgab bwwrnum.

²⁹Hwdlo no noqg nyuqm mam kvs yin, bulv mwwgw doomanum; hwdlo no bulug saqnam mam naapaqyin, bulv sidwn hoo bulv diimwrb nyikur dukun.

³⁰Hwdlo no noqg yalam kanam nvmlwq yikho, bulam pwknum, hoo no nyookwg nyuqm mam nit dvb mvknum.

³¹At Swg yuunamv nwrba gob dooyu nvka; At Swg hwnyir-hvmarv mwwg nyis tulungam nyikho doonka,

³²hiyv swcwngam kaaikam hoo swcwngv tvmdwr do, hiyv yorn tulungam idaqyin hoo bulv mwwkwb nyidku!

³³Ngo swwl doody deedib At Sw gab ngo bemin betayin; hwdlo ngoqg turl doode so ngo ngoqg Pwnboam bemin bel paqtayin.

³⁴Ngoqg mwwi-mwwmil mwwl xumnamv mwam hemp mvgnvka, hoqgab At Swg ho ngo hwnyir-hvmar dvn.

³⁵Nyic nyinbo tulungam swcw soqgv twryum tuku, hoo nyic-nyia boam doom kumabv! At Swn paqto, ngoqg yvja! At Swn paqto!