Read Nyishi MWMIN NWSWR 105 Bible Online

MWMIN NWSWR 105 - Nyishi bible

MWMIN NWSWR 105

¹Paqyalinco paqto At Swn; mwwg eminam goqto; mwwg bon nyinam mam nyiilug pengko ho cengm to!

²Mwam bemin beto, mwam bemin begdvl paqto; mwwg hog mwlw lomdwb bon nyinam tulungam betam to!

³Mwwg dvrwqbo eminv yuunka; At Swn meegaqbo hangam hwnyir-hvmar mvmto!

⁴At Swn la mwwg atoram meegaqto; mwam dooba kudub lwxiam meegaqto!

⁵Mwwg lomdwb bonam nyiknam tulungam, mwwg swrdorxeq tulungam, hoo mwv pw-hwwl goolin kunam mam mwwgabto,

⁶Mwwg nyera, Abrahamg ko hosiqka, mwwg daalinam tulu, Jakubg ko tulunga!

⁷Mwv lak ngulug Pwnbo At Swv; mwwg pw-hwwnamv swcw mwlw si doodwn.

⁸Mwwg birnam mam nwrba gob, ho mwwg agam gaml goopnam mam, lwwyw ko hosiq ak nagub mwv mwwgab dvn,

⁹Mwv Abraham lvgab birnum, mwwg dingrnam Aisaknvn mwv mwwg gab dvn,

¹⁰ham mwv Jakubnvn pvvb akwb pwbwb cengm kunum, hv Israelam kuiyum xaqb birl apnam akgob nyin kun,

¹¹begamv, “Nam ngo Kanaan nyookam nulam xibwq jiknam otu gob jitayin.”

¹²Hwdlo bulv jaqnyo yukho, xipa maaiyikho, hoo hoq gvdab nyiody boodu yikho,

¹³gvda taqgwn hoqgv gvda taqgonwb gaqgaql yvi yikho, lvpw akwn hoqgv asaq nyiilu dookho,

¹⁴mwv akjaqkam bulam nyijab-nyiyiq mvmanum; bulug pagoq gab lvpw at tulungam mwv yolu ruqnam,

¹⁵begamv, “Idaqmabv ngoqg xuqnam tulungam, ngoqg nyiqry benbo tulungam un mvg maabv!”

¹⁶Hwdlo mwv dwr kanongam gvdaho goqanum hoo dvsam jinam mwlwngam baqa mvmanum’

¹⁷mwv nyi ak bulug otuq kanam coonum, hv Josap, hiyam nyera gob puqknum.

¹⁸Mwwg lvpiangam tag lvgab un mvgnum; mwwg lwwpongam yoqdwr tag gv kvrlwqnum;

¹⁹hoggv mwv benum hv niqtuq lengma deedib, At Swg agamv mwam pookanum.

²⁰Lvpw atv kanamnum hoo mwam tolin kunum; nyiilungam pvvb bwwl doog bov mwam tolin jiknum;

²¹mwv mwam mwwg nam hoq at gob mvknum hoo mwwg gumn mwlwho kaol doog mvdwb,

²²mwwg mwwlwqkob mwwg lvpw atwg nyega ko tulungam bookum mvdwb hoo mwwg axa nyiilungam mwwlaql tomswr mvdwb.

²³Kokw so Israelv Ijiptho haanum; Hamwg nyook urab ho Jakub lit doonunum.

²⁴Hoo At Sw mwwg nyiilungam tvl-rvl swwm dvb mvnum hoo bulam bulug ceebio tulungam ator yaadwb mvnum.

²⁵Mwv bulug hangam mwwg nyiilungam hang baqm dvb mukubnum, gwwlyw jaqb mwwg nyera tulungam nyig mvdwn.

²⁶Mwwg xuqnam nyera Mojesnvn la Aaronnvn kanamnum.

²⁷Bulv mwwg kvvnyir-tamarnam mam bulug pengko ho nyinum hoo swrdorxeq tulungam Hamwg nyook ura lo nyinum.

²⁸Mwv kan twdwqkam kanamnum, hoo nyookam kan dvb mvnum; bulv mwwg agam mam ceekol tamab nyimanum.

²⁹Mwv bulug iss tulungam hijum gob mvnum hoo bulug nguiyam sim dvb mvnum.

³⁰Bulug nyook lo tvtwq twqtaqkam, bulug lvpw atwg pwqlw jijaq hookam haamnum.

³¹Mwv gamt tonum, hoo tviyw tulungv jaranum, hoo toyup tulungv gvda mwlwho jaranum.

³²Mwv bulam nyodo taa-ngam hurmnum, hoo bulug gvda mwlwho piwr jwr-jwr dvb taiyam mam bioqnum.

³³Mwv bulug roo annam la taoq svvn tulungam nwwtab xaanum, hoo bulug gvda hoq svvn mwlwngam yvqmwq dvb mvnum,

³⁴Mwv gamt tonum, hoo komar takam tulungv jaranum, takam kongv xila maadwb jaranum,

³⁵hoqhv bulug nyook hog wj-oo mwlwngam duiyum kunum hoo bulug rongo aaxy-amaram duiyumnum.

³⁶Bulug nyook ho ko bwwconam mwlwngam mwv mengnum, bulug ator torgw nan aaxy-amar lengco bo mwlwngam mvpaqnum.

³⁷Ho mwv Israelam rupv la hun lvgab bootaq lengnum, hoo mwwg nyob tulu pengko ho boolin maanam akam doomanum.

³⁸Hwdlo bulv lengleq yukho Ijipt nyiv hempnam, hoggab bulug aoho alman bongv haagam gab.

³⁹Mwv doomwqkam pulup mvdwb mwrs-mwrtwrnum, hoo aiyam wm hutongam huum dvb jinam.

⁴⁰Bulv konum, hoo mwv pwk kwngwqkam baqa jinum, hoo bulam ao lvpw hoqgv dvsam naleqgo jinum.

⁴¹Mwv wlwngam mvkonum, hoo issiv tolinum; hv diixa-rara nyookub pobu hvb tonum.

⁴²Hoggab mwwg dvrwqbo dingrnam mam, hoo mwwg nyera Abrahamnvn mwv mwwpanum.

⁴³Ho mwwg nyiilungam mwv hemp pol, ho bemin bel mwwg xuqnam tulungam boolin kunum

⁴⁴Hoo mwv nyob nyi tulug nyookam bulam jinum, hoo bulv nyiilu asaqg nyinunam aaxiam naaknv gumn doognum,

⁴⁵hv hvblo bulam mwwg pvvb tulungam bugil swwm dvb hoo mwwg pvvbam rvkil nyil doog mvm dvb. At Swn paqto!