Read Nyishi MWMIN NWSWR 106 Bible Online

MWMIN NWSWR 106 - Nyishi bible

MWMIN NWSWR 106

¹At Swn paqto! At Swn paqyalinco paqto, hoggab mwv aldo, hoggab mwwg tumanam abiv nwrba gob doodwn!

²Hiyv At Swg atorjaqb bon nyinam tulungam beladvn, ho mwwg paqnam mwlwngam bibwq ladwn?

³Hiyv mood vxiam jvqtwngam nyil doodwn, hiyv dvrwqb nyil doodwn bulv xinam jaqkv!

⁴Hwdlo noqg nyiilungam no mwwswnam mam kaakin yin, At Swa, ngam mwwpa laka; ngam svka tvb hwdlo no bulam ywwlin yin,

⁵ho noqg xuqlinam tulug swwnam-geenam aoho ngo kaadwb nyiyi nvpv, ho noqg nyob hoolug mwwngamnam mam ngo hwnyir-hvmar dvb nyiyi nvpv, ho noqg otungam nvvsiqnamv ngoqg yuunamv.

⁶Ngulv la ngulug ab tulungv ngulv nyic nyiknum; ngulv nyixaq tukun; ngulv nyic-nyiangam nyit kun.

⁷Ngulug ab tulungv, hwdlo bulv Ijipt ho dooi yikho, noqg lomdwb bonam nyinam tulungam bulv mwwmiq kamanam; noqg naleqjaqb tumab abynam mam bulv mwwpa maanam, hvbmabde Lwwcw sa-svlo ho, bulv nam tvjw maab nyinum.

⁸Hvbjaqkam mwwg emin gab mwv bulam ywwlinum, ho mwwg koi atoram mwv cengpw mvdwb mvnum.

⁹Mwv Lwwcw sa-svlongam gaml jinum, hoo sa-svlongv pwtwnum, hoo mwv diixa-rara uraho wpeqnam hvb bulam wgnum.

¹⁰Ho ceebiog alaq hoqgv mwv bulam ywwlinum hoo ceebiog ator hoqgv bulam pvlywnum.

¹¹Hoo issiv bulug ceebiongam hwwlupnum; akjijaqkam bulv dook maanum.

¹²Hooxiq bulv mwwg agam mam mwwjwnum; bulv bemin bel mwam paqnum.

¹³Hvbmabde bulv oyu kama taab mwwg nyis tulungam nyinam mam mwwpa kumanum; bulv mwwg tomswr-honynam mam kaaya maanum.

¹⁴Hvbmabde bulv niqtuq doomabo mwwbynam mam deexa-rara lo doognum, hoo diixa-raralo Pwnboam pookanam;

¹⁵bulv hoggv konum mwv bulam jinum, hvbmabde yuupaq bo dooi vcam bulug pengko lo kanam nvmlwqnum.

¹⁶Hwdlo nyiilungv svmcw ho dooyikho, At Swg dvrwqbo akam, Mojesnvn la Aaronnvn kaaneqnum,

¹⁷swcwngv goqc banv hoo Datanvn meqnum, hoo Abiramwg dvparam gomlupnum.

¹⁸Bulug dvpar uraho wmv kam gulinum; nyic-nyia boam wm moiliv guiyumnum.

¹⁹Bulv Horeb lo svv ko murtiam mvnum hoo yoqdwr guss ak xumnum.

²⁰Pwnbog yuunam mam nwmw dvnbo hvvb guss ak gob bulv kwlynum.

²¹Pwnboam bulv mwwpa kumanum, bulam ywwnbo gob, hiyv Ijipt lo koijaqb bonam nyinam,

²²Hamwg nyooklo lomdwb bonam nyinam tulungam, hoo Lwwcw sa-svlo lo swrdorxeq bon nyinam nyipa kun.

²³Hoqgab, mwv bulam twrtan hvl mwv benum mwwg xuqnam Mojes mwwg agaho daqma nyiloqkam, mwwg hang lingtwrl bulam twrtanam mam apaq maba de.

²⁴Ho mwwg dingrnam mam mwwjw maagam gab, bulv albo nyookam haqpaqnum.

²⁵Bulv bulug doogw ho bud-bud haqnum, hoo At Swg yalam tvjw maanum.

²⁶Hoqgab mwv mwwg alaqkam irab banv hoo bulam dingrnum ho mwv bulam deexa-rara lo yuupaq mvdwb mvnum,

²⁷hoo bulug ko hosiqkam nyob asaqg pengko lo yuupaq mvdwb mvnum, bulam nyook mwlwho cwrsaq-bvraqtwqb mvnam.

²⁸Ho bulv atv Peorg lvgab Baalnvn xumbam kunum, hoo sik boam jinam pwr dvnum;

²⁹bulug bon nyinam lvgab bulv At Swn hang nyiluql haaxaq mvnum, hoo swcin-taiyaq ak bulug pengko hoqgv buqlin kunum.

³⁰Ho Pinehas daqrabl hoo naakonum, hoo swcin-taiyaqkv hemo kunum.

³¹Hoo hoqhv kulak ko hosiq-hosiq hoqgv nwrba gob mwam dvrwqbo gob xiknum.

³²Meribag iss ho bulv mwam haaxaqnum, hoo hv Mojes lvgab alman gob bulv xiknum,

³³oggab bulv mwwg yalam kacaq dvb mvnum, hoo mwwg nvbcwr lvgab mwv gamtor alwb goonum.

³⁴At Sw hoggub bulam gaml jinum hvb, bulv nyiilungam mingtwr maanum,

³⁵hvbmabde nyob nyi asaq lvgab bulv aiyo-aconum hoo bulv hoggub nyidwn hvb ceng layil bulv kam hoqhvb nyinum.

³⁶Bulug murtiam bulv xumnum, hogloq hv bulgab pwd-poto gob nyinum.

³⁷Bulv bulug nyega ko tulungam pwr jinum hoo bulug nyem ko tulungam sonyiam jinum;

³⁸Bulug hencin maata bo nyega-nyem ko tulungam, Kanaanwg murtiam bulug uiyam biqlin mvnv pwr jinum, hoo nyookam kac-tanyiaq dvb mvnum.

³⁹Hoqgab bulug bon nyinam tulungv bulam dvrwq maadwb mvknum, hoo bulug nyitaq mwlwho yocu-yabio nyijo bob nyinum.

⁴⁰Ho At Swg haaxaqnamv mwwg nyiilug aoho bioqrabnum, hoo mwwg gumn nvvsiqbo tulungam mwv vcjaqb hang baqnum;

⁴¹mwv bulam nyob asaqg alaqho jinum, ho hiyv bulam oyumnum hoq tulu ham bulam pvvb bvvl doog mvdwb.

⁴²Bulug ceebio tulungv bulam mvnyi-mviyanum, hoo bulug ator hoqgv bulam nyumwb boanum.

⁴³Naleqgo mwv bulam ywwlinum, hvbmabde bulv tama loodanam bulug nyik-wkho hoo bulug nyixaq ko-gab bulam anyo dvb mvgeq loknum.

⁴⁴Hvbsujaqkam, hwdlo mwv bulug xabnam mam tapa yin, mwv bulug hentwr-kaas aoho svkanum.

⁴⁵Hoggab bulug algab mwwg birnam mam mwv mwwpanum, hoo mwwg tumab aby hvbkalam mwv naleqjaqgo jipa kun.

⁴⁶Hiyv bulam nootul apbo tulu hoqgv mwv bulam aya mwwpa mvdwb mvnum.

⁴⁷Ywwlin tvb, ngulam Pwnbo At Swa, hoo ngulam nyob asaqg pengko hoqgv boocum tvb, ho ngulv noqg dvrwqbo eminam paqyalinco paqla tayin hoo nam paqnamv yuunka.

⁴⁸Israelwg Pwnbo, At Swn paqto, kuiyum hoqgv kuiyum nagub! Hoo nyiilu mwlwngam bemto, “Amen!” At Swn paqto!