Read Nyishi MWMIN NWSWR 107 Bible Online

MWMIN NWSWR 107 - Nyishi bible

MWMIN NWSWR 107

¹At Swn paqyalinco paqto hoggab mwv aldvn, ho mwwg tumanam abiv nwrba gob doodwn!

²At Swg pvlywnamv soq sib bemto, hiyam hentwr-kaas hoqgv mwv pvlywnum

³hoo nyook tulu hoqgv boocumnum, dou-caga hoqgv haaga nagub, nyoodum hoqgv nyooko nagub.

⁴Tuugin gaqxarl yvnum hog dooma bo diixa-raralo, bopam wl dootab lamta meepa maanam;

⁵kano hvngwr banv, bulug yvjv bulug uralo swnyiq-svnyiaqnum.

⁶Ho bulv At Swn bulug hentwr-kaas ho xabnum, hoo mwv bulam bulug vs-axaq hoqgv naalinum.

⁷Mwv bulam dinda bo lamtab wgnum hwdlo bulv bopam ho wc layil dooma deedib.

⁸Bulam paqyaco paqmto At Swn mwwg tumab abyko gab, ho mwwg nyia ko tulu gab lomdwb nyis tulungam nyinam mam!

⁹Hoggab mwv yvjwg svnganam mam xumt mvdwn, hoo kano bo yvjam mwv albo dvnam lvgab hoodwn.

¹⁰Tuugin kan hoola sigwg doonyium uraho, duqtwr-nyelin ngvla yoqdwr pvtwqho tumnam tulungv doonum,

¹¹hoggab bulv Pwnbog agam tulungam ceekol tamanum, hoo Pwnbog tomswr-honynam mam haqpaqnum.

¹²Hoqgab hentwr henl bon nyik lvgab mwv bulug hangam pwnyo mvnum; bulam akam svka bo dooma dvb, yoql mvmnam.

¹³Ho bulv At Swn bulug hentwr-kaas ho xabnum, hoo mwv bulam bulug vs-axaq hoqgv naalinum.

¹⁴Mwv bulam kanwg hoqgv la sigwg doonyium hoqgv boolinum, hoo bulam raqtin nan mwlwngam pvpwqnum.

¹⁵Bulam paqyaco paqmto At Swn mwwg tumab aby ko-gab, ho mwwg nyia ko tulu gab lomdwb nyis tulungam nyinam mam!

¹⁶Hoggab mwv tama viyap tulungam hwqpia-hwqyanam hoo yoqdwr svpo tulungam tuunyi gob potunam.

¹⁷Bulug nyic lamtab wggam gab tuugin nyiidam kunum, hoo bulug nyixaq nyijongv vc-cil duqtwr duqnum;

¹⁸bulv hog luuxy dvsam dvnw maanum, hoo bulv sigwg toggoqho hvvnwq kunum.

¹⁹Ho bulv At Swn bulug hentwr-kaas ho xabnum, hoo mwv bulug vs-axaq hoqgv bulam naalinum.

²⁰Mwv mwwg agam mam kanamnum hoo hv bulam mwpnum, hoo bulug twrmnam hoqgv bulam naalinum.

²¹Bulam paqyaco paqmto At Swn mwwg tumab aby ko-gab, ho mwwg nyia ko tulu gab lomdwb nyis tulungam nyinam mam!

²²Hoo bulam paqyalinco paqnam pwram jimto, hoo hempwg bemin lvgab mwwg bon nyinam mam betam mvto!

²³Tuugin sa-svlog iss jaaj tuluho, kwm-kor mvtab koibo iss aoho wnkun;

²⁴bulv At Swg bon nyinam tulungam, iss ura lo mwwg lomdwb nyis tulungam nyinam mam kaapanum.

²⁵Hoggab mwv gaml jinum hoo nyodo taa dooiyv yirab mvnum, hogloq hv sa-svlog suduq duqnam mam nwwduq caanum.

²⁶Bulv doonyi-pool aotv dvqcnum; bulv ura-ko-gab haanum; bulug almab nyigam gab bulug haakamv jiqpaq nukun;

²⁷bulv tabko-tablol hoo pako-palol twwxum bo nyi hvb nyinum hoo bulug cwx-coxv twrn kun.

²⁸Ho bulv At Swn bulug hentwr-kaas gab xabnum, hoo mwv bulug vs-axaq hoqgv bulam naalinum.

²⁹Mwv nyodo taa-ngam cooikab doom dvb mvturnum, hoo sa-svlog suduq duqnam mam duqngin dvb mvknum.

³⁰Ho issiv cooikab dooikun bulv hemp kunum, hoo mwv bulug mwwby ko swrso nyook ho bulam booc kunum.

³¹Mwwg tumab abyko gab, ho mwwg nyia ko gab lomdwb bonam nyinam tulu gab At Swn bulam paqyalinco paqmto!

³²Nyiilug dookumko ho bulam mwam vcjaqb paqmto, hoo nyiixa tulug dookumko ho mwam paqto.

³³Mwv pobungam diixa-rarab mvdwn, iss buqlinkoam deexa-rara dvb mvdwn,

³⁴diibuqbo nyookam deexa-rara dvb mvdwn, hv hvbaloqkam hoq nyook ho doon bog almab nyigam gab.

³⁵Mwv diixa-rarangam iss hengl dookub, cwwgoq-deegoq nyookam iss subuq buqlin koob mvdwn.

³⁶Hoo hoqho mwv kano bo tulungam doom dvn, hoo bulv bopam paml doodwn;

³⁷bulv rongo ho vly liinam hoo roo boolu mvnam hoo aaxiv vigo xeenam.

³⁸Mwwg lvqc namgab bulv vigo buqporl swwmw dvn, hoo mwv bulug tuun-meengam xoom mvma dvn.

³⁹Hwdlo mvnyi-mviyanamv, almanamv, hoo mwwdwq-saqkv haaikam bulam anyo dvb mvl hoo mvgeq yin,

⁴⁰mwv lvpw atwg nyega ko tulug aoho modu maanam mam jilwq dvn hoo bulam niqtuq dooma dvb mooro roodw ho nyogaq-gaqm dvn;

⁴¹hvbmabde mwv dwc-twwpw maab duqtwr duqn boam purab dvn hoo bulug imiq dvparam sviya pvtw hvb swwm dvn.

⁴²Jvqtw bov ham kaatwl hoo bulv hemp dvn hoo nyic-nyiabo mwlwngv atwg agam mam momtum sudkun.

⁴³Hiyv xeq mwwlaq dvn, mwam soq tulu sam tagab mvto; At Swg tumab abynam sam bulam mwwka mvto.