Read Nyishi MWMIN NWSWR 109 Bible Online

MWMIN NWSWR 109 - Nyishi bible

MWMIN NWSWR 109

¹Jimy-jema maabv, ngoqg paqnam Pwnboa!

²Hoggab nyicv la vm mvvnbo agamv gamk rooto tvl ngam ceeko do, xaalyo bo lyol lvgab ngam ceekol agam goodu do.

³Tvnyi-tor dvb bulv ngam bitum-bego do, hoo hog bekap doomab ngam bedo.

⁴Ngoqg abynam kwlib bulv ngam ruum-humdo, hvbmabde ngo atv swgwl doodwn.

⁵Hoqgab bulv ngam albo kwlib guunyi akiam keedwn, hoo ngoqg abynam kwlib bulv ngam oyum dvn.

⁶Nyicbo nyi ak mwam ceeko mvdwb xuqlinto; ruum-humn bo akam mwwg lvqbwq taqc ho daqmto.

⁷Hwdlo mwam pw-hwwikam; mwam nyixaqbo akwb ximto; mwwg swgwnam mam nyic gob ximto!

⁸Mwwg aalam loodw mvto; mwwg bonam asaqkam nyim tuku!

⁹Mwwg ko tulungam ab doomab doom to hoo mwwg nywxwngam xwwmib swwm to!

¹⁰Mwwg ko tulungam gvqmwl kogaq mvto, kolwg nvmcw cwwiya hoqgv dvsam meegaq mvmto!

¹¹Ceegonam akv mwwg hog mwlwngam xutinl naareq gvnka; mwwg hentwr henl bon nyinam aaxiam nyoodo nyiilungv pureq gvnka!

¹²Mwam aya mwwpal svka deenbo akjijaqkam dooma nvka, ho mwwg ab dooma bo ko tulungam hiyvkam ayaram!

¹³Mwwg ko hosiqkam twrm gvnka; mwwg eminam hotam tvmnyi deen hoqgv mvpaq gvnka!

¹⁴At Swg agaho mwwg ab tulug nyixaqnam mam mwwpa mvmto, hoo mwwg annwg nyic nyigongam naapaq maab doomto!

¹⁵Bulam At Swg agaho dooky mvto, ho swcw nvg aosoqgv bulam mwwpanam mam mwv ludum kamyi nvpv!

¹⁶Hoggab ayangam kaakin dvb mwv mwwpa maanum, hvbmabde jwwgw boam la dwc-twwpw maanbo hoo hang mwwcu-saqya boam mengdwb ruqmin gvnum.

¹⁷Mwv beenam mam aby dvn; hoo beenam mam mwam biipup sumto! Mwv lvqc cinam mam hemp maadwn; sam mwwg hoqgv aado mvto!

¹⁸Mwv atv beenam mam mwwg kamt vj koonam hvb koonum; hv mwwg gv-ngam iss pamnam hvb pamyaq dvn, mwwg loobu tulu lo kuty neeyaqpan hvb nyimto!

¹⁹Sam mwwg gv apo ho vj hwwbum pan hvb nyimto, ho mwwg looxiam soruq gvnam hvb nyimto!

²⁰Hiyv ngoqg swwcangam ceekol alman agam mam goodwn, soq tulu sam At Swg hoqgv ngam ruumbo tulungam aky gob jignvka!

²¹Hvbmabde, Pwnboa no ngoqg At Swv, noqg emin gab ngoqg nyidub nyig nvka; hoggab noqg tumab abynamv aldo, ho ngam naalin tvb!

²²Hoggab ngo laanyi maanbov hoo dwc-twwpw maanbov, hoo ngoqg hang ura si vc cimdo.

²³Ngo ariyumg yal bobo nyiinam hvb nyipa ku; takam mam hwqdinl ruqpaqnam hvb ngam ruqpaq paku.

²⁴Dery reel doogam gab ngoqg lwbwngv laanyi kuma; ho ox-aiyaq dooma gab, ngoqg gv apongv rwwd ku.

²⁵Ngam ruum-humn bo tulu gab ngo haqpaqnam dupum-dvrab gob nyidku; hwdlo bulv ngam kaapa yin, bulug dumpongv dumpwq do.

²⁶Ngam svka tvb, ngoqg Pwnbo At Swa! Noqg tumab abyko gab ngam ywwlin tvb!

²⁷Bulam soq si noqg alaqkv hvl cengm to; no su, At Swa, sam nyipa kun!

²⁸Bulam beem to, hvbmabde no lvqc cito! Bulv daqrab dvn hoo bulam hvnyw dvb mvtayin, hvbmabde noqg nyerangv hemp tayin!

²⁹Ngam ruumbo tulungam ximanam lvgab pulup mvto; bulug atwg hvnyw-haram bulv kamt vj hvb hwwbuml koomto!

³⁰Ngoqg agam lvgab ngo vcjaqb At Swn paqyalinco paqtayin; ngo mwam nyi mwlwg pengko ho paqtayin.

³¹Hoggab dwc-twwpw maanbog yvjam bepaq-beyaql mengta nammam, mwv ywwlin dvb mwwg lvqbwq taqc ho daqba dvn.