Read Nyishi MWMIN NWSWR 115 Bible Online

MWMIN NWSWR 115 - Nyishi bible

MWMIN NWSWR 115

¹Ngulam ma su, At Swa, ngulam ma su, hvbmabde noqg tumab abynam gabla noqg dengkynam gab, noqg eminam yuum dvb jignvka!

²Hoggab nyob asaqkv belatayin, “Hogloq ho bulug Pwnbov?”

³Ngulug Pwnbo ao lvpwtv doodwn; mwwg mwwlwqkob mwv hog mwlwngam nyidwn.

⁴Bulug murtiv hun la rupv, hv nyia kog alaqkv mvnamv.

⁵Bulv agamv doos do, hvbmabde gooma dvn; vnyiqkv doos do, hvbmabde kama dvn.

⁶Bulv nyurungv gvs do, hvbmabde tapa maadwn; nyupumv baqs do, hvbmabde suupa maadwn.

⁷Bulv alaqkv doos do, hvbmabde hengpa maadwn; lvpiangv doos do, hvbmabde wma dvn; hoo bulug lwwgu hoqgv bulv yal dulin maadwn.

⁸Bulam mvnbov bul hvbkalam nyidwn; hoqgab bulam mwwjwbo mwlwngv bulug hvb nyidwn.

⁹Israela, mwwjwto At Swn! Mwv nulug svkangv hoo nulug svtamv.

¹⁰Aaron gv nombu nga, mwwjwto At Swn! Mwv nulug svkangv hoo nulug svtamv.

¹¹Nulv hiyv At Swn bosdvn, mwwjwto At Swn! Mwv nulug svkangv hoo nulug svtamv.

¹²At Sw ngulam mwwpa dukun; mwv ngulam lvqc citayin; mwv Israelwg namlongam lvqc citayin; mwv Aaron gv nombungam lvqc citayin;

¹³anyo-koi jaqkam mwlwngv, hiyv At Swn bosdvn ham mwv lvqc citayin.

¹⁴Nulam la nulug ko tulungam, At Sw vi yaiya go jignvka!

¹⁵Swcw-nyodongam Pwnbo, At Sw nulam lvqc cignvka!

¹⁶Doangv At Swg lvpwngv, hvbmabde swcwngam nyia ko tulu gab jipa kun.

¹⁷Sik bov At Swn paqma dvn, ho jimy-jema nyookub ikbov paqnyi kuram.

¹⁸Hvbmabde ngulv At Swn paqtayin sija mood soqgv nwrba gob. At Swn paqto!