Read Nyishi MWMIN NWSWR 116 Bible Online

MWMIN NWSWR 116 - Nyishi bible

MWMIN NWSWR 116

¹Ngo At Swn abydvn, hoggab mwv ngoqg yalam hoo ngoqg aya mwwpa tvbwk hvl xumnam mam tapa kunum.

²Hoggab mwv mwwg nyurungam ngoqgab pwrga jinum, hoqgab ngoqg swwl dood deedib ngo mwam xuml dootayin.

³Sigwg toggoqkv ngam hwwiyumnum; Sux-ywlw nyookwg lomduq dvb vc cimnamv ngam nootul apnum; ngam vs-axaq bvla vcjaqb vc cimnum.

⁴Hoqgab ngo At Swg eminam goqnum: “At Swa, ngo xumdwn, ngoqg yvjam ywwlin tvb!”

⁵At Sw, anya ngvla jvqtwngv, ngulam Pwnbov aya mwwpa dvn.

⁶At Sw damdam boam cuml apdvn; hwdlo ngam mvgeq yikho mwv ngam ywwlinum.

⁷Ngoqg yvja, hookur tuku, noqg doonu kob; hoggab At Sw noqg lvgab naleq dvb nyij paku

⁸Hoggab ngoqg vnyiq nyiqs dinam hoqgv, ngoqg dwqtubl geqnam hoqgv, no ngoqg yvjam sig hoqgv naalin paku;

⁹Swwl dookwg nyook lo ngo At Swg agaho gaql yvmin tayin.

¹⁰Ngo agam goodu sujaqkam, ngo mwwjwnum, “Ngo vcjaqb duqtwr duqnum”;

¹¹Ngo atam beol benum, “Nyia ko mwlwngv vm mvvn bov.”

¹²Hoggv ngo jook buiyu At Swn mwwg ngam lai-kai dvb nyij kunam sam?

¹³Ywwlin bo pvtaqkam ngo joorab tayin hoo At Swg eminam goqtayin,

¹⁴Mwwg nyiilu mwlwg dookumko ho ngo pvxwl At Swn xumtayin.

¹⁵Mwwg xuqnam tulungv siyi kukam At Swg kaagaho xinam jaqkv.

¹⁶At Swa, ngo noqg kanam tanbov; ngo noqg kanam tanbov, noqg paqnwg ko tuupv. Ngam leenam mam no poqsuq jipa ku.

¹⁷Ngo nam paqyalinco paqnam pwram jitayin hoo At Swg eminam goqtayin.

¹⁸Mwwg nyiilu mwlw dookumko ho ngo pvxwl At Swn xumtayin

¹⁹Jerusalema, At Swg nam pvbia ho, nulug pengko ho. At Swn paqto!