Read Nyishi MWMIN NWSWR 118 Bible Online

MWMIN NWSWR 118 - Nyishi bible

MWMIN NWSWR 118

¹At Swn paqyalinco paqto, hoggab mwv aldo; ho mwwg tumab abynamv nwrba gob dooyu dvn!

²Israelam bemto, “Mwwg tumab abynamv nwrba gob dooyu dvn.”

³Aaron gv nombungam bemto, “Mwwg tumab abynamv nwrba gob dooyu dvn.”

⁴At Swn bos bo tulungam bemto, “Mwwg tumab abynamv nwrba gob dooyu dvn.”

⁵Ngoqg hentwr-kaas hoqgv At Swn ngo goqnum; At Sw ngam tapanum hoo ngam naalinum.

⁶At Sw ngoqg nyemaqb daqdwn; ngo bos kuram. Nyiv ngam hog mvnyi tayin?

⁷At Sw ngoqg nyemaqb daql ngam svka bov; hiyv ngam oyum dvn hoq aoho ngoqg mviya deenam mam kaagaq dvn.

⁸Nyiingam svqtin mamlin sam At Swg ho cwwgwnamv alyadwn.

⁹Lvpw atwg ko tuupam svqtin mamlin sam At Swg ho cwwgwnamv alyadwn.

¹⁰Nyob mwlwngv ngam hwwiyumnum; At Swg emin ho ngo bulam mvpaqnum!

¹¹Bulv ngam hwwiyumnum, ngam tag-loosaqb hwwiyumnum; At Swg emin ho ngo bulam mvpaqnum!

¹²Bulv ngam tong hvb hwwiyumnum; bulv taa-haataqkam wm gunam hvb wnum; At Swg emin ho ngo bulam mvpaqnum!

¹³Ngam vcjaqb tuuduqnum, hoqgab ngo tabtonum, hvbmabde At Sw ngam svkanum.

¹⁴At Sw ngoqg atorv hoo ngoqg beminv; mwv ngam ywwlin bob nyipa ku.

¹⁵Ywwlinam hemp beminv jvqtw bo doogw tuluho doonam: “At Swg lvqbwq alaqkv laqtor jaqdvn,

¹⁶At Swg lvqbwq alaqkam vcjaqb paqdwn, At Swg lvqbwq alaqkv laqtor jaqdvn!”

¹⁷Ngo siram, hvbmabde ngo torl dootayin, hoo At Swg bon nyinam tulungam xid kaatayin.

¹⁸At Sw ngam sisv twqb gwrnyiaq pakun, hvbmabde ngoqg ao lo mwv ngam sim dvb jima pakun.

¹⁹Ngam jvqtw toggoqkam mvko jipan, hoq toggoq tuluho ngo haanyi tayin hoo At Swn paqyalinco paqtayin.

²⁰Soq si At Swg toggoqkv; hoqb jvqtw bov haatayin.

²¹Ngo nam paqyalinco paqdwn no ngam birwq jigam gab hoo ngam ywwlin bob nyipa ku.

²²Nam mvnbo tulug haqpaq kunam wlwngv swwrw rwwda gobya nyipa ku.

²³Soq si At Swg nyinamv; soq si ngulug vnyiq kaaga lo swrdorxeq gob nyidwn.

²⁴Soolog aal si At Swg pwnamv; ngulv hwnyir-hvmar hoo ham mwwngam tuj.

²⁵At Swa, ngulv xumdwn, ngulam ywwlin tvb! At Swa, ngulv xumdwn, ngulam niqtuq lengm dvb jila bv!

²⁶At Swg eminb hiyv haadwn hv xinam jaqkv! At Swg namlo hoqgv ngulv nam paqdwn.

²⁷At Sw Pwnbov, hoo mwv mwwg hutongam pwnum ngulug aoso huum dvb. Pwr jitanam mam svxa lvgab hoqtu to, ho ham yugw batam namgub rwqa to!

²⁸No ngoqg Pwnbov, hoo ngo nam paqyalinco paqtayin; no ngoqg Pwnbov; ngo nam paqtayin.

²⁹At Swn paqyalinco paqto, hoggab mwv aldo; hoggab mwwg tumab abynamv nwrba gob dooyu dvn!