Read Nyishi MWMIN NWSWR 119 Bible Online

MWMIN NWSWR 119 - Nyishi bible

MWMIN NWSWR 119

¹Hiyvg lamtangv timb dvb nyima dvn, hoo hiyv At Swg pvvb lo wdwn hv xinam jaqkv!

²Hiyv mwwg pvvb tulungam pvvdwn, hoo hiyv bulug hvvjw-hara lvgab mwam meegaq dvn hv xinam jaqkv,

³hiyv nyixaqnam mamkam nyima dvn, hvbmabde mwwg lamtab wdwn!

⁴Noqg tomswrnam mam hingky jaqb pvvm dvb no gaml jipa kun.

⁵Noqg pvvb tulungam pvvgam gab ngoqg lamta mwlwngam hwngkwb dvb pvvm tvbv!

⁶Noqg gaml jilinam mwlwngam ngoqg vnyiqkv tuugab lala baloqkam, ngo hvnyw dvb nyiram,

⁷Ngo noqg jvqtw pvvb tulungam cengnyi kun, ho ngo nam jvqtw hang hoqgv paqtayin.

⁸Noqg pvvb tulungam ngo pvvtayin; ngam apaq looda maabv!

⁹Tuudy-yaamiv hoggub nyil bulug lamtangam dvrwqb pvvnyi tayin? Hv noqg gaml bekjaqb nyil swwb nyiloqkam.

¹⁰Ngoqg hvvjw-haara loqgv ngo nam meegaq dvn; noqg gaml jinam tulu hoqgv ngam gaqxar mvmabv!

¹¹Nam ngo ceebio baql nyic nyima dvb, ngo noqg agam mam ngoqg hang si pvvcuml ap pakun.

¹²At Swa, no xinam jaqkv; noqg gamlam ngam tomswr tvb!

¹³Noqg agam pvvb tulungam ngoqg nvbcwr soqgv ngo bibwq dvn.

¹⁴Nyet-nyeram vigo tvnam hvbkalam, noqg pvvb tulug bij-nyijam ngo hemp dvn,

¹⁵Noqg tomswrnam mam ngo mwwi-mwwmil mwwtayin hoo noqg lamta tuluho ngoqg vnyiqkv tuugab dvn.

¹⁶Noqg pvvb tuluho ngo hemp dvn; noqg agam mam ngo mwwpa maab nyiram.

¹⁷Noqg kanam tanboam naleq dvb mvtbv, ho ngo swwnyi yinpv hoo noqg gamlam pvvtayin.

¹⁸Ngoqg vnyiqkam mvko tvb, ho ngo noqg pvvb hoqgv swrdorxeq pagoq tulungam kaatayin.

¹⁹Swcw nvg aoso ngo nyiinv; noqg gaml tulungam ngoqg hoqgv kvs maabv!

²⁰Noqg pvvb tulungam ngoqg yvjv lwxiam mwungul doodwn.

²¹Hiyv noqg pvvb tulungam juqboam, no kwr-kor boam, modu maanam akam yolu ruqdwn.

²²Ngoqg soqgv haqpaqnam mam la modu mins maanam mam naapaq to, hoggab noqg pvvb tulungam ngo pvvdwn.

²³Lvpw atwg ko tuup tulungv ngam ceebio baql alman boam nyidwb mwwsjaqkam, noqg kanam tanbov noqg pvvb tuluho mwwi-mwwmil dootayin.

²⁴Noqg pvvb tulungv ngam hemp pom dvn; hoq tuluhv ngam tomswr-hony bov.

²⁵Ngoqg yvjv diicw olumgob nyiyi ku; noqg agam gookjaqb ngam swwgam jitbv!

²⁶Hwdlo ngo ngoqg lamtangam betam yin, no ngam birwqnum; noqg pvvb tulungam ngam tomswr tvbv!

²⁷Noqg tomswrnam pagoqkam ngam cenglaq mvdwb jitwb, hoo noqg swrdorxeq nyis nyinam tulungam ngo mwwi-mwwmil mwwtayin.

²⁸Ngoqg yvjv mwwdwq ko-gab jiqpaq duku; noqg agam gookjaqb ngam ator jitwb!

²⁹Ngoqg soqgv xaalyo bongam aadob mvpaqto hoo noqg pvvbam ngam anya jaqb tomswr tvb!

³⁰Ngo dengkybo lamtangam xuqpa kun; ngo noqg pvvb tulungam ngoqg agaho pvvpwn.

³¹Ngo noqg pvvb tuluho guugab dvn, At Swa; ho ngam hvnyw-harko lo vlwq maabv!

³²Hwdlo no ngoqg hangam pwt dvb mviyin, noqg gaml jikjaqb ngo xartayin!

³³Ngam tomswr tvb, At Swa, noqg pvvb tulu lamtangam; hoo vtwr-anya nagub ngo ham pvvtayin.

³⁴Ngam cenglaqkam jitbv, ho ngo noqg pvvbam pvvnyi tayin hoo ham ngoqg hvvjw-hara bumpw lvgab ngo nyitayin.

³⁵Noqg gaml jik lamta tuluho ngam wgtvb, hoggab hoqho ngo hemp dvn.

³⁶Noqg pvvb tuluho ngoqg hang sam hingw mvtbv, hoo atgab rvvsw mvma dvb!

³⁷Ximanam pagoqho ngoqg vnyiqkam rogab mvmabv; hoo noqg lamta tuluho ngam swwgam jitwb.

³⁸Noqg dingrnam mam noqg kanam tanboam cimpw mvtbv, ho nam bos kamyi nvpv.

³⁹Ngoqg bos jaqdvb nyimurnam mam wkur mvto, hoggab noqg pvvb tulungv aldvn.

⁴⁰Kaato, noqg tomswrnam mam ngo svnga dvn; noqg jvqtwngv ngam swwgam jidwn! Hua

⁴¹At Swa, noqg tumab abynam mam, noqg dingrko jaqb noqg ywwnam mam ngoqgab haam tvb;

⁴²ho hiyv ngam nyirj dvn mwwg gab ngo birwqnanv dootayin, hoggab noqg agamho ngo mwwgw dvn.

⁴³Hoo ngoqg agam soqgv jvqtw agam mam vcwr gokam naapaq maabv, hoggab ngoqg svqtinamv noqg pvvb tuluho doodwn.

⁴⁴Ngo noqg pvvbam nwrba cwtam hoqgv nwrba gob pvvky tayin,

⁴⁵hoo ngo rooto bo nyook ho wtayin, hoggab ngo noqg tomswrnam mam meegaqnum.

⁴⁶Noqg nyij-mujam lvpw atwg agaho ngo kam gootayin hoo hvnywram,

⁴⁷hoggab noqg gaml jinam tuluho ngoqg hempam ngo kaapa dvn, hoqham ngo aby dvn.

⁴⁸Noqg gaml jinam tuluho ngoqg alaqkv ngo irab dvn, hoqham ngo aby dvn, hoo noqg pvvb tuluho ngo mwwi-mwwmil mwwtayin.

⁴⁹Noqg hvvkiam noqg agam ho mwwpa tvbka, hogloq ho no ngam svqgw dvb mvdwn.

⁵⁰Ngoqg duqtwr-duqyikam soq si ngam jamp mvdwn, ho noqg dingrnamv ngam swwgam jidwn.

⁵¹Kwr-kor bov ngam vcjaqb bej-bepar dvn, hvbmabde noqg pvvb hoqgv ngo wi ram.

⁵²At Swa, kolwg hoqgv hwdlo ngo noqg pvvb tulungam mwwka yin, ngo haat dvn.

⁵³Nyic-nyia gab ngam nyimurg hang lengnamv og rusuq dvb parl apnam, hiyv noqg pvvbam apaq dvn.

⁵⁴Ngoqg svmcw doonu ko namho noqg pvvb tulungv ngoqg beminb nyinum.

⁵⁵At Swa, noqg eminam aiyam ngo mwwpa dvn, hoo noqg pvvbam pvvdwn.

⁵⁶Soq lvqc cinam si ngoqgab haapa ku, ho noqg tomswrnam tulungam ngo pvvpa kun.

⁵⁷At Swa ngoqg naadynamv; noqg agam tulungam pvvdwb ngo dingr dvn.

⁵⁸Noqg mwwswnam mam ngoqg hvvjw-hara mwlw lvgab ngo mwwl tox dvn; noqg dingrko jaqb ngam anya mwwpa tvb.

⁵⁹Hwdlo ngo ngoqg lamta tulungam mwwkayin, noqg nyij-muj tuluho ngoqg lvpiangv wkur dvn;

⁶⁰Noqg gaml jinam tulungam pvvdwb nyikwq-nyiwq maab hoo ngo nyebiab wnum.

⁶¹Nyicig osongv ngam pwd-poto mutum sujaqkam, noqg pvvbam ngo mwwpa maab nyiram.

⁶²Noqg jvqtw pvvb tulungam, ngo ai ywlywngam gorabl nam paqdwn.

⁶³Hiyv nam bosdvn ngo bulug ajinv, bulv noqg tomswrnam mam pvvdy bov.

⁶⁴At Swa, swcw so, noqg tumab abynamv naleq do; noqg pvvb tulungam ngam tomswr tvbv!

⁶⁵At Swa, noqg agam gookjaqb, noqg hvvky lvgab no aljaqb nyinum.

⁶⁶Alwb pw-hwwnam mam la cenglaqkam ngam tomswr tvb, hoggab noqg gaml jinam tuluho ngo mwwjw dvn.

⁶⁷Ngo duqtwr duqma taab otuqb ngo gaqxarl wleqnum, hvbmabde sija ngo noqg agam mam pvvdwn.

⁶⁸No aldo ho alboam nyido; noqg pvvb tulungam ngam tomswr tvb.

⁶⁹Kwr-kor bov ngam vm mvvpup pa, hvbmabde noqg tomswrnam mam ngoqg hvvjw-hara uraho ngo pvvtayin;

⁷⁰bulug hangv oxam mwwby maanam hvb nyido, hvbmabde noqg pvvb ho ngo hemp dvn.

⁷¹Ngoqg duqtwr-duqnam si ngoqgab al tvba, ho noqg pvvb tulungam cengtayin.

⁷²Lwwyw-lwwywb hunam la rupam ngoqg doognam mam alyadwn noqg agam hoq pvvbv.

⁷³Noqg alaqkv ngam ywrmwq-ywrwb ywrnum; ngam mwwlaqnam mam jinam ho ngo noqg gaml jinam tulungam cengdwn.

⁷⁴Hiyv nam bos bo tulungv ngam kaal hwnyir-hvmar tayin, hoggab ngo noqg agam ho mwwgw dvn.

⁷⁵At Swa, ngo ceng do, noqg pvvb tulungv jvqtw bov, hoo dengky gab no ngam duqtwr duqmnum.

⁷⁶Noqg dingrko jaqb noqg hvvkiam noqg tumab abynamv ngam jamp mvdwn.

⁷⁷Noqg aya mwwpanam mam ngoqgab haam tvb, ho ngo swwnyi tayin; hoggab noqg pvvb lo ngo hemp dvn.

⁷⁸Kwr-kor boam hvnyw-har mvmto hoggab bulv ngam xaalyo lvgab nyixaq nyinum; ngoqgab nyiloqkam, noqg tomswrnam mam ngo mwwi-mwwmil mwwtayin.

⁷⁹Hiyv nam bos bo tulungam ngoqgab hookur mvto, ho noqg nyij-mujam bulam cengm dvb.

⁸⁰Noqg pvvb tuluho ngoqg hangam timb mvmabv, ho ngam hvnyw mvmabv!

⁸¹Noqg ywwlinam mam ngoqg yvjv mwung dvn; noqg gaml ho ngo mwwgw dvn.

⁸²Noqg dingrnam mam ngoqg vnyiqkv kvvnw do; ngo tox dvn, “Hwdlo no ngam jamp dvb mvtayin?”

⁸³Hoggab ngo wm ho opo uppum mam rvmxwnam hvb nyinum, hvbjaqkam noqg pvvb tulungam ngo mwwpa maab nyima dvn.

⁸⁴Hog hwdgo noqg hvvkiv cwqla tayin? Ngam nyob pan boam hwdlo no pw-hwwtayin?

⁸⁵Kwr-kor bov ngoqgab ung roql appa; bulv noqg pvvb bekjaqb swwl dooma.

⁸⁶Noqg gaml jinam mwlwngv kvxaqram; bulv ngam xaalyo lvgab nyob pado; ngam svka tvb!

⁸⁷Bulv ngam kviyaq goda lo swcw soqgv twrm tado, hvbmabde noqg tomswrnam mam ngo apaq maadwn.

⁸⁸Noqg tumab abynam ho ngam swwgam jidwn, ho noqg agam bicw-nyicwngam ngo pvvtayin.

⁸⁹At Swa, nwrba gob, ao lvpw ho noqg agamv birwl apnamv biimab doodwn.

⁹⁰Mwlw hotam nagub noqg dengkynamv dooyu dvn; no swcwngam bvl pwnum, hoo hv hwngkwb daqdwn.

⁹¹Noqg xuqbwq ko-gab soq aal nagub daqdwn, hoqgab hog mwlw luucw-luut si noqg hvvkiv.

⁹²Noqg pvvbv ngoqg hempwb nyima nyiloqkam, ngoqg duqtwr-duqyikho ngo sik banpv.

⁹³Noqg tomswrnam mam ngo nywywngam mwwpaqram, hoggab hoq tuluho no ngoqg swwgam jipa kun.

⁹⁴Ngo noqgv; ngam ywwlin tvb, hoggab noqg tomswrnam mam ngo meegaqnum.

⁹⁵Nyicbongv tooiyal ngam twrdwb kaaya do, hvbmabde noqg nyij-mujam ngo mwwdwn.

⁹⁶Ngo mwlwngam pwbw dvb anyo go kaapanum, hvbmabde noqg gaml jinamv vc-loodab koi do.

⁹⁷Oa noqg pvvbam ngo hog hwdgo aby dvn! Soq si aal loopwngam ngoqg mwwi-mwwmil mwwnamv.

⁹⁸Ngoqg ceebio tulungam noqg gamlv ngam mwwlaq yaadwb mvpa, hoggab soq si kuiyum nagub ngoqg lvgab doodwn.

⁹⁹Ngam tomswrbo mwlw yaangam ngo viyago cenglaq yaapaku, hoggab noqg nyij-mujam ngo mwwi-mwwmil mwwdwn.

¹⁰⁰Noqg tomswrnam mam ngo pvvgam gab, ngo nyi axangam koi yaab cenglaq yaadwn.

¹⁰¹Noqg gamlam pvvdwb, ngo almanbo lamta mwlw hoqgv ngoqg lvpiangam siqkur dvn.

¹⁰²No ngam tomswrko gab, noqg pvvb tulu hoqgv ngo daqi maadwn.

¹⁰³Noqg gaml tulungam ngo dvkayin hwdgo tiiswrdo, ngoqg agam lo hv tong ngolangam tiibin yaadwn!

¹⁰⁴Noqg tomswrko hoqgv ngo cenglaqkam naadwn; hoqgab xaalyo lamta bvvxiam ngo oyum dvn.

¹⁰⁵Noqg gamlv ngoqg lvpiag murv hoo hv ngoqg lamtag hutongv.

¹⁰⁶Noqg jvqtw pvvb tulungam pvvdwb, ngo dingr cikwl dingnum hoo ham pwbw kunum.

¹⁰⁷At Swa, ngo vcjaqb duqtwr-duqdkun; noqg gaml gookjaqb, ngam swwgam jitbv!

¹⁰⁸At Swa, ngoqg jinyib jil paqnam aky tulu sam loorwq tvb, hoo noqg pvvb tulungam ngam tomswr tvb.

¹⁰⁹Ngoqg swwgam ngoqg alaqsi ngo bwwl doodu gvdwn, hvbmabde noqg pvvbam ngo mwwpaqram.

¹¹⁰Nyicbongv ngoqgab pwd-potongam mvl ap pa, hvbmabde noqg tomswrnam hoqgv ngo gaqxaram.

¹¹¹Nwrba gob noqg nyij-mujv ngoqg gumn otungv, hoggab hoq tuluhv ngoqg hangwg hempv.

¹¹²Vtwr-anya nagub, noqg pvvb tuluho nwrba gob nyil swwdwb ngoqg hangv ngo heedaq dvn.

¹¹³Hang pwnyi boam ngo oyum dvn, hvbmabde noqg pvvbam ngo aby dvn.

¹¹⁴No ngoqg kvs sigw ko nyookv hoo ngoqg svtamv; noqg gaml lo ngo mwwgw dvn.

¹¹⁵Almab nyinbo tulu nulv, ngoqg soqgv wleqto, ngoqg Pwnbog gaml jinam mam ngo pvvtayin.

¹¹⁶Noqg dingrko jaqb ngam bwwl doog tvb, ho ngo swwla tayin, hoo ngoqg mwwgw namho ngam hvnyw mvmabv!

¹¹⁷Ngam bwwl doog tvb, ho ngo cumciq yinpv hoo noqg pvvb tuluho modu dudul doodu dvn!

¹¹⁸Noqg pvvb tulungam juqbo bo mwlwngam no haqpaq dvn, hoggab bulug surnamv niqtuq dooma.

¹¹⁹Dupum-dvrab pam haqpaqnam hvb, swcw soqg nyic-nyiabo mwlwngam haqpaq dvn, hoggab noqg nyij-mujam ngo aby dvn.

¹²⁰Nam bosko gab ngoqg aiyaqkv tvmdwr dvn, hoo noqg pw-hwwnam tulungam ngo bosdvn.

¹²¹Hoggv jvqtw dvn hoo kvtaqdvn ham ngo nyitkun; ngam nyijab-nyiyiqbo alaqho ngam apaq maabv.

¹²²Noqg hvvkiam albo dingrnam mam jitbv; kwr-kor boam ngam nyijab-nyiyiq mvmabv.

¹²³Noqg ywwnam mam hoo noqg jvqtwb dingrwl niqtuq nyilinam mam ngoqg vnyiqkv tuury-tuul doodwn.

¹²⁴Noqg tumab abynam hvbjaq noqg hvvky lvgab nyinto, hoo noqg pvvb tulungam ngam tomswr tvb.

¹²⁵Ngo noqg hvvkiv; ngam cenglaqkam jitbv, ho noqg nyij-mujam ngo cengnyi tayin!

¹²⁶Soq si At Swg nyid moodv, hoggab noqg pvvbam mvpia paku.

¹²⁷Hoqgab hunam koi yaab, albo hunam koi yaab, ngo noqg pvvb tulungam aby dvn.

¹²⁸Hoqgab noqg tomswrnam mwlwngv jvqtw dvn hvl ngo loodwn; xaalyo bo lamta bvvxiam ngo oyum dvn.

¹²⁹Noqg nyij-mujv lomdwb nyido; hoqgab hoq tulu ham ngoqg yvjv pvvdwn.

¹³⁰Noqg taapurnam gaml tulungv huto jidwn; hv damdambo tulungam cenglaq mvdwn.

¹³¹Noqg pvvb tulungam ngo mwung ko-gab, ngoqg agamv gamk tvl saqxeq do.

¹³²Noqg lamta nyij-mujv doomin gvdwn hiyv noqg eminam aby dvn, ngam tobkur gvdwl ngam anya tvbv.

¹³³Noqg dingrko jaqb ngoqg lvpia dwql wnam sam pvvt bv, hoo nyimur-nyicam ngoqg aoso doomyu mvmabv.

¹³⁴Noqg tomswrnam mam ngo pvvnyi yinpv, nyiig nyijab-nyiyiqnam hoqgv ngam pvlyw tvbv.

¹³⁵Noqg nyuqmwg hutongam noqg hvvkig ao lo huum tvbv, hoo noqg pvvb tulungam ngam tomswr tvbv.

¹³⁶Nyiilungv noqg pvvbam pvvma ko-gab, ngoqg vnyiq soqgv nyiqsv pobu hvb tonum.

¹³⁷At Swa, jvqtwngv no su, hoo noqg pvvb tulungv jvqtw dvn.

¹³⁸Noqg nyij-mujam jvqtw hoola mwlw dengky ho no xuqlin pakun.

¹³⁹Ngoqg nyinw-wnwnamv ngam muiyu gviku, hoggab ceebio tulungv noqg gaml tulungam mwwpa kuma.

¹⁴⁰Aljaqb noqg dingrnam mam nyika pa, hoo noqg hvvkiv ham aby do.

¹⁴¹Ngo anyo do haqpaqnamv, hvbjaqkam noqg tomswrnam mam ngo mwwpa maab nyima dvn.

¹⁴²Noqg jvqtwnamv nwrba gob jvqtw dvn, hoo noqg pvvbv jvqtw bov.

¹⁴³Hentwr-kaasv la vcjaqb vcnamv ngam kaapa paku, hvbmabde noqg pvvb tulungv ngoqg hempv.

¹⁴⁴Noqg nyij-mujv nwrba gob jvqtw dvn; ngam swwm dvb cenglaqkam jitbv.

¹⁴⁵Ngoqg hvvjw-hara hoqgv ngo xabdwn; ngam birwq tvb, At Swa! Noqg pvvb tulungam ngo pvvtayin.

¹⁴⁶Ngo nam goqdwn; ngam ywwlin tvb, ho noqg nyij-mujam ngo nyil doonyi yinpv.

¹⁴⁷Ngo poroq lug maatab gorabl svka gab xabdwn; noqg gaml tuluho ngo mwwgw dvn.

¹⁴⁸Noqg dingrnam aoho ngo mwwi-mwwmil mwwdwb, aiyv wnya maatab ngoqg vnyiqkv nyiqbiol huurab dukun.

¹⁴⁹Noqg tumab abynam kojaqb ngoqg yal sam tapa tvbv; At Swa, noqg jvqtwjaq hoqgv ngam swwgam jitbv.

¹⁵⁰Hiyv ngam almanbo pagoq lvgab nyob pata bov bulv ogumb hvvnwqdo; bulv noqg pvvb hoqgv aado do.

¹⁵¹Hvbmabde no ogum dvn, At Swa, hoo noqg pvvb mwlwngv jvqtw dvn

¹⁵²Noqg nyij-mujam oyu hoqgv ngo cengpa kun ho ham no nwrba gob mvp pakun.

¹⁵³Ngoqg duqtwr-duqnam sam kaato hoo ngam naalin tvb, hoggab noqg pvvbam ngo mwwpaqram.

¹⁵⁴Ngoqg pagoq gab xumdwn hoo ngam pvlyw tvb; noqg dingrko jaqb ngam swwgam jitbv!

¹⁵⁵Nyicbo gab ywwlinamv aado dvn, hoggab noqg pvvb tulungam bulv meema dvn.

¹⁵⁶Noqg ayanamv koijaq dvn, At Swa; noqg pvvb tulug birko jaqb ngam swwgam jitbv.

¹⁵⁷Ngam nyob panbov la nyemaqkv vigo doodo, hvbmabde noqg nyij-muj hoqgv ngo biig suram.

¹⁵⁸Mwwjw dooma boam ngo kaatwl haqpaqdvn, hoggab noqg benam mam bulv tama dvn.

¹⁵⁹Noqg tomswrnam mam mwwka to hoggub ngo aby dvn! Noqg tumab abynam hvbjaq ngam swwgam jitbv.

¹⁶⁰Noqg gaml niqtuq si jvqtwngv, hoo noqg jvqtw pvvb tulungv nwrba gob dooyu dvn.

¹⁶¹Pagoq doomab lvpw atwg ko tuupv ngam nyob pado, hvbmabde noqg gaml tulungam bosil ngoqg hangv doodwn.

¹⁶²Dvco conbov naleqg coonwr yukam hwnyir-hvmar namhvb noqg gaml ho ngo hwnyir-hvmar dvn.

¹⁶³Xaalyo sam ngo oyum dvn hoo haqpaq dvn, hvbmabde noqg pvvbam ngo aby dvn.

¹⁶⁴Noqg jvqtw pvvb tulu gab aal lookinam ngo kvn mood go nam paqdwn.

¹⁶⁵Noqg pvvbam hiyv aby dvn hv koijaqb swrso dvn; bulam hiyvkam dwqtub dvb mvnyiram.

¹⁶⁶Noqg ywwlinam mam ngo mwwgw dvn, At Swa, hoo noqg pvvb tulungam ngo nyidwn.

¹⁶⁷Noqg nyij-mujam ngoqg yvjv pvvdwn; bulam ngo vc-loodab aby dvn.

¹⁶⁸Noqg tomswrnam mam la nyij-mujam ngo pvvdwn, hoggab ngoqg lamta mwlwngv noqg agaho doodwn.

¹⁶⁹Ngoqg xabnam mam noqg agaho haam tvbv, At Swa; noqg gaml birko jaqb ngam cenglaqkam jitbv!

¹⁷⁰Ngoqg xumnam mam noqg agaho haam tvbv; noqg gaml birko jaqb ngam naalin tvb.

¹⁷¹Ngoqg nvbcwrv paqyalinco paqlin tayin, hoggab noqg pvvb tulungam no ngam tomswr dvn.

¹⁷²Noqg gamlam ngoqg lyolv bemin betayin, hoggab noqg pvvb mwlwngv jvqtw bov.

¹⁷³Ngam svka dvb noqg alaqkv mwx-mvaq dvn, hoggab noqg tomswrnam mam ngo xuqpa kun.

¹⁷⁴Noqg ywwlinam mam ngo mwung dvn, At Swa, hoo noqg pvvbv ngoqg hempv.

¹⁷⁵Nam paqm dvb ngoqg yvjam swwm tvb, hoo noqg pvvb tulungam ngam svka mvtwb.

¹⁷⁶Sviya gaqxarbo ak hvb ngo gaqxar paku; noqg nyerangam meegaqto, hoggab noqg pvvb tulungam ngo mwwpa maab nyima dvn.