Read Nyishi MWMIN NWSWR 132 Bible Online

MWMIN NWSWR 132 - Nyishi bible

MWMIN NWSWR 132

¹At Swa, Debid ho mwwsw gvdwl, mwwg hentwr-kaas mwlwngam cwql swwnam mam, mwwpa to,

²mwv hoggub At Swn dingrnum hoo pvxwl xumnum Jakubg Pwnboam,

³“Ngoqg nammwb ngo haakram ho ngo yubk hookam yubtab wram,

⁴Ngoqg vnyiqkam ngo yubdwb jiram ho ngoqg vnyiqkam nyiqcw mvkam ram,

⁵hwdlo ngo At Sw gab doogw nyook ak, Jakubg Pwnbo gab, meepa maad deedib.”

⁶Kaato, ham ngulv Iprata ho tapa tukun; ham ngulv Jaarwg rongo tuluho kaat kun.

⁷“Kuj mwwg doodu ko nyookub ngulv wnuj; kuj mwwg lvpia lwkw ho ngulv xumta-paqtuj!”

⁸No la noqg atorbo uddumv, gorabto, At Swa, hoo noqg doonu ko nyookub wtku.

⁹Noqg nyub tulungam dvrwqkam koomto, hoo noqg xuqlinam tulungam hemp goqr romto.

¹⁰Hoggab noqg hvvky Debidg emin gab, noqg xuqlinam ak hoqgv noqg nyuqm mam moiyeq maabv.

¹¹At Sw Debidnvn jvqtw dingrnam ak dingnum hoq dingrnam hoqkv mwv wkuram: “Noqg imiq hoq nyega ko akwn ngo noqg pwqlw dootam ho doosiq mvtayin.

¹²Noqg nyega ko tulungv ngoqg birnam mam pvvb nyiloqkam hoo ngoqg nyij-muj tulungam ngo bulam tomswr tayin, bulug nyega ko tulu ngvkam nwrba gob noqg pwqlw dootamho dootayin.”

¹³Hoggab At Sw Jaiyonam xuqlin pakun; mwv sam mwwg doogw ko nyookub mwwbwq pakun:

¹⁴“Soq si nwrba gob ngoqg doodu ko nyookv; so ngo doogw tayin, hoggab sam ngo mwwbwq pakun.

¹⁵Ngo mwnwg dvs-twwsam naleqgo lvqc citayin; ngo mwnwg jwwgwngam dvnam-twwnam lvgab xumt mvtayin.

¹⁶Mwnwg nyub tulungam ngo ywwnam vj lvgab koom tayin, hoo mwwg xuqlinam tulungv hemp goqr rotayin.

¹⁷Hoqho ngo Debid gab vrrw lo ak hwrlin mvtayin; ngoqg xuqlinum ak gab ngo mur puug mwx-mvaq pan.

¹⁸Mwwg ceebio tulungam ngo hvnyw vjam koom tayin, hvbmabde mwwg aoho mwwg ywr dumtupv huutayin.”