Read Nyishi MWMIN NWSWR 145 Bible Online

MWMIN NWSWR 145 - Nyishi bible

MWMIN NWSWR 145

¹Ngo nam vcjaqb paqtayin, ngoqg Pwnboa hoo Lvpw ata, hoo noqg eminam nwrba cwtam hoqgv nwrba gob paqtayin.

²Aal looxiam nam ngo paqtayin hoo noqg eminam nwrba cwtam hoqgv nwrba gob paqtayin.

³At Sw koijaq dvn, hoo koijaqb paqdwb nyidwn, hoo mwwg koinam mam miic lama dvn.

⁴Ko hosiq akwg hoqgv hosiq akwn gob noqg nyis tulungam bisiqtayin, hoo noqg koijaqb bon nyinam tulungam bibwq tayin.

⁵Noqg xinamv vcjaqb yuul kangam dvn, hoo noqg swrdorxeq nyis nyinam tulungam, ngo mwwi-mwwmil mwwtayin.

⁶Bulv noqg atorb swrdorxeqb bon nyinam tulungam agam gootayin, hoo noqg koinam mam ngo bibwq tayin.

⁷Bulv noqg yuunam albongam bepor tayin hoo noqg jvqtwnam mam vcjaqb bemin betayin.

⁸At Sw anya dvn hoo aya mwwpa dvn, haaxaq xaqla maadwn hoo tumab abynamv naleq dvn.

⁹At Sw mwlwngam aldvn, hoo mwwg pwnum mwlw aoho mwwg aya mwwpanamv doodwn.

¹⁰Noqg nyis nyinam mwlwngv nam paqyalinco paqtayin, At Swa, hoo noqg xuqlinam mwlwngv nam paqtayin!

¹¹Bulv noqg lvpw-hatig yuunam mam agam gootayin hoo noqg huqlwngam betam tan,

¹²noqg lvpw-hatiam vcjaqb yuunam kangam mam, hoo noqg koibo bon nyinam tulungam nyia ko tulungam cengm pakun.

¹³Noqg lvpw-hativ kuiyum nagub dooyu bo lvpw- hativ, hoo noqg swwgnamv ko hosiq mwlwho dooyu dvn [At Sw mwwg agam goonam mwlwngv dengky dvn hoo mwwg nyis tulungv nyitaq mwlwho anya dvn.]

¹⁴At Sw yoql bo tulungam nootul doogdvn hoo pvxwl xumn bo tulungam mwlwngam daqrab mvdwn.

¹⁵Mwlwg vnyiqkv nam kaadwn, hoo no bulug dvsam bulam moodho kvxaqmab jidwn.

¹⁶No noqg alaqkam taakoq jidwn; no swwl doonbo vxig mwwbynam mam xumt dvb jidwn.

¹⁷At Sw mwwg lamta mwlwho jvqtw dvn hoo mwwg nyis tulungv nyitaq mwlwho anya dvn.

¹⁸At Sw mwlwngam ogum dvn hiyv mwam goqdwn, mwlwngv hiyv mwam jvqtwb goqdwn.

¹⁹Mwam bos bo tulug mwwbynam mam mwv niqtuq nyilin mvdwn; mwv bulug xabnam mamkam tapal, bulam ywwlin dvn.

²⁰At Sw mwlwngam pvvl apdvn hiyv mwam aby dvn, hvbmabde nyicbo mwlwngam mwv twrtayin.

²¹Ngoqg agamv bel At Swn paqtayin, hoo swwn bo mwlwngv mwwg dvrwqbo eminam nwrba cwtam hoqgv nwrba gob paqto.