Read Nyishi MWMIN NWSWR 147 Bible Online

MWMIN NWSWR 147 - Nyishi bible

MWMIN NWSWR 147

¹At Swn paqto! Hoggab ngulug Pwnboam paql bemin benam si aldo; hoggab paqnam bemin benam si, hempnam jaqgo.

²At Sw Jerusalem mam mvdwn; mwv Israelwg nyob xipa maanam tulungam bookum dvn.

³Mwv hang mwwdwqnam mam mwp dvn hoo bulug un tulungam puuj dvn.

⁴Takar tulungv hog hwdgo doodwn ham mwv xirab dvn; bulug emin mwlwngam mwv bulam emin mindwn.

⁵Ngulug At Sw koijaq dvn, hoo huqlwngv naleq dvn; mwwg mwwlaqnam mam xinya lama dvn.

⁶At Sw yanboam joorab dvn; mwv nyic boam deela lo joopaq dvn.

⁷At Swn paqyalinco paqto bemin to, ngulug Pwnbon tangam bo rwwxw xwwjto!

⁸Mwv doangam doomwq lvgab pulup dvn; mwv swcw gab nyodongam hom dvn; mwv nwmwngam yorn tuluho swwm dvb mvdwn.

⁹Mwv svdin tulungam bulug dvsam jidwn, hoo poaq hoi xabn bo tulungam dvsam jidwn.

¹⁰Mwwg hempnamv svpurg ator hooma, ho mwwg hempnamv nyia kog lvpia tulu hooma,

¹¹hvbmabde At Sw hemp dvn hiyv mwam bosdvn, hiyvg svqgwngv mwwg tumab abynam lo doodwn.

¹²At Swn paqto, Jerusalem no! Noqg Pwnboam paqto, Jaiyona!

¹³Hoggab mwv noqg toggoq tulug dvvcw tulungam ator mvdwn; mwv noqg ko tulungam noqg uralo lvqc cidwn.

¹⁴Noqg door-doopw tulungam mwv swrso dvb mvdwn; mwlwngam alyanbo wtw ammam nam mwv jidwn.

¹⁵Mwwg pvvbam swcw so mwv kanam dvn; mwwg agamv nyebia jaqb xardwn.

¹⁶Mwv tapam mam svcaq hvb puulu dvb mvdwn; mwv wm mui hvb puulu boam cwrsaq-twqb taadwn.

¹⁷Mwwg dvrwq cojorbo tapam mam vmwq yumgub hurl dvn; hiyv mwwg swkwr agaho daqnyi tayin?

¹⁸Mwwg gomcwram mwv kanam namlin dvn, ho bulam jiqm dvn; mwwg dooiyam mwv yimdvn hoo iss tulungam tom dvn.

¹⁹Mwwg agamv Jakubnvn mwv bibwqpan; mwwg gamlam la pvvb tulungam Israelam bibwqpan.

²⁰Mwv soq sib nyob tulug lvgab nyimanum; bulv mwwg pvvb tulungam cengma taa. At Swn paqto!