Read Nyishi MWMIN NWSWR 16 Bible Online

MWMIN NWSWR 16 - Nyishi bible

MWMIN NWSWR 16

¹Ngam hoocum tvb, Pwnboa, noqg uraho ngo cwwgw dvn.

²Ngo At Swn bedwn, “No ngoqg At Swv; nam apaq peel ngo hog akam alyanbo dooma dvn.”

³Gvda soqg xuqbwqnam tulungv, bulv xinam jaqkv, bulug aoho ngo hemp podwn.

⁴Hiyv asaq pwnboam xuqdwn bulgab hentwr-kaasv vi yaiya tayin; bulug hijum pwr jikho ngo jibaram ho bulug nyiiminam ngoqg agam so bepa kuram.

⁵At Sw ngoqg xuqbwql naadynamv hoo ngoqg twwn nanv, ngoqg swwgam no bvvl doogdvn.

⁶Ngoqgab aljaqnbo nyookam vrr rwlin jipa; hoqgab ngo albo xinam nvmcwngam naapkun.

⁷Ngo At Swn paqdwn hiyv ngam tomswr-hony dvn; aiyamkam ngoqg hangv ngam mwwpa mvdwn.

⁸Ngo At Swn lwxiam ngoqg otuqb doom dvn; hoggab mwv ngoqg lvqbwq taqc si doodwn, ho ngo nywywngam biiram.

⁹Hoqgab ngoqg hangv mwwngam do, ho ngoqg hog mwlwngv hwnyir-hvmar dvn; ngoqg gv aiyaq ngvkam swrsob doodwn.

¹⁰No ngam Sux-ywlw nyook nagub ludum maabv, ho noqg dvrwqbo akam sig ungngam kaapa mvmabv.

¹¹No ngam swwgwg lamtangam kaakin pan; no dooba yukam vcjaqb hempv doodwn; noqg lvqbwq taqc ho doon bongv nwrba gob hemp potayin.