Read Nyishi MWMIN NWSWR 17 Bible Online

MWMIN NWSWR 17 - Nyishi bible

MWMIN NWSWR 17

¹At Swa, jvqtw pagoq gab tatbv; ngoqg xabnam sam tvmw maabka; ngoqg vm mvvmabo agam soqg swgwnam sam tagab yaatbv.

²Ngam pw-hwwtanam mam noqg galoqkv hwwdar tvb; noqg vnyiqkv jvqtwngam kaamto.

³No ngoqg hangam hengka sujaqkam, no ngoqg dookub aiyam haal kaas jaqkam, no ngam pooka-yirka jaqkam, no hog meeparam; ngo bepkunv ngoqg agam lo bimur doomram.

⁴Nyia kog bonam nyinam mwlwngam kaaba lo, noqg agam gomcwr hoqgv ngo yolu-swcin lamta hoqgv apaq pakun.

⁵Ngoqg hengab jaqb noqg lamta lwqkap dwql wikam; ngoqg lvpiangv duleq maadwn.

⁶Pwnboa, nam ngo goqyikam, no ngam birwq tayin; noqg nyurungam ngoqg daiyab pwrar gvdwl, ngoqg gomcwr sam tapa tvbv.

⁷Noqg tumanam abiam lomdwb kaakin to, nam cwwgwbo tulungam bulug nyemaq hoqgv noqg lvqbwq alaqkv ywwlin dvn.

⁸Noqg vnyiq kaagaho ngam noqg kvvlwq jaqnam akwb pvvtwb; noqg alap tulug uraho ngam lobyum tvb,

⁹nyicbo hoqgv hiyv ngam yolu gob nyimdvn, ho ngam ura jaqb ceebio baql mengdwb hwwiyum do.

¹⁰Bulug hangho aya mwwpa nan dooma; bulug agam lvgab bulv larl-xaal agam gootwqdvn.

¹¹Bulv ngam ruqtin layil sija ngam doqyum paku; bulv ngulam deela golo, vmwq-yumgub mvdwb kaal doodo.

¹²Mwv sony nyot ak soogam gamnam hvb gamtws mwwdo, sony nyot nyopangv toos tvl cimwql mvtws mwwnam hvb nyido.

¹³Daqrab to, At Swa, no mwam dvmrwq to, mwam mwwn nyinto! Noqg lyoqr orioq lvgab ngoqg yvjam nyic hoqgv naalin tvb.

¹⁴At Swa, noqg alaqkv nyi tulu hoqgv ywwlin tvb, nyi tulu hoqgv hiyvg swwnam palgon soq swwg so doodwn. No bulug kepo ho gumn lvgab bwwr mvmto; bulv ko tulu lvgab xumto; hoo bulug laleq-kaakeq kam bulug ko tulungam apaq jidkun;

¹⁵Ngoqgab nyiloqkam, ngo nyiidar nyib nyitwl noqg nyuqm mam kaatayin; hwdlo ngo huurab yin noqg hvbjaq nyik gab ngoqg hangv xumt tayin,