Read Nyishi MWMIN NWSWR 18 Bible Online

MWMIN NWSWR 18 - Nyishi bible

MWMIN NWSWR 18

¹Nam ngo abydvn, At Swa, no ngoqg atorv.

²At Sw ngoqg dvgw lwwnv, ngoqg gurumv hoo ngam ywwlin bov, ngam Pwnbov, ngoqg dvgw lwwnv mwwg ho ngo cwwgw dvn, ngoqg svtamv, ngam ywwlin bo tuuliv, ngoqg ator torgwngv.

³Ngo At Swn goqnam, mwv xid-paqdwb nyidwn, hoo ngam ngoqg nyemaq tulu hoqgv ywwlin pan.

⁴Sigwg osongv ngam hoqtu paku; diidwr issiv ngam tolup paku;

⁵Sux-ywlw nyookwg osongv ngam hoqtu paku; sigwg potongv ngam hoqtu paku.

⁶Ngoqg vcjaqb vs-axaq yikho At Swn goqnum; ngam Pwnboam svka tvbwk hvl sogoqnum. Mwwg dvrwq namlo hoqgv mwv ngoqg goqnam yalam tapanum, hoo ngoqg mwam xabnamv mwwg nyuru lo wcnum.

⁷Hoqkv mwwg hang leng gam gab; kediv tvmdwrl hwqnum hoo yorn puutug gwwlam kam bosnv hwqdinum.

⁸Mwwg nyupum hoqgv mwkv juucanum, mwwg agam hoqgv guxbo wmv bioqlin do; xvwr jwr-jwrbo wm mopiongv mwwg hoqgv bioqlin do.

⁹Mwv doa aongam xumk layil hoo ipoqnum; kan twdwqkv mwwg lvc koro uraho doonum.

¹⁰Mwv Cerubim akwg aoho aob jarnum; ho mwv dooi alap hoqgv nyebia jaqb jaranum.

¹¹Mwv kanam mwam pulup kodwb mvnum, ho mwwg sipaiyv kan twdwq bo doomwq iss hvb hwwiyumnum.

¹²Nyodo taa ngvla wm mopiog hutongv mwwg doomwq hoqgv mwwg agaho buqko lengnum.

¹³At Sw ao tolokam doogum gumdwn, hoo Pwnbov mwwg yal goqlinamv, nyodo taa bvla wm mopiob nyidwn.

¹⁴Hoo mwwg uppuqkv ablin banv, bulam cwrsaq-bvraq twqb mvnum; mwwg hutongv dulwql hoo bulam ruqpaqnum.

¹⁵At Swa, noqg nyupum saqlinamv buqpurnv noqg yolu ruqkho, sa-svlog silam mam kaapa mvnum, hoo gvda gvtwg gwwl tulungv asarnum.

¹⁶Mwv ao toloqkv ijinv mwv ngam nootunum; mwv ngam koibo iss ura hoqgv seelinum.

¹⁷Ngam ator yaanbo nyemaq hoqgv hoo oyum bo hoqgv, mwv ngam ywwlinum; hoggab bulug atoram ngo hampeq lakmanum.

¹⁸Ngoqg vs-axaq moodam bulv ngam ruqanum; hvbmabde At Sw ngoqg saqtamnamv.

¹⁹Mwv ngam rooto bo nyook ho boolinum; mwv ngam ywwlinum, hoggab mwv ngoqg ao lo hempnum.

²⁰Ngoqg dvrwq ko-gab At Sw ngam nyijnum; ngoqg dvrwqbo alaq nyijongam mwv aky keenum.

²¹Hoggab ngo At Swg lamtangam kvxaqmab pvvl apnum, hoo ngo nyic-nyia nyil ngam Pwnbo galoqkv wleq maanum.

²²Hoggab mwwg pvvb tulungv ngoqg aga lo doonum, ho mwwg pvvb tulungam ngo juqbo maanum.

²³Ngo mwwg agaho timb dvb nyimanum, hoo ngo nyimur hoqgv atam pvvgin sunum.

²⁴Hoqgab ngoqg dvrwq ko-gab At Sw ngam aky keenum, ho ngoqg alaqkv dvrwq ko-gab mwv kaapanum.

²⁵Anyaboam noqg anyangam kaakin do; timb dvb nyimabo nyi akam no timb maanam mam kaakin do;

²⁶Dvrwq boam no atv dvrwqb kaakin do; hoo nyic boam noqg kor-ronam mam kaakin dvn.

²⁷Hoggab no yanbo nyiilungam ywwlin dvn, hvbmabde larn boam anyo dvb mvl dvn.

²⁸Hoggab no su ngam huto mur jinbov; ngam Pwnbo, At Sw, ngoqg kanam hutob huum dvn.

²⁹Noqg ator hoqgv nyemaq acam mam mviya dvn, ho Pwnbog svka hoqgv ngo luuyongam juqbo nyotayin.

³⁰Soq Pwnbo si—mwwg lamta si kvtaq jaqdo; At Swg pvvbv jvqtwngam kaakin dvn; hiyv mwam cwwgw dvn hoqgab mwv svtamv.

³¹Hiyv Pwnbov, hvbmabde At Sw twq? Hoo ngulug Pwnboam apaq peel hiyv lwwn pwt akv?—

³²hoq Pwnbo hv ngam honyil atoram torg dvn, hoo ngoqg lamtangam timb dooma dvb mwjnum

³³Mwv ngoqg lvpiangam sudum lvpia ak hvbjaq mwjnum, hoo ngam yorn ao puutu ho hwngkwb daqm dvn

³⁴Mwv ngoqg alaqkam nyob palaq dvb pvswr dvn, hoqgab ngoqg alaqkv dvvcw illiam-bwwlaq tayin.

³⁵Noqg ywwlin nan svtam mam no ngam jiknum, hoo noqg lvqbwq alaqkv ngam svkanum; noqg dengkynamv ngam koi dvb mvnum.

³⁶No ngam noqg rooto bo nyook uraho ngam gaql yvmin mvdwb jinum, hoo ngoqg lvpiangv duleq maadwn.

³⁷Ngoqg nyemaq tulungam ngo ruqmin gvl nootunum; hoo ngo bulam mingtwr maady deedib wkur kumanum.

³⁸Ngo bulam ximwql mvnum, hoqgab bulv gorab rabnyi maanum; bulv ngoqg lvpia lwkw lo haaknum.

³⁹Hoggab no ngam ator jaqb nyob pan nanam jinum; ho ngam ceebio baql daqrab boam no ngoqg niikum urab holwq mwjnum.

⁴⁰No ngoqg nyemaq tulungam ngoqg galoqkv langkwb tobkurl kem dvb mvnum, hoo hiyv ngam ceebio baqnum ham no twrnum.

⁴¹Bulv svka kaak dvb xabnum, hvbmabde hiyvkam bulam ywwlin bo doomanum; bulv At Swn xabl konum, hvbmabde mwv bulam goorwq maanum.

⁴²Ngo bulam vmwq-yumgub jwwnum, dooiyv diimwram baql wgnam hvb; ngo bulam vly lyobu lo suiyu yuumaq yuupaqnam hvb mvnum.

⁴³Nyiilug ngam laqm-baqm tanam hoqgv no ngam naalin pakun; no ngam nyob luuxig pengko ho lvpw at gob mvpa kun; ngoqg cengka maanam nyiilungv ngoqg nyerab swwknum.

⁴⁴Bulv ngam tapa kalam ngoqg benam mam bulv tanum; nyoodo nyiilungv ngam bosil haanum.

⁴⁵Nyoodo nyi tulug hang haakamv niinum, hoo bulug gurum cwwgw hoqgv tvmdwr dwrjol haanum.

⁴⁶At Sw doodwn, hoo ngoqg lwwn pwtv xinam gob nyinka, ho ngam ywwlin bo, Pwnbov koi nvka.

⁴⁷Pwnbov ngoqgab rvvlwq bov hoo nyiilungam ngoqg ura lo doom dvb munyiub kunum;

⁴⁸hiyv ngam ngoqg nyemaq tulu hoqgv ywwlin bov; vvjaq subo ngoqg nyemaq aoho no ngam koidvb mvca jipkun; no ngam yolu-swcin nyi hoqgv ywwlinum.

⁴⁹Hoqgab, nam ngo paqtayin, At Swa, nyob luuxig pengko ho, hoo noqg eminam bemin betayin.

⁵⁰Koijaqb ywwlinam mam mwv mwwg lvpw atam, hoo tumanam abiam mwwg xuqnam akam, Debid nvla mwwg ko hotam mam nwrba gob jil kaakin dvn.