Read Nyishi MWMIN NWSWR 19 Bible Online

MWMIN NWSWR 19 - Nyishi bible

MWMIN NWSWR 19

¹Doa aongv Pwnbog yuunam mam bekin do, hoo mwwg alaq hoqgv ywrmwq-ywrwb ywrnamv cwwnyiaq-doonyiaq aotv betam do.

²Aal loocw lootv agam goolin do, hoo ai yubcw-yubtv cenglaqkam cengm do.

³Agam goolin maasu, ho gomcwr gokam dulin maasu. Bulug yalamkam tapa maasu.

⁴Hvbsujaqkam bulug yalv swcw nvg aoso, hoo bulug gomcwrv gvda gvt ywwtwr nagub wpy do. Bulam mwv doonyi gab nyodo bvgam mam gvmj pan,

⁵paada akv mwwg pwqlw hoqgv lengnam hvbkalam, hoo ator jaqn bo nyi akv xarka suklo hemp pol xarnam hvb nyidwn.

⁶Soq caalinam si doa nvg ywwtwr hoqgv hoo soq si bulam ywwtwr namgub hwryum dvn, hoo hog luugkam soqg og hoqgv kvsko dooma dvn.

⁷At Swg pvvbv pwbw jaqdvn, yvjam huurab mvm dvn; At Swg gaml si jvqtwngv, hv nyinyo nyiingam mwwlaq mvdwn;

⁸At Swg tomswrnam tulungv jvqtwngv, hangam hemp pom dvn; At Swg gamlv dvrwqdvn, vnyiqkam nyiqbio dvb mvdwn.

⁹At Swn bosnamv dvrwqdvn, nwrba gob biima dvn. At Swg pvvb tulungv jvqtw dvn, hoo hoq mwlwngv dvrwqjaq dvn.

¹⁰Hoq tuluhv hunamkam koi yaab mwwby yaanamv, hoo aljaqnbo hun hamkam; tong ngoiyap hoqgv tong-ngola dilinbongam kam tiiswr yaadwn.

¹¹Hoq tulu aoho mwwg nyerangam hvvmin mvdwb beonum; soq tulu sam hiyv tvjwl swwdwn hv koibo lvqcam naadwn.

¹²Hiyv atwg nyixaqkam cengla nyotayin? Ngoqg kvsil nyimurnam tulu hoqgv ngam nyedar tukub.

¹³Noqg nyerangv cingdum tvl larn nyic nyinam hoqgv mvtur tvb; hoq tulu ham ngam mviya mvmabv! Homoloq ngo timb maanam bvla koiywb nyimurbo nyiib nyima tayin

¹⁴Ngoqg agam goonam sam la ngoqg hang mwwnam sam noqg loorwqnam gob nyim tvb, At Sw, ngoqg lwwnv hoo ngam ywwlin bov.