Read Nyishi MWMIN NWSWR 21 Bible Online

MWMIN NWSWR 21 - Nyishi bible

MWMIN NWSWR 21

¹At Swa, noqg atorho lvpw atv hwnyir-hvmar dvn, hoo noqg ywwlin ko-gab mwv vigo hwrcwb hemp podo!

²No mwwg hang mwwbynam mam jipan hoo mwwg agam hoqgv nam xumnam mam no parl ap jima.

³Hoggab no mwam koi jaqb lvqc cil kvvrwq paku; mwwg dumpo ao lo no dvrwqbo hun ywr dumtupam tulwq jipa ku.

⁴Mwv nam swwgam konum, ham no mwam jinum, swws aalam nwrba cwtam hoqgv nwrba gob jipa kun.

⁵Noqg ywwlinam galoqkv, mwwg yuunamv koijaq dvn; no yuunam mam la xitor-xilongam mwwg aoho jilwqpan

⁶Hoggab no mwam nwrba xaqb lvqc cil jipa kun; noqg doomin gvgam gab no mwam mwwngam lvgab hemp dvb mvpa kun.

⁷Hoggab lvpw atv At Swn mwwjw dvn, hoo Pwnbog tumab abynam hoqgv mwv hwngkwb doodwn.

⁸Noqg alaqkv noqg nyemaq tulungam meelin tayin; noqg lvqbwq alaqkv hiyv nam ceebio baqdwn ham meelin tayin.

⁹Hwdlo no daqlin yin bulam no wm xvwr jwr-jwr xaanam hvb xaam tayin. At Swg hang lingtwr-twryanamv bulam mengpaq tayin, hoo wmv bulam gupaq tayin.

¹⁰Swcw nvg aosoqgv no bulug ko hosiqkam twrm tayin, hoo nyia ko pengko hoqgv kam mvpaq tayin.

¹¹Bulv nam ceebio baql nyic nyidwb mwwsjaqkam, bulv almab nyidwb ywrsjaqkam, bulv hwdlo lajaqkam niqtuq lengram.

¹²Hoggab no bulam langkwb kikur dvb mvtayin; noqg uppuqkv bulug nyuqm mam tuugab jinjin tayin.

¹³At Swa, noqg ator hoqgv nam yuudo! Ngulv noqg atornam sam bemin lvgab paqtayin.