Read Nyishi MWMIN NWSWR 22 Bible Online

MWMIN NWSWR 22 - Nyishi bible

MWMIN NWSWR 22

¹Ngoqg Pwnbo, ngoqg Pwnbo, hoggab jaq no ngam apaq pakun? Ngam ywwlin dvb hoggab no aadojaq pakun, ngoqg sigin ginam agam soqkv!

²Ngoqg Pwnbo, ngo aalam xabnam, hvbmabde no ngam tapa ma; hoo aiyamkam, hvbmab doonu ko kaapa kuma.

³Hvbjaqkam no dvrwqdvn, Israelwg poqkum dvb mvknam akv.

⁴Ngulug ab tulungv noqg aoho hingwnum; bulv hingwnum, hoo bulam no boolinum.

⁵Bulv nam xabnum, hoo bulam ywwlinum; bulv noqg aoho hingwnum hoo bulam hvnyw-har dvb pvvmanum.

⁶Hvbmabde ngo topumv, hoo nyia ko ma; nyi kongv mvnyi-mviyanum hoo nyiilungv xima pan.

⁷Ngam kaapa bo mwlwngv ngam bej-bepar do; bulug agamv ngam nobc-nabya do, bulug dumpongv dumpwq do

⁸“Mwv At Swg aoho hingjw do; mwv mwam naalin mvmto; mwv mwam ywwlin mvmto; hv hvblo mwwg aoho mwv hemp do!”

⁹Hvbmabde no twq ngam annwg mamb hoqgv naalinum; ngoqg annwg oc twwdwk hoqgv ngam hingwl nam swwm dvb mvnum.

¹⁰Ngam dwrbuqd aal hoqgv jaq ngo nam mwwgw dvn, hoo ngoqg annwg mamb hoqgv no ngoqg Pwnbov.

¹¹Ngoqg galoqkv aado maabv, hoggab hentwr-kaasv hvvnwq duku, svka bo akkam dooma.

¹²Hvvb nwqga bongv vigo ngam doqyum do, Basanwg atorbo hvvbv ngam hwwiyum do;

¹³Bulv gamk-toto tvl bulug agamv, sony nyotv hoggub dvnwl dugum-gumnam hvb ngam nyidu do.

¹⁴Ngo iss toopaq namhvb nyidku, hoo ngoqg alo mwlwngv rusuq-rwraqnum; ngoqg hangv takin hvb nyido; hoq si ngoqg hvvjw-haara ura lo jiqpa ku;

¹⁵ngoqg atorv deekam pwcw kaqnam hvb kaqpa ku, hoo ngoqg lyol lyoro tooktv kaqtin paku; no ngam sigwg diimwr aoho joop paku.

¹⁶Iky tulungv ngam hwwiyum paku; nyic nyinbo acamv ngam gooyum paku; bulv ngoqg all-alaqkam nwqpeq-nwqyeq paku-

¹⁷Ngo atwg alo mwlwngam xila duku- bulv ngam nyiqrin kaagin kaalayil roggab jinjin do;

¹⁸bulug pengko lo ngoqg vjam hormin sunam, hoo ngoqg vj gab bulv tak kaado.

¹⁹Hvbmabde no, At Swa, aado kiyo mabka! No ngam svka bov nyebiab haag dvl ngam svka tvb!

²⁰Ngoqg yvjam lyoqr orioq hoqgv mvtur tvb, ngoqg xinam swwgam ikig ator hoqgv ywwlin tvb!

²¹Ngam sony nyotwg agam hoqgv ywwlin tvb! No ngam talin vrrw hoqgv ywwlin paku!

²²Ngoqg vbw-bor any-bwrm tulungam noqg eminam betam tayin; nyi mwlwg dookumko pengko ho nam ngo paqtayin:

²³No hiyv At Swn bosdvn, mwam paqto! Jakub ko hosiq nul mwlwngv, mwam yuupw mvmto, Israelwg ko hosiq nul mwlwngv, mwam bosil daqto.

²⁴Hoggab nyelin dors bo nyelin dorsiyam mwv mwwnyi-mwwiyal ho apaq maadvn, hoo mwv mwwg nyuqm mam mwwg hoqgv pvvs maadwn, hvbmabde hwdlo mwv mwam xabyikam mwv tapanum.

²⁵Nyi vijaqg dookumko ho ngoqg paqnamv noqg galoqkv haadwn; mwam bosbo nyi tulug agaho ngoqg dingrnam mam nyitayin.

²⁶Nyelin-dors bov dvtwl hang xumt tayin; hiyv mwam meekar dvn bulv At Swn paqm tayin! Nulug hangv nwrba gob swwn ka!

²⁷Swcw soq cuukiq-bvrw mwlwngv mwwpa tayin hoo At Sw gab hookur tayin, nyob luuxig dvparv noqg agaho xumtayin.

²⁸Hoggab lvpw atwg atorv At Sw gv, hoo mwv nyob luuxig aoho pvvb bwwl doogdvn.

²⁹Swcw soq swwn-geenbo mwlwngv dvtwl mwam xumtayin; hoo ked haady bo mwlwngv mwwg agaho xumtayin, ho atwg swwgab pvvnyi maanbo tulu hvvkam.

³⁰Swwsiq deenbov kam mwam bon nyijtayin; hoodu bo ko hosiqkam At Swg pagoqkam bekin dvb nyitayin;

³¹Ko bwwma daqnam nyiilungam bulv haalayil mwwg ywwlinam mam mwv nyig nukun hvl bekin tayin.