Read Nyishi MWMIN NWSWR 25 Bible Online

MWMIN NWSWR 25 - Nyishi bible

MWMIN NWSWR 25

¹At Swa, nam, ngoqg yvjam gvqlwq gviyin.

²Ngoqg Pwnbo, nam ngo hinjw dvn; ngam hvnyw ko ho haamabv; ngoqg nyemaq tulungam ngoqg aolo hwrcw mvmabv.

³Hvbmabde, noqgab hiyv kaaya dvn ham no hvnyw ko ho haamram; hiyv niqtuq doomab nyic-nyia nyidu dvn, bulam hvnyw mvnum.

⁴At Swa, noqg lamtangam ngam cengm dvb mvtwb; noqg lamtangam ngam tomswr tvb.

⁵Ngam tomswrl, hoo noqg jvqtwho ngam wgtvb, hoggab no ngoqg ywwlin bo Pwnbov; noqgab ngo aal loopwngam kaaya dvn.

⁶At Swa, noqg ayanam mam, hoo noqg tumab abynam mam mwwpa labka, hoggab soq tulu si otuq hoqgv dooca pakun.

⁷Ngoqg nyijwr-yaapa ho nyic nyinam tulungam ho ngoqg nyimur nyinam mam mwwpa mabka; At Swa, noqg alko pagoq gab, noqg tumab abynam hvbjaq ngam mwwpa labka!

⁸Albov la jvqtwngv At Sw gv; hoqgab nyic nyinbo tulug lamta ho mwv tomswr dvn.

⁹Mwv yanbo tulungam wgdvn hoggv jvqtw dvn, hoo mwwg lamtangam yanboam tomswr dvn.

¹⁰At Swg lamta mwlwngv tumab abynamv la dengky jaqdvn, hoggab hiyv pvvdwn mwwg pvvbam la mwwg gamlam.

¹¹At Swa, noqg emin gab, ngoqg nyimur sam apaq tvbka, hoggab si vijaqpa.

¹²Hiyv nyiv At Swn bosdvn? Mwam mwv tomswr tayin hogloq lamtangam mwv xuqbwq dvb nyidwn.

¹³Mwwg yvjv doongamko ho dootayin, hoo mwwg ko hosiqkv nyooksam otub bwsiq tayin,

¹⁴At Swg ajinv hiyv mwam bosdvn, hoo mwwg pvvbam cengm dvb bulam mwv mvdwn.

¹⁵At Swg taqcib ngoqg vnyiqkv kaal doodwn, hoggab mwv ngoqg lvpiangam wswq hoqgv pulin tayin.

¹⁶Ngoqg taqlwb doqkur gvdwl ngam anya mwwpa tvb, hoggab ngo si vp-cwkwb duqtwram duqdu dvn.

¹⁷Ngoqg hangwg hentwr-kaasv vi yaiya do, ngam mwwdwq-saqk hoqgv boolin tukub,

¹⁸Mwwka tvbka ngoqg duqtwr duqnam mamla hentwr-kaasiam, hoo ngoqg nyic mwlwngam apaq tukub.

¹⁹Mwwkato hog hwdgo ngoqg nyemaqkv doodo, hoo hognvk yolu gabjaq bulv ngam ceebio baql oyum dvn.

²⁰Ngoqg yvjam rvky gvdvl, ngam ywwlin tvb! Ngam hvnyw ko ho haam mabka, hoqgab noqg ho ngo cwwgw dvn.

²¹Lootwb swwnamv la jvqtwngv ngam pvvl ap tvbka, hoggab ngo nam kaaya dvn.

²²Israelam la mwwg hentwr-kaas mwlw hoqgv pvlyw bo, Pwnboa.