Read Nyishi MWMIN NWSWR 29 Bible Online

MWMIN NWSWR 29 - Nyishi bible

MWMIN NWSWR 29

¹Paqto At Swn, ao lvpw tolo doonbo mwlwngv, paqto At Swg yuunam mam la atoram.

²Paqto At Swg yuunam eminam paqdy sanam mam; xumto At Swg dvrwqb yuunam ho.

³At Swg yal dunamv iss aoho doodo; Pwnbog yuunamv doogum gumnam hvb nyido, At Sw mwv mwlw iss aoho doodwn.

⁴At Swg yal dulinamv ator jaqdo; At Swg yal dulinamsi yuunam jaqgo.

⁵At Swg yal dulinamv Sidar svvnam dwrmwq-dwrkaq mvdvn; At Sw Lebanonwg Sidar svvn tulungam dwrmwq-dwrkaq mvdvn.

⁶Mwv Lebanonam svv ko pojuq namhvb juqm dvn, hoo Siriyonam talin lengpa hvb mvdvn.

⁷At Swg yal dulinamv taiyam wm bioqnam hvb bioqdwn.

⁸At Swg yal dulinamv nyoro rootaqkam hwqm dvn; At Sw Kades nyorongam hwqm dvn.

⁹At Swg yal dulinamv sudum-svcaram ko bwwm dvn, hoo nyoro roodwngam cwwbin dvb mvdvn; hoo mwwg dvrwqbo namlo mwlwngv mwam sogoql, “Yuum dvn.”

¹⁰At Sw mwv diidwr iss ao hookam doodwn; ho At Sw mwv nwrba gob lvpw at gob doodwn.

¹¹At Sw mwwg nyiilungam ator jignvka! At Sw mwwg nyiilungam swrsongam lvqc cignvka!