Read Nyishi MWMIN NWSWR 31 Bible Online

MWMIN NWSWR 31 - Nyishi bible

MWMIN NWSWR 31

¹Noqg ho, At Swa, ngo cwwgw dvn; hoqgab ngam nywywngam hvnyw-har pagoqb haam maabv; noqg jvqtwngv ngam naalin tvb!

²No ngam tvmw jijaq maab; ngam nyebia jaqb naalin tvb! Ngoqg cwwgw lwwn gob nyitbv, ho atorbo gurumho ngam ywwtbv!

³Hoggab no ngoqg lwwnv hoo ngoqg gurumv; hoo noqg emin gab no ngam wgtvb hoo ngam kaakin tvb;

⁴no ngam naalinum bulug kvsil pwd-poto ngoqgab mvpnam hoqgv, hoggab no ngoqg cwwgwngv.

⁵Noqg alaqho ngoqg yalam gvqlwq gviyin; no ngam pvlywnum, At Swa, dengkybo Pwnboa.

⁶Ngo oyum dvn hiyv niqtuq doomabo apa-taca tulungam xidwn, hvbmabde ngo At Swn mwwjw dvn.

⁷Ngo hwnyir-hvmar tayin hoo mwwngam tayin noqg tumab abynamho, hoggab no ngoqg duqtwr-duqnam mam kaanum; no cengnum ngoqg yvjwg mwwdwq-saqknam mam,

⁸hoo no ngam gvqlwq jima ngoqg nyemaq alaqho; hvbmabde no ngoqg lvpiangam rooto bo nyookub wwm kunum.

⁹At Swa, ngoqg vnyiqkv piorabl kaanyi kuma; ngoqg yvjv la gv vdin nvkam laanyi kuma; ngo si hentwr hindu dvn ngam anya mwwpa tvb.

¹⁰Hoggab ngoqg swwcangv mwwdwq-saqk lvgab swwdu kunum, hoo vnyw-ayab ngo sigin gindu dvn; ngo ator dook ma ngoqg nyimur ko-gab, hoo ngoqg alo ngvkam yaqpaq yuku.

¹¹Hoqgab ngoqg nyemaq tulu mwlwg kaagaho ngo nyimur gob nyinam, ngoqg door-doopw tulu jaqkv ngam nyimur gob kaanam, hoo ajin jinbwngv ngam vcjaqb bosnam; nyiv ngam lyobu lo kaapa yin bulv ngam kaapel kedo.

¹²Sikbo akam mwwpa kumanam hvb ngam mwwpa kumanam; ho ngo dupum-dvrab dubn bo hvb nyiknum.

¹³Ngo vigo bis-bepeqnam mam tapa do— bosnamv taqg loosaqb doodo!— hv ngam lvkin gob ceebio baqnum, ho bulv pwr rwsil ngoqg swwgam naaxa tado.

¹⁴Hvbmabde ngo nam mwwjw dvn, At Swa; ngo bedwn, “No ngoqg Pwnbov.”

¹⁵Ngoqg moodv noqg alaqho doodwn; ngam ywwlin tvb ngoqg nyemaq tulu alaq hoqgv hoo ngam nyob-tok pata bo hoqgv!

¹⁶Noqg nyuqm mam noqg nyera aoho huumto; noqg tumab abynam hoqgv ngam ywwlin tvb!

¹⁷At Swa, ngam hvnyw-harko ho haam maabv, hoggab ngo nam goqdwn; nyic-nyia boam hvnyw-harko ho haam to; bulam cooikab Sux-ywlw nyookub wmto.

¹⁸Vm mvvn nan, modu maab jvqtwngam ceekol agam goon nan hoo larl modu mins maab goon nan agam mam lyokap mvmto.

¹⁹Hwdjaqgo naleq-baceqdo noqg alnamsi, hoqham nam bosbo tulu gab pvvcuml apnum hoo bonam nyijnum hiyv nam cwwgw dvn, ham nyia kog kaagaho kaapanum!

²⁰Noqg bulam dooba ko-gab no bulam pvvsil apnum no bulam boocumnam noqg urab; nyiig pwr rwsil mvta ko hoqgv, nam nyi benyi-beya tanam hoqgv.

²¹Paqto At Swn, hoggab mwv lomdwb kaakin pa mwwg tumab ngam abynam mam hwdlo ngo bopam naareq kunam uraho dooyikho.

²²Ngo atv pwbwb hempa layil besnum, “Ngo aado paku noqg kaaga hoqgv.” Hvbmabde ngoqg aya mwwpa tvbwk hvl xumnam yalam no tapanum hwdlo ngo nam svka tvbwk hvl xabnum.

²³Mwwg xuqlinam nul mwlwngv, At Swn abyto! At Sw dengkybo tulungam pvvl apdvn hvbmabde vcjaqb laqm-baqm dvn hiyv nyiv larl bon nyidwn.

²⁴Ator jaqto, hoo nulug hangv haakam to, nul mwlwngv hiyv xeq At Swn kaaya dvn!