Read Nyishi MWMIN NWSWR 32 Bible Online

MWMIN NWSWR 32 - Nyishi bible

MWMIN NWSWR 32

¹Hoq nyi akv hempnam jaqkv hiyvg nyimuram apaq jiknum, hiyvg nyicam mwrlup jipa kun.

²Hempnamv hogloq nyiam At Sw mwwg nyicam xipa maadkun, hoo hiyvg swwca lo xaalyo lyonamv dooma dvn.

³Hoggab hwdlo ngo cooikab dooikam, ngoqg alo tulungv yuupaqnum ngoqg aal loopwngam sigin ginl doogam gab.

⁴Hoggab aal-aiyib noqg alaqkv ngoqg aoso vgw dvb laqdaqnum; dwr doonyiam xvvtwr namhvb ngoqg atorv sengknum.

⁵Ngo ngoqg nyicam nam ngo bekinnum, hoo ngo ngoqg nyicam kvsil ap maanum; ngo bedwn, “Ngoqg nyicam At Swn bekin tayin,” hoo ngoqg nyimur-nyicam no apaq jinum.

⁶Hoqgab mwwjwbo mwlwngam hwdlo nam meepa laiyinko ho mood xikjaqb nam swgwl pwr jimto; vcjaqb diidwr issiv tojaqkam hv mwam tocram.

⁷No ngoqg kvs sigw ko nyookv; no ngam vs-axaq hoqgv pvvl apdvn; no ngam doqyuml goqr rol naalin dvn.

⁸Hogloq lamtab wiyin dvn ngo nam tomswr tayin; ngoqg vnyiqkv nam kaagab lalal ngo nam tomswr-hony tayin.

⁹Hoqgab no svpur hvbla svdam cenglaq maab nyinam hvb nyimabv, hiyvg atoram agam tag bvla lvpia dudinam lvgab mutur dvn, hvb nyima baloqkam bulv noqg ogum doola ram.

¹⁰Mwwdwq mvqlw yaagwn hv nyic nyigam gab, hvbmabde tumanam abiv hwwiyum gvgdo hiyv akv At Swn mwwgw dvn.

¹¹At Swg ho hempto, hoo hwnyir-hvmar to, jvqtw bo tulungv, hoo jvqtw hang baqnbo nul mwlwngv, hemp goqram roto.