Read Nyishi MWMIN NWSWR 33 Bible Online

MWMIN NWSWR 33 - Nyishi bible

MWMIN NWSWR 33

¹At Swg aoho, hemp goqram roto, jvqtw bo tulunga! Paqnamv jvqtw bo gab niqtuq doodwn.

²Gungga twqg dvl At Swn paqyalinco paqto, tan sooiyw bo rwwxw lvgab mwam guuly anyangam liito!

³Mwwg gab nit bemin lo beto; rwwxw-gungga mvlaqbo lvgab vcjaqb dulin mvmto.

⁴Hoggab At Swg agamv jvqtw dvn, hoo mwwg bonam nyinam hog mwlwngv dengky jaqdvn.

⁵Mwv dvrwqkam la jvqtwngam abydvn; swcw nvg ao si At Swg tumab abynamv naleq go doodo.

⁶At Swg agam hoqgv ao nyookam pwlin pan; hoo mwwg benam hoqgv doonyi-takar hog mwlwngam lengm pan.

⁷Mwv sa-svlog issam hwwcuml appan; ham noosu uraho pvvcum apdvn.

⁸Swcw nvg aosoqg mwlwngv At Swn bos to; ho gvda gvt aoso doonbo mwlwngv mwam bosil dooto!

⁹Hoggab mwv agam benum, hoo hv lengnum; mwv gaml jinum, hoo hv biimab doodwn.

¹⁰At Sw gvda gvtwg tomswr-honynam mam niqtuq dooma dvb mvdvn; mwv nyiilug nyit-wtws mwwnam mam niqtuq dooma dvb mvdvn.

¹¹At Swg tomswr-honynamv nwrba gob doodwn, mwwg hang nyidwb mwwnamv ko hosiq-hosiq xaqb doodwn.

¹²Xinamv hoq nyob gab hiyvg Pwnbov At Sw, hiyvg nyiilungam mwwg gumn gob xuqlin pan!

¹³At Sw ao toloqkv kaal dvn; mwv nyia ko mwlwngam kaadwn;

¹⁴swcw nvg aoso doonbo hog mwlwngam mwwg doogw lvpw hoqgv mwv dootwl kaapa dvn,

¹⁵mwv nyi vxig hangam ywrpan hoo bulug bon nyinam mwlwngam kaadwn.

¹⁶Lvpw atv mwwg sipai mvqlw hoqgv ywwlin maadwn; nyob paky bo akv mwwg ator hoqgv naalin maadwn.

¹⁷Nyob pan nan svpuram ywwlinam mam mwwgwnamv mwwsam dvn, hoo hvkwg atornam hoqgv ywwlin nyoram.

¹⁸Kaato, At Swg vnyiqkv kaagab lala dvn hiyv mwam bosbo aoho, ho hiyvg mwwgwngv mwwg tumab abynam ho doodwn,

¹⁹ho bulug yvjam sig hoqgv mwv naalin dvb nyitayin, hoo bulam dwr-kano moodam kam swwl doom dvn.

²⁰Ngulug yvjv At Swn kaaya yaal doodwn; mwv ngulug svkangv hoo ngulug svtamv.

²¹Ngulug hangv mwwgho hemp dvn, hoggab ngulv mwwg dvrwqbo eminlo mwwjw dvn.

²²At Swa, noqg tumab abynam mam, ngulug aoso doom tvb, hoggub nyilakam ngulv nam mwwgw dvn.