Read Nyishi MWMIN NWSWR 34 Bible Online

MWMIN NWSWR 34 - Nyishi bible

MWMIN NWSWR 34

¹Ngo lwxiam At Swn paqtayin; mwam paqnamv ngoqg agam lo topaqmab paql dootayin.

²Ngoqg yvjv At Swg lvgab larl doodwn; hoqgab yanbov tapal hoo hemp pomto.

³Ngoqg lvgab At Swn yuum to, hoo kuj ngulv lvkin gob mwwg eminam yuum tuj!

⁴Ngo At Swnvn meegaqnum, hoo mwv ngam birwqnum hoo ngoqg bos mwlw hoqgv ngam naalinum.

⁵Hiyv mwam kaadwn hv mwlwngv huutayin, hoo bulug nyuqmv nywywngam hvnyw ram.

⁶Soq anya-asar bo nyi si xabnum, hoo At Sw mwv tapanum hoo mwam vs-axaq mwlw hoqgv ywwlinum.

⁷Hiyv mwam bosdvn At Swg gumtwngv hwwiyuml doognam hoo bulam naalin dvn.

⁸Hengka to hoo kaaka to At Sw hwdgo aldvn! Hiyv mwam cwwgwl doodwn hoq nyi hv xinam jaqkv!

⁹At Swn bosto, nulv mwwg xuqlinam tulungv, ho hiyv mwam bosdvn hv hog akam xooram!

¹⁰Sony nyot nyopangv dwnw-twwnwl rwwl doodwn; hvbmabde hiyv At Swn meegaq dvn hoq tulu gab albongv nywywngam xooma dvn.

¹¹Kujo ko tulu haato, ngam tato; ngo nulam tomswr tayin At Swnvn bosnam mam.

¹²Hiyv nyiv swwgam mwwby dvn hoo abydvn swwiyu dvb, ho albongam kaapa nwwnbov?

¹³Nulug lyolam bec benam hoo nulug agam xaalyonam hoqgv aadob pvvl apto.

¹⁴Almanbo hoqgv keleqto hoo alboam nyito; swrsongam meegaq to hoo ham swqmin gvto.

¹⁵At Swg vnyiqkv jvqtw bo taqb kaadwn hoo bulug xabnam mam mwwg nyurungv tapa dvn.

¹⁶Almanbo tulungam At Swg nyuqmv moiyeq dvn, bulam swcw nvg aosoqgv mwwpa mvma dvb mvdwn.

¹⁷Hwdlo jvqtw bov svka tvbwk hvl xabyikam, At Sw tapa dvn hoo bulam hog mwlwg vs-axaq hoqgv naalin dvn.

¹⁸At Sw hang mwwgw dook maanbo ogumho dooba dvn, hoo yal doog kuma boam ywwlin dvn.

¹⁹Jvqtw bo tulungv vigo duqtwr-duqdwn, hvbmabde hog mwlwngam hoqgv At Sw mwam naalinum.

²⁰Mwwg alo mwlwngam mwv pvvl apdvn; bulug alo buukin jijaq gonkam dwrtu mvram.

²¹Nyic-nyia boam duqtwr-duqnamv meng tayin, hoo hiyv jvqtwngam oyum boam ham laqm-baqm tayin.

²²At Sw mwwg nyera tulug swwgam pvlyw dvn; hiyv mwwg uraho cwwgw dvn ham ak gonkam laqm-baqm ram.