Read Nyishi MWMIN NWSWR 35 Bible Online

MWMIN NWSWR 35 - Nyishi bible

MWMIN NWSWR 35

¹At Swa, ngam kvceq ceqnboam, kvceq ciqrwqto; hiyv ngam nyob panam hvb kalam nyoblo pvrwqto!

²Svtam-soruqkam gvlayil hoo ngoqg svka gab daqrab tvb!

³Nwwxo-uppuqkam naarabto ngam ceebio baql ruqmin gvnboam ceetor dvb, ngoqg yvjam beto, “Ngo nam ywwlin bov!”

⁴Hiyv ngoqg swwgam ruky-ruiboam hvnyw moolwl har moosa mvto! Hiyv ngam hang baql nyic nyita dvn bulam hampeq maab hoo kikur mvtku.

⁵At Swg gumtwngv bulam ruqmin gvikam, bulam dooi agaho amp hvb nyimto!

⁶At Swg gumtwngv bulam ruqmin gvikam, bulug lamtangam kan bvla halap mvto!

⁷Hog pagoq doomab bulv bulug potongam ngoqgab piqsil apdo; hog pagoq doomab ngoqg swwgam nootu dvb bulv ung ak dul apnam.

⁸Swaq hoa pan hvb sigam mwwg aoho haamto! Hoo mwwg atv piqsil poto peqnamv mwam hoqtu mvmto; mwam hoq ungho yoqlwq mvmto ho mwam simto!

⁹Hooxiq ngoqg yvjv At Swn hwnyir-hvmar tayin, mwwg ywwlinam ho hempnamv

¹⁰Ngoqg hvvjw-harangv betayin, “At Swa, noqg hvb nyinbo hiyv doodwn, laanyi maanbog mwwg hampeq nyomanam hoqgv mwam ywwlin dvn; jwwgw boam la dwc-twwpw maanboam naareq tanam mam ywwlin dvn?”

¹¹Xaalyo bo hvvkiv vigo daqlin do; ngoqg cengmanam pagoqkam bulv ngam vigo toxdo.

¹²Bulv ngam alboam almanwb jikur do; ngoqg yvjv vcjaqb mwwdwq dwqdo.

¹³Hvbmabde ngo nyiloqkam hwdlo bulv vc yukho ngo tuila vjam koonum; ngo atv atam duqtwr duqnv dery reenum; ngoqg dumpongv swqbw si paatin tvl ngo xumnum.

¹⁴Ngo mwwdwq dwqyanum ngoqg ajin hvbla vbw-bor gob; mwwg ann akam nyix-riinam hvb ngo pvxw tvl nyix riidu dvn.

¹⁵Hvbmabde ngo duqtup yin bulv pumkuml hoo hwnyir-hvmar dvn, bulv lvkin gob pumkum layil ngam ceebio baqnum; ngo nudu yaakma hiyam ngoqg cengka maanam nyi mwlwngvkam ngam toxa maab mvcaq-mviyaql mudu do;

¹⁶durum dvkho tac-taiya dvb bej-beparnum hvb, bulug exy ngam koiyin sutwl dvxeq xiqdu do.

¹⁷At Swa, hog hwdgo, no sam kaal dootayin? Ngam boolin tvb bulug twrtanam hoqgv, ngoqg xinam swwgam sony nyot tulug agam hoqgv naalin tvb!

¹⁸Mwlwg dookumko pengko lo ngo nam paqyalinco paqtayin, atorbo mvqlw pengko lo ngo nam paqtayin.

¹⁹Hiyv vcjaqb almab ngam ceebio baqdwn ngoqg aoso hwnyir-hvmar mvmabv, hoo hvbkam nyimabv hiyv ngam pagoq doomab ceebio baqdwn, ham ngoqg aoso vnyiq piorab kaam maabv.

²⁰Hoggab bulv swrso agam gooma dvn hvbmabde hiyv nyook so cooikab doodwn ham ceebio baql bulv xaalyo bo agam mam gool doodwn.

²¹Bulug agamv gamk rooto tvl ngam ceebiob bel doodo; bulv bedwn, “Kv, Kv! ngulug vnyiqkv kaat kun!”

²²No kaapa tvl, At Swa, cooikab kvvmw maabv! At Swa, ngoqg galoqkv aado maabv!

²³Ngoqg Pwnboa hoo ngoqg At Swa, ngoqg pagoq gab, huurabto hoo no atv gorab gvdwl ngam bedar tvb!

²⁴At Swa, ngoqg Pwnboa, ngam bedar tvb, noqg jvqtw kojaqb, hoo bulam ngoqg aoso hwnyir-hvmar mvmabv!

²⁵Bulam bem mvmabv bulug hanglo, “V ngulug hang mwwby kojaqb!” Bulam hvl kam bem mvmabv, “Ngulug agam dvgab mwv haadkun,”

²⁶Hiyv ngoqg dwr-kanongam hwnyir-hvmar dvn bul mwlwngam lvkin gob hvnyw moolw har moosa mvmto! Hiyv bulv ngoqg ao lo vcjaqb ceebio baqdwn bulam hvnyw moolwl hoo kaanyi-tardvb ximanam vjam koomto!

²⁷Hiyv hemp dvn ngoqg jvqtwho hoq tulungv vcjaqb hemp goqram roto hoo mwwngam to hoo hvraq beto, “At Sw koi dvn, hiyv hemp dvn mwwg nyera tulug alwb swwl dook gab!”

²⁸Hoq kokwb ngoqg agamv noqg jvqtwngam bekar tayin hoo nam paqnamv kuiyum nagub dooky nvka.