Read Nyishi MWMIN NWSWR 37 Bible Online

MWMIN NWSWR 37 - Nyishi bible

MWMIN NWSWR 37

¹Almanbo nyiam no mwwdwq maabv; almab nyinbo tulungam kaaneq maabv!

²Hoggab bulv oyu maadab nwmw hvb yaapaq tayin, hoo swwiywq bo nwmwngv sengnam hvb sengtayin.

³At Swn mwwjw to, hoo alboam nyito; gvda so dooto hoo dengkiam ajin jinto.

⁴At Swg ho no atv hemp poto, hoo mwv noqg hang mwwbinam mam nam jitayin.

⁵Noqg pagoq goqxiam At Swn gvqlwqto; mwam mwwjw to, hoo mwv nyitayin.

⁶Mwv noqg dvrwqnam mam baqa jitayin huto hvb, hoo noqg jvqtwngam aal lvpa huto hvb.

⁷At Swg agaho biimab hoo cwqg dvl mwam kaaya to; hiyv akv mwwg mwwlwqb nyilayil nyet-nyeram swwnam mam, ho hiyv nyi akv almab nyilin gvnbo aoho, no mwwdwq maabv

⁸Hang lengnam hoqgv cwqto, hoo hang lingtwr-twryanam mam apaqto! No atam mwwdwq maabv; hv alman rooxongam nyig tayin.

⁹Hoggab almanbo tulungam papaq tayin, hvbmabde hiyv At Swn kaaya dvn hv gvda sam otub bwwsiq tayin.

¹⁰Oyu maadab kokwngam nyic bov dookram; no mwwg dookam hindy jaqb kvvi-kaamil kaas jaqkam, ho mwv dookram.

¹¹Hvbmabde yanbo tulungv gvda sam otub bwwsiq tayin, hoo swrso ho bulv atv naleqb hemp tayin.

¹²Nyic bov jvqtw boam ceebio baqdo, hoo mwwg exiv mwam koiyin sudwn,

¹³hvbmabde, At Sw nyic boam nyirj dvn, hoggab mwwg aalv hoodu do hvl mwv kaal doodo.

¹⁴Nyic bov lyoqr orioqkam seqlinl hoo bulug illiam seea nv laanyi maanboam la dwc-twwpw maanboam mvgeq lodwn, ho hiyvg lamtangv jvqtw dvn ham mengdo;

¹⁵bulug lyoqr orioqkv bulam atwg hanglo nwqlwq tayin, hoo bulug illiv dwrtu taikun.

¹⁶Jvqtw bo anyog gumn doognamv, nyic-nyiabo naleqgo gumn doognam ham alyadwn.

¹⁷Hoggab nyic-nyia bog alaqkv dwrtayin, hvbmabde At Sw jvqtw boam jool doogdvn.

¹⁸At Sw timb dvb nyimabo nyi tulug aalam cengdo, hoo bulug gumnv nwrba gob dootayin;

¹⁹Almanbo moodv haajaqkam bulam hvnyw moolw mvram; dwr-kano moodam kam bulv naleqgo dvmin-twwmin dvn.

²⁰Hvbmabde, nyic-nyia bov yuupaq tayin, At Swg nyemaq tulungv ww hwwtaq hvb jeedwn; bulv nyiitayin bulv wm mwk jupaqnam hvb nyiitayin.

²¹Nyic bov ceedwn hvbmabde jikur maadwn, hvbmabde jvqtw bov jiga alwb jidwn hoo jikur dukun;

²²hoggab hiyam At Sw lvqc cipan hv gvda sam gumn otub bwwsiq tayin, hvbmabde hiyam mwv beenum ham mvpaq tayin.

²³At Sw galoqkv nyi vxig swwkuram mvol apyin, ho mwwg lamtangam mwv hemp dvn;

²⁴mwv yoql sujaqkam, mwv ngurp tvl dooram, hoggab At Sw mwwg alaqkam gagabl doogdo.

²⁵Ngo himib nyinum, ngo sija axa pakun, hvbmabde ngo jvqtw boam apaqnam mam kaapa maata ho mwwg ko tulungv kogaql dvnam kaapa ma.

²⁶Mwv lwxiam haareq jaqb cwwrwq rwqdu dvn, hoo mwwg ko tulungv lvqc cinam gob nyidwn.

²⁷Alman hoqgv keleqto hoo alboam nyito; ho no nwrba gob dootayin.

²⁸Hoggab At Sw jvqtwngam abydvn; mwwg xuqlinam tulungam mwv haqpaqram. Bulam nwrba gob pvvl apnum, hvbmabde nyicbog ko tulungam mvpaq tayin.

²⁹Jvqtw bov gvda sam otub bwwsiq tayin hoo ham nwrba gob dootayin.

³⁰Jvqtw bo agamv mwwlaqkam goolin dvn, hoo mwwg lyolv jvqtwngam goodwn.

³¹Mwwg Pwnbog pvvbv mwwg hang uraho doodwn; ho mwwg lamta mwlwngv hvlap maadwn.

³²Nyic bov jvqtw boam rukar dvn hoo mwam meng dvb meekar dvn.

³³At Sw mwam nyicbog huqlw uraho haam dvb apaqram hvbmab hwdlo mwam nyel pukumho boa yukam mwam alma hvl bemram.

³⁴At Swn kaaya to hoo mwwg lamtangam pvvto, hoo gvdangam gumn otub bwwsiq mvdwb mwv nam swwrab mvtayin; hwdlo nyic boam mvpaqnam mam no kaapa tayin

³⁵Nyic boam la kwr-korbo nyi akam, mwv atam cingpw mvdwn nyookwg svvn swwiywq nyiam-nyiam yuunam mam ngo kaatkun.

³⁶Hvbmabde mwv wpeqnum, hoo kaato, mwv dook maanum; ngo mwam meegaq sujaqkam, kaapa kumanum

³⁷Timb dvb nyimab swwn boam kaagto hoo kaato jvqtw boam, hoggab swrso bo nyi gab kokwngam swwgv dootayin.

³⁸Hvbmabde nyimurbo mwlwngv lvkin gob twrtayin; nyicbog kokwg swwgam mvpaq tayin.

³⁹Jvqtw boam ywwlinam si At Sw galoqkv; hentwr-kaas moodam mwv bulug cwwgwngv.

⁴⁰At Sw bulam svka dvn hoo bulam naalin dvn; bulam nyic hoqgv mwv naalin dvn hoo bulam ywwlin dvn, hoqgab bulv mwam cwwgw dvn.