Read Nyishi MWMIN NWSWR 38 Bible Online

MWMIN NWSWR 38 - Nyishi bible

MWMIN NWSWR 38

¹At Swa, noqg haaxaq yukam ngam yolu ruqmab, ho noqg hang lingtwr yin ngam gwrmab.

²Hoggab noqg uppuqkv ngam vblwq paku, hoo noqg alaqkv ngoqg aosi laqdaq paku.

³Noqg hang leng gam gab; ngoqg gv aiyaqsi swrso dookma; ngoqg nyic nyigam gab ngoqg gvngv alo rooxo paku.

⁴Hoggab ngoqg nyimurv ngam dumpo aob paabo paku; vgwbo vi hvbkalam, soq tulu si ngoq gab vijaqb vgw duku.

⁵Ngoqg nyiidam ko-gab ngoqg unv yaal hoo naiya duku,

⁶Ngo vc loodab mwwdwql pvxwl hoo ngurp kunam; aal loopwngam ngo nyix-riil dooiya dukun.

⁷Hoggab ngoqg taqg-loosaqkv vdiq-axeqkv gudul doodo, hoo ngoqg aiyaqsi swrso dookma.

⁸Ngo laanyi kuma hoo vmwq-akaq paku; ngoqg hang vc cigam gab ngo sigin ginl doodwn.

⁹At Swa, ngoqg hog mwlw svnganamv noqg agaho doodwn; ngoqg koxio-rorwnam mam noqg hoqgv kvs nyoma dvn.

¹⁰Ngoqg hangv vcjaqb duql; ngo ator dookma; hoo ngoqg vnyiq hutongvkam ngoqg galoqkv wnkuba.

¹¹Ngoqg ajin nvla dvpar parkinv ngoqg hentwr dooly soqgv aado daqgin duku, hoo ngoqg lwkw nyiilungv ngoqg galoqkv aadob daqgin paku.

¹²Hiyv ngoqg swwgam mengdy bov bulv poto peql appa; hiyv xeq ngam murm dvb meegaq bov yuupaq mvdwb goodwn, hoo aal looxiam nyic nyidwb mwwi-mwwmil mwwdo.

¹³Hvbmabde ngo ruutarbo nyi hvb nyidwn; ngo tapa kuma, agam goolin maab paca bo nyi hvb nyidwn.

¹⁴Ngo tapa maanbo nyi ak hvb nyidwn, hoo hiyv bamy agam birwq maanbo hvb nyidwn.

¹⁵Hvbmabde noqgab, At Swa, ngo kaaya dvn; no su, ngoqg Pwnbo At Swv, hiyv birwq tayin.

¹⁶Hoggab ngo benum, “Hiyv larl ngam ceebio baqdwn hwdlo ngo duleql geqyikam, bulam ngoqg ao rooxo so hwnyir-hvmar mvmabv!”

¹⁷Hoggab ngo yoqsv twqb nyidku, hoo ngoqg vc cinamv ngoqg aga si lwxiam doodo.

¹⁸Ngo ngoqg nyimuram bekin dvn; ngo ngoqg nyic nyinam mam oa yo mwwdkun.

¹⁹Hvbmabde ngoqg nyemaqkv jaqt jaqpa, ho bulv ator jaqdo, hoo bulv vijaqgo almab ngam ceebio baqsam do.

²⁰Hoq tulungv ngoqg alwb nyinam mam alman boam jikur do ho ngam beedo ngo alboam wmin gvgam gab.

²¹Ngam apaq maabv, At Swa! Ngoqg Pwnboa, ngoqg galoqkv aado maabv!

²²Nyebia jaqb ngam svka tvb, At Swa, ngam ywwlin tvb!