Read Nyishi MWMIN NWSWR 40 Bible Online

MWMIN NWSWR 40 - Nyishi bible

MWMIN NWSWR 40

¹Ngo cwql At Swn kaaya yal doonum; mwv ngoqgab nywwkurnv hoo ngoqg xabnam mam tapanum.

²Mwv ngam sigwg hwrnyi ung suiyu hoqgv seelinum, hoo ngoqg lvpiangam lwwn aoho samtwr mvnam, ngoqg svmgwngam hvvtin dvb mvdwn.

³Ngulug Pwnboam paqnan beminam, mwv ngoqg agam lo nitbo beminam jilwqnum. Nyiv vigo kaatwl hoo bostayin, hoo At Swn bulv mwwjw dvn.

⁴Hiyv nyi akv At Swn mwwg mwwjw dvn, hiyv larkwb tamin gvma dvn, hiyv xaalyo bo kokwb gaqxar maadvn, hv xinam jaqkv!

⁵Ngoqg Pwnbo At Swa, noqg swrdorxeq bon tulungam la noqg ngulug daiyab mwwnam mam, no buqmw mvpan; noqg lvgab hiyvkam juqc nyoram! Soq tulu sam ngo belinl hoo betam tayin, hvbjaqkam hoq tulu ham betam nyiyumsa kuma.

⁶Pwram la aky jinam ho no hemp maado, hvbmabde no ngam tapa nan nyurungam jipa. Boyuqnam aky hoo nyic akiam no looma dvn.

⁷Ho ngo benum, “Kaato; tiqnam kitap uraho ngam xeqp namhvb, ngo si haadwn:

⁸Ngoqg Pwnboa, noqg mwwlwq nyidkub ngo hemp dvn; noqg pvvbv ngoqg hang urasi doodwn.”

⁹Ngo ywwlinam hemp puiyam koibo dookum ho betam dvn; kaato, ngoqg agam mam ngo gomtum maanam, no ceng do, At Swa.

¹⁰Noqg ywwlinam mam ngoqg hang uralo ngo kvsil ap maadwn; noqg dengkynam mam la noqg ywwlinam mam ngo goodwn; ngo noqg tumab abynam mam la noqg dengkynam mam nyi mwlwg dookho ngo bepa maab nyima dvn.

¹¹At Swa, noqgab nyiloqkam, noqg ngam anya mwwpanam mam xutinl ap maatayin; noqg tumab abynam mam la noqg dengkynamv ngam kuiyum nagub pvvl aptayin!

¹²Hoggab alman bov ngam xinya nyoma dvb hwwiywql paku; ngoqg nyimurv ngam mviya paku hoo ngo kaapa nyokma; hoq tuluhv ngoqg dumpo dummam laabo yaadku, ngoqg hangv ngam hoxa gvpa ku.

¹³At Swa, hemp to, ngam ywwlin tvb! At Swa, nyebia jaqb ngam svka tvb!

¹⁴Hiyv ngoqg swwgam meegaql naapaq tadwn hoq tulu ham hvnyw moolw har moosa ko pagoqho lvkin gob vlwqto; ngoqg muur yikho hiyv hempnum hoq tulu ham wkur mvto hoo bulam xima kob boom to!

¹⁵Hiyv ngam, “Aha-Aha hvl tob-tai dvn!” hoq tulu ham hvnyw moolwl pokub-poiyup mvto.

¹⁶Hvbmabde hiyv nam meegaq dvn ham mwwngaml noqg ho hwnyir-hvmar mvmto “Hiyv noqg ywwlinam mam aby dvn ham toxa maab At Sw koi dvn hvl bemto!”

¹⁷Ngo nyiloqkam, jwwgw bvla dwc-twwpw maanbov, hvbmabde At Sw mwv ngoqgab mwwjw dvn. No ngam svka bov la ngam ywwlin bov; oyu maabv, ngoqg Pwnboa!