Read Nyishi MWMIN NWSWR 42 Bible Online

MWMIN NWSWR 42 - Nyishi bible

MWMIN NWSWR 42

¹Sudumv hoggub pobungam mwung dvn, hoq hvbkalam Pwnboa, ngoqg yvjv nam mwung dvn.

²Ngoqg yvjv Pwnbo gab hvngwr ngwrdwn, swwl doonbo Pwnbo gab. Hwdlo yu ngo haalayil Pwnbog agaho daqlin tayin?

³Ngoqg nyiqsv aal-aiyib dvs dvnam hvb nyido, bulv aal loopwngam ngam toxdo, “Hogloq ho noqg Pwnbov?”

⁴Hoggub ngo nyi mvqlwg lvgab wl hoo mvqlw jaqb durum soon boam Pwnbog nammwb hemp goqr bvla paqnam bemin lvgab buiya sool wgnam, soq tulu sam ngo mwwpa yin, ngoqg hvvjw-haarangv mwwdwq do.

⁵Ngoqg yvja, no hoggub hang hodwn, hoo no hoggub ngoqg uraso hendar mvma dvn? Pwnboam svqtin to; hoqgab ngo lokta mwam paqtayin, ngam ywwlin bo

⁶‍hoo ngoqg Pwnbo. Ngoqg ura si ngoqg yvjv hang hodo; hoqgab Jordon nyook soqgv hoo Hermon gvda, Mijar puutu soqgv ngo nam mwwpa dvn.

⁷Noqg bwdw iss tool bo dumnam hv issam issiv goqdo; noqg iss mwlw jaqg hwqnam mvla suduqnamv ngam hinglupl hengbo paku.

⁸Mwwg tumab abynam aalam At Sw mwv gaml jilin do, hoo aiyam mwwg beminv ngoqg lvgab doodwn, ngoqg swwgab Pwnboam swgwnum.

⁹Ngo Pwnboam benam, ngoqg lwwnv: “Hoggub no ngam mwwpa kuma dvn? Ngoqg nyemaqkv mvnyi-mviya ko-gab, hoggab ngam nyix-riidu mvgyin?”

¹⁰Ngoqg alo lo sigwg unnam baqnam hvb, ngoqg nyemaqkv ngam bej-bepar do, bulv aal loopwngam ngam toxdo, “Hogloq ho noqg Pwnbov?”

¹¹Ngoqg yvja, no hoggub hang hodwn, hoo no hoggub ngoqg uraso hendar mvma dvn? Pwnboam svqtin to; hoqgab ngam ywwlin bo hoo ngoqg Pwnboam, ngo lokta mwam paqtayin.