Read Nyishi MWMIN NWSWR 44 Bible Online

MWMIN NWSWR 44 - Nyishi bible

MWMIN NWSWR 44

¹Pwnboa, ngulug nyuru hoqgv ngulv tapa tukun, ngulug ab tulungv ngulam betam pakun, bulug swwca yuk aalho no hognvk bon xeq nyiknum, bulug swwi de aal hookam nyiknum:

²no atwg alaq lvgab no nyob tulungam ruqpaq kunum, hvbmabde no bulam liinum; no nyiilungam duqtwr duqmnum, hvbmabde no bulam toxa jiknum;

³hv hvbaloqkam bulug atwg lyoqr orioq hoqgv bulv gvdangam nyob paiya ko-gab ma, ho bulug atwg alaq hoqgv bulam ywwlin suma, hvbmabde noqg lvqbwq alaq kvla noqg laqpo ngvsu, hoo noqg nyuqmwg huto ngvsu, hoggab no bulug aoho anya mwwpanam.

⁴Pwnboa, no ngoqg Lvpw At Swv; Jakub gab ywwlinam gamlam jinbov!

⁵Noqg ator hoqgv ngulv ngulug nyemaq tulungam tuutab xaadwn; hiyv ngulam daqrabl ceebio baqdwn hoq tulu ham ngulv noqg emin hoqgv caajab dvn.

⁶Hoggab ngoqg illy-uppuqho ngo hingw maadwn, ho ngoqg lyoqr orioq ngvkam ngam ywwlin nyoram.

⁷Hvbmabde no ngulam ngulug nyemaq tulu hoqgv ywwlin pakun hoo hiyv ngulam ceebio baqdwn hoq tulungam hvnyw moolw mvdwn.

⁸Pwnbo aoho ngulv lwxiam larl dookynum, hoo ngulv nwrba gob noqg eminam paqyalinco paqtayin.

⁹Hvbmabde no ngulam haqpaq paku hoo hvnyw moolw mvpa ku hoo ngulug sipai tulu lvgab lengba maanum.

¹⁰No ngulug ceebio hoqgv ngulam wkur mvpa ku, hoo hiyv ngulam oyum dvn bulv yuupaq nukba

¹¹No ngulam sviyangam patab tanam hvb mvpa ku, hoo ngulam nyob asaqg pengko lo cwrsaq-bvraq gob mvpa ku;

¹²Noqg nyiilungam no anyo kob puqpa ku, bulgab koidvb kor paqma.

¹³Ngulug door-doopw hoqgv no ngulam benyi-beya mvdwb mvpan, ho ngulug taqg-loosaqkv ngulam haqpaql hoo bej-beparnum.

¹⁴Nyob tulug pengko lo ngulam no agam dvga gob mvpa ku, nyiilug pengko lo nyirnyi-nyirya dvb mvnum.

¹⁵Aal loopwngam ngam ximanamv ngoqg haabo lo doodo, hoo hvnywngv ngoqg nyuqm mam pulup paku

¹⁶hv hvbaloqkam benyi-beya bvla bej-beparbo yalv dulinam, hang baqnbo gvla ree daqdy bog kaaga lo doodo.

¹⁷Soq mwlw si ngulug aolo haapa ku, ngulv nam mwwpa maab nyima su, hoo ngulv noqg pvvb mwrwl apnam mam vm gokam mvvj kama su.

¹⁸Ngulug hangv mwwxaq maasu, ho ngulug lamta wnamv noqg lamta hoqgv wxaq kama su;

¹⁹hvb nyisjaqkam no ngulam svca cvvdw nyook ho vmwq yumgub mwmwq paku hoo ngulam sigwg kan lvgab pulup paku.

²⁰Ngulv ngulam Pwnbog eminam mwwpa kuma panyiloqkam ho ngulug alaqkv asaq pwnboam gagab panyiloqkam,

²¹ham Pwnbov meelin nyoma dvn yv? Hoggab mwv hangwg mwwsnam mam cengdwn.

²²Hvbjaqkam noqgab sulak ngulam aal looxiam mengd kun; ngulam sviya patab tanam hvb xitaq pakun.

²³Huurab tuku! Hoggub no yubdu dvn, At Swa? No atv gorabto! Ngulam nwrba gob haqpaq maabv!

²⁴No hoggub noqg nyuqm mam kvs gvdwn? No hoggub ngulug duqtwr-duqnam mam la nyijab-nyiyapnam mam mwwpa kuma dvn?

²⁵Hoggab ngulug yvjv yoql kunv diimwrb nyipa ku; ngulug kepongv ked si bumdaq paku.

²⁶Gorabto; haag dvl ngulam svka tvb! Noqg tumab abynam gab ngulam pvlyw tvb.