Read Nyishi MWMIN NWSWR 48 Bible Online

MWMIN NWSWR 48 - Nyishi bible

MWMIN NWSWR 48

¹At Sw koijaq dvn hoo bopam uralo ngulug Pwnboam vcjaqb paqdwb nyidwn! Mwwg dvrwqbo yorn puutungv,

²kangam jaqdvb daqlin do, hv mwlw swcw soqg hemp gob nyidwn, Jaiyon yorn puutungv odum daiya aado tv doodwn, hv koibo Lvpw atwg bopamv.

³Gurum nwqtumnam bopam uraho Pwnbov mwam gurum at gob cengm pan.

⁴Hoggab kaato lvpw at tulungv dookumnum; bulv lvkin gob hookumnum.

⁵Bulv sam kaapa twqda kalam, bulv swrdorxeq gob mwwnum; bulv bosnum; bulv xaal keknum.

⁶Dvn akwg ko bwwtayin cinc cinam hvb nyinam, bulam tvmdwr hwqnamv nootul apnum.

⁷Dou-cagag dooi lvgab no Tarsis iss jaaj tulungam vmwq yumgub mvnum.

⁸Ngulv hoggub tapa kun hvbkalam ngulv kaat kun nyiit At Swg bopam ho, ho ngulug Pwnbog bopam ho, ham Pwnbov nwrba gob doom dvb mvl aptayin.

⁹Pwnboa, noqg dvrwqbo namlo ura hoqgv, ngulv noqg tumab abynam mam mwwkanum.

¹⁰Noqg emin hvbkalam, Pwnboa, nam paqnamv swcw nvg ywwtwr nagub wc do. Noqg lvqbwq alaqho jvqtwngv bwwrtvl doodo.

¹¹Jaiyon yorn puutungam hemp pomto! Noqg pw hwwk gab Judag nyem ko tulungam hwnyir-hvmar mvmto!

¹²Jaiyon dookub wto, ham gvqyiqto, hoqg nam tulungam xika to,

¹³kvvdy kaato Jaiyon nam aljaqb sulu nwqtumnam tulu ham, hoq gurum tulungam gvqyiqto, ho no ko hosiq-hosiqkam betam tamnyi yinpv

¹⁴hoqgab soq Pwnbo si, ngulug Pwnbov nwrba cwtam hoqgv nwrba gob doodwn. Mwv ngulam nwrba gob kaakinl wgtayin.