Read Nyishi MWMIN NWSWR 50 Bible Online

MWMIN NWSWR 50 - Nyishi bible

MWMIN NWSWR 50

¹Pwnbo At Sw, atorbo akv, swcw sam doonyi caalinko hoqgv doonyi haak xaqb agam gool hoo dvgoq goqdo.

²Jaiyon hoqgv mwlwngam kangam dvb Pwnbov huto huulin do.

³Ngulug Pwnbov haaikam; mwv cooikab dooma dvn; mwwg agaho wm moiliv bioqdu dvn; mwwg taqg-loosaqb nyodo taa-ngv peea dvn.

⁴Mwv doa aongam la swcw sam goqdo, hoo mwwg nyiilungam mwv pw-hwwkam yinpv.

⁵“Ngoqg dengkybo tulungam ngam bookum tvb, hiyv pwr jilayil ngoqg lvgab pvvb mwrnam!”

⁶Ao nyookv mwwg jvqtwngam bibwq jido, hoggab Pwnbo mwv At Sw su pw-hwwn bov!

⁷“Tato, ngoqg nyiilu, hoo ngo gootayin; Israela, ngo nulam agaho betam tayin. Ngo Pwnbov, nulug Pwnbov.

⁸Noqg pwr jinam gab ngo yolu ruqma dvn; noqg boyuqnam aky tulungv ngoqg aga si lwxiam haado.

⁹Ngo noqg nam hoq svv hvvb dorkin gokam ho noqg bintw ura hoqg sibin tulungam kam loorwqram.

¹⁰Hoggab nyorog hoolu luuxig svdin tulungv, yorn yorlywg siby-swcwrv ngoqg gvsu.

¹¹Ngo puutu tuuxig pvta tulungam ceng do, hoo nyook soq biinbo mwlwngv ngoq gvsu.

¹²“Ngo kano sujaqkam, ngo nam bepa ram, hoggab gvda gvt hoo soq hog mwlw doodwn si noqg gvsu.

¹³Ngo svv hvvb tulu vdinam dvd nvi yv ho sibin tulug uiyam twwd nvi yv?

¹⁴Paqyalinco paqnam akiam Pwnboam pwram jito, hoo Pwnboam noqg dingrnam mam nyijto,

¹⁵hoo vs-axaq aalam ngam goqpa to; ngo nam ywwlin tayin, hoo no ngam yuupw mvtayin.”

¹⁶Hvbmabde nyic-nyia boam Pwnbov bedwn: “No hognvk atorv doogdvn ngoqg pvvbam xwwminl doodwb ho ngoqg pvvbam noqg nvbcwr lo jaminl doodwb?

¹⁷Hoggab no gwrnam mam oyum dvn, hoo ngoqg agam tulungam no langkwb hurpaq dvn.

¹⁸No dvcobo ak kaapa yinyi lo, no mwwg lvgab hemp pomin gvdo, hoo no bwwxinbo dvpar lvgab yvmin gvdwn.

¹⁹“Noqg agamv bec-beyangam bedwb vdw maadwn, hoo noqg lyolv xaalyo lyon twqdwn.

²⁰No dootwl noqg vbw-boram ceebio agam mam goodwn; noqg annwg kepo akin koam no benyi-beyal doodwn.

²¹Soq mwlw sam no nyipan, hoo ham ngo cooikab hinsil doot kun; no ngam noqg simp gob mwwnum. Hvbmabde ngo sija nam yolu bedwn hoo nam ngo yolu ruqgab gvikun.

²²“Sam mwwdy to, ho hiyv Pwnboam mwwpa maadwn, hvb nyima baloqkam nam ngo swrc yin, hoo nam naalin bo akkam dook ma!

²³Hiyv akv paqyalinco paql aky jidwn ho mwwg pwr jinamv ngam yuupw mvdwn; hiyv nyiv jvqtw lamta gab kvtaqdvn, ngo Pwnbog ywwlinam mam kaakin tayin!”